سول يگى ءىستىڭ جالعاسى ىسپەتتى سەميناردىڭ باستى ماقساتى – ەلىمىزدەگى ءبىلىم بەرۋ سالاسىندا قىزمەت ەتىپ جۇرگەن عالىمدار مەن مەكتەپ مۇعالىمدەرى اراسىنداعى قارىم-قاتىناستى جۇيەلى جولعا قويىپ, ءوزارا پىكىر الماسىپ, وي ءبولىسۋ. القالى باسقوسۋعا عالىمدارمەن بىرگە, ءار ايماقتان كەلگەن ماتەماتيكا, فيزيكا جانە ينفورماتيكا پاندەرىنىڭ 120-عا جۋىق مۇعالىمى قاتىستى.
كۇمبىرلەگەن كۇيمەن شىمىلدىعى تۇرىلگەن تاعىلىمى مول ءىس-شاراعا مەملەكەتتىك سىيلىقتىڭ لاۋرەاتى, فيزيكا-ماتەماتيكا عىلىمدارىنىڭ دوكتورى, پروفەسسور مۇحتارباي وتەلباەۆ قۇرمەتتى قوناق رەتىندە ارنايى قاتىسىپ, جىلى لەبىزىن ءبىلدىردى. سونداي-اق عۇلاما عالىم ماتەماتيكا عىلىمىنا دەن قويعان ۇستازدارعا اق باتاسىن بەردى.
بۇدان سوڭ «بالداۋرەن» رەسپۋبليكالىق وقۋ-ساۋىقتىرۋ ورتالىعىنىڭ باس ديرەكتورى سەرجان الىباەۆ سەمينارعا قاتىسۋشىلاردى قۇتتىقتاسا, ۇلتتىق قۇندىلىقتار اكادەمياسىنىڭ مۇشەسى, مەكتەپكە دەيىنگى «Negesh» يننوۆاتسيالىق دامىتۋ كەشەنىنىڭ اۆتورى, شەبەر-پەداگوگ, فيزيكا-استرونوميا ءپانىنىڭ مۇعالىمى ەرۇلان جيەنباەۆ «ماتەماتيكا – عىلىمداردىڭ پاتشاسى» ەكەنىن ايرىقشا اتاپ ءوتتى.
– ماتەماتيكادا ءبىر عاسىر بۇرىن شەشىمىن عىلىمي جولمەن تابۋ ۇسىنىلعان الەمدەگى ەڭ كۇردەلى 7 ەسەپتىڭ ءبىرىن شەشىپ, دۇنيەجۇزى ماتەماتيكتەرىن مويىنداتقان مۇحتارباي وتەلباەۆتىڭ قۇرمەتىنە ۇيىمداستىرىلعان سەميناردىڭ مازمۇنى زور. الەمگە تانىلعان عالىم ارامىزدا وتىر. ول كىسىنىڭ «ماعان ءبىرىنشى كەزەكتە قازاقتىڭ قازاق بولعانى كەرەك. مەنىڭ عالىمدىعىم دا, پروفەسسورلىعىم دا قازاقتىعىمنان ساداعا. الدىمەن قازاقپىن, مۇسىلمانمىن, سودان كەيىن عالىممىن. مەن ءۇشىن عالىمدىعىمنان بۇرىن اتا ءداستۇرىم ماڭىزدى» دەگەن جالىندى ءسوزىن شاكىرتتەر ساناسىنا سىڭىرگەنىمىز ءجون, – دەدى ول.
شەبەرلىك سىنىپتارى مەن پسيحولوگيالىق ترەنينگتەر, دوڭگەلەك ۇستەل تۇرىندە ۇيىمداستىرىلعان ءىس-شاراعا قاتىسۋشى مۇعالىمدەر پاندەر بويىنشا توپقا ءبولىنىپ, عالىمداردىڭ باياندامالارىن تىڭداپ, ءدارىس الدى. وزدەرىن تولعاندىرىپ جۇرگەن ماسەلەلەر توڭىرەگىندە پىكىر الماستى. قىزىقتى تاقىرىپتاردى ارقاۋ ەتكەن سەمينار-كەڭەستى ۇيىمداستىرۋشىلارعا ەلىمىزدىڭ تۇكپىر-تۇكپىرىنەن كەلگەن ۇستازدار قاۋىمى العىسىن جاۋدىرىپ, از كۇندە مول تاجىريبە العاندارىنا ريزاشىلىق ءبىلدىردى.
ءىس-شارا سوڭىندا تەرەڭ بىلىمىمەن تانىلعان ماڭعىستاۋلىق الىبەك وراقوۆ, قاراعاندىلىق اقنيەت ءىلياسوۆ, سولتۇستىكقازاقستاندىق يۋليا ياكوۆەنكو, فيزيكا ءپانى بويىنشا ماڭعىستاۋلىق الماگۇل كوپجاساروۆا, ينفورماتيكادان جەتىسۋلىق گۇلشات قىستاۋباەۆا ەرەكشە بەلسەندىلىك تانىتىپ, وقۋ-اعارتۋ ءمينيسترىنىڭ قۇرمەت گراموتاسى جانە العىسحاتتارىمەن ماراپاتتالدى. سونىمەن قاتار سەمينارعا قاتىسۋشى ەكى جاس مامان ءا.وراقوۆ پەن ا.ءىلياسوۆا «بالداۋرەن» وقۋ-ساۋىقتىرۋ ورتالىعىنىڭ جازعى اۋىسىمىندا دەمالۋعا جولداما بەرىلدى.
الماتى وبلىسى
