مۇراجاي عيماراتى وسىدان بىرنەشە جىل بۇرىن جوندەۋدەن وتكەن. بيىل مۋزەي ەكسپوزيتسياسىن قايتا جاڭعىرتۋ جۇمىستارى ءجۇرىپ جاتىر.
«قازىر مۋزەيدىڭ ەكىنشى جانە ءۇشىنشى قاباتىنداعى ەكسپوزيتسيالاردى قايتا قۇرىپ جاتىرمىز. بۇل ەكسپوزيتسيالاردا ادامزات ءداۋىرىنىڭ العاشقى كەزەڭدەرىنەن باستاپ, قازىرگى كەزەڭگە دەيىنگى ارالىقتاعى قوستاناي, تورعاي وڭىرىنە قاتىستى تاريحي دەرەكتەر حرونولوگيالىق جۇيە بويىنشا قامتىلىپ وتىر. مۋزەي قورىن تولىقتىرىپ جاتقان جاڭا ماتەريالدار بار. مىسالى, كەيىنگى جىلدارى اشىلعان تورعاي گەوگليفتەرىنە قاتىستى دەرەكتەر قويىلىپ جاتىر. وسىدان ءبىراز جىل بۇرىن مەتسەنات ساپار ىسقاقوۆتىڭ قولداۋىمەن تورعاي وڭىرىندە ارحەولوگيالىق قازبا جۇمىستارى جۇرگىزىلگەن. ودان كەيىن ۇلتتىق مۋزەيدەگى حالىق قازىناسى ينستيتۋتى بىرنەشە جىلدىق گرانت ۇتىپ الىپ, ارحەولوگيالىق زەرتتەۋ جۇمىستارىن ءارى قاراي ىلگەرىلەتكەن. سول جۇمىستاردىڭ ناتيجەسىندە ءتورت قورعاننان تابىلعان ءۇش سابا, تاعى باسقا دا جادىگەرلەر مۇراجاي ەكسپوزيتسياسىنان ورىن الدى. سونىمەن قاتار كەيىنگى كەزدە تابىلعان بالعوجا ءبيدىڭ سۋرەتى, شەگەننىڭ قازبەگىنىڭ سۋرەتى, احمەتساپا يۋسۋپوۆتىڭ ءوز قولىمەن جازىلعان عۇمىربايانى سەكىلدى قۇندى-قۇندى دۇنيەلەر, وسى ولكەنىڭ تاريحىن جاساۋعا ۇلەس قوسقان تۇلعالاردىڭ پورترەتتەرى, قۇجات كوشىرمەلەرى مۇراجاي قورىن تولىقتىرىپ وتىر», دەيدى مۋزەي قىزمەتكەرى, اقىن باتىرلان ساعىنتاەۆ.
مۋزەي قورىندا قازىر 76 مىڭنان اسا جادىگەر ساقتاۋلى تۇر. ولاردىڭ ىشىندە ءابىلحان قاستەەۆ سالعان امانگەلدىنىڭ پورترەتى, امانگەلدىنىڭ قانجارى, كەيكى باتىردىڭ ۇيىنە تيەسىلى كەبەجە, سارمات داۋىرىنە جاتاتىن كۇمىستەن جاسالعان ات ابزەلىنىڭ ءبىر بولىگى سەكىلدى قۇندى جادىگەرلەر بار.
قوستاناي وبلىسى
