وقيعا ورنىنان تۇسىرىلگەن ۆيدەو الەۋمەتتىك جەلىدە تاراپ جاتىر. وبلىستىق توتەنشە جاعدايلار دەپارتامەنتى 14 جەلتوقسان كۇنى ساعات 19:22-دە كەزەكشى بولىمشەگە وپەراتوردىڭ جانار-جاعارماي قۇيۋ ستانتسياسى مەن جاقىن ماڭداعى جالپى كولەمى 30 تەكشە مەتردى قۇرايتىن تسيستەرنالاردان ءورت شىققانى تۋرالى اقپارات تۇسكەنىن حابارلادى.
«وقيعا ورنىنا الماتى وبلىسى توتەنشە جاعدايلار دەپارتامەنتىنىڭ كۇشتەرى مەن قۇرالدارى جونەلتۋ شەنىنىڭ جوعارىلاۋى بويىنشا جىبەرىلدى, بارلىق توتەنشە جاعدايلار قىزمەتى ءوزارا ءىس-قيمىل جاسادى. ءورت 20:15-تە انىقتالىپ, 21:41-دە 80 شارشى مەتر اۋماقتا ءسوندىرىلدى. شۇعىل قابىلدانعان شارالار جانار-جاعارماي قۇيىلعان تسيستەرنالاردىڭ جارىلۋىنىڭ جانە ءورتتىڭ جاقىن ماڭداعى جانار-جاعارماي قۇيۋ ستانتسياسىنا (30 مەتر قاشىقتىقتا), شاعىن بازارعا (10 مەتر) جانە تۇرعىن ءۇي سەكتورىنا (15 مەتر) تارالۋىنىڭ الدىن الدى», دەپ اتاپ ءوتتى توتەنشە جاعدايلار دەپارتامەنتىنىڭ ءباسپاسوز قىزمەتى.
ءورت سالدارىنان جانارماي قۇيۋشى اۆتوتسيستەرنانىڭ 1967 جىلى تۋعان جۇرگىزۋشىسى ورتاشا تەرميالىق كۇيىك العان. العاشقى مەديتسينالىق كومەك كورسەتىلگەننەن كەيىن ول اۋرۋحاناعا جاتقىزۋدان باس تارتتى.
ءورتتىڭ شىعۋ سەبەپتەرى انىقتالىپ جاتىر. ءسوندىرۋ جۇمىستارىنا 20 قىزمەتكەر مەن سەگىز بىرلىك اۆاريالىق-قۇتقارۋ تەحنيكاسى, پوليتسيا قىزمەتكەرلەرى مەن جەدەل مەديتسينالىق بريگادا جۇمىلدىرىلدى.
