دوستىق ۇيىندە وتكەن ءىس-شارا شىمىلدىعى جۇمابەك تاشەنوۆ تۋرالى قىسقاشا بەينەفيلممەن ءتۇرىلدى.
قاراپ وتىرساق, وسى ءبىر جىل ۇزدىكتەرىن انىقتايتىن ايتۋلى شارانىڭ ارقا جەرىندە ۇيىمداستىرىلىپ كەلە جاتقانىنا ون بەس جىلعا جۋىقتاپتى. داستۇردەن جاڭىلماي, جىل وتكەن سايىن تۇرلەنىپ وتۋىنە ايتىسكەر اقىن ايتباي جۇماعۇلوۆ ەڭبەك ءسىڭىرىپ ءجۇر. ال بۇعان جولىنان جىعىلماي, جومارتتىق تانىتىپ, دەمەۋشىلىك كورسەتىپ جۇرگەن التىن جۇرەكتى ازامات, «جىل مەتسەناتى» ساپار يبكەەۆتىڭ دە اتىن اتاپ وتكەنىمىز ءجون.
– ەل توناۋعا, جەر تالاۋعا تۇسكەندە تۋعان ەلى ءۇشىن استىنداعى تاعىن تارك ەتكەن تەكتى تۇلعا, الاش ارىستارىنىڭ اماناتىن ورىنداعان جۇمابەك تاشەنوۆ بولاتىن. ءبىز قاھارمان ۇلدىڭ ونەگەلى ىستەرىن, قايراتكەرلىك جولىن, اسىل مۇراسىن دارىپتەۋ ماقساتىندا جىل سايىن وتكىزىپ كەلەمىز. جاستاردىڭ شىعارماشىلىعىن شىڭداپ, ولارعا قامقورلىق كورسەتىپ ءجۇرمىز. جانە دە ەلگە ادال ەڭبەك ەتىپ جۇرگەن قوعام قايراتكەرلەرى مەن بەلسەندىلەرىن ماراپاتتاپ وتىرامىز, – دەيدى ۇيىمداستىرۋشى ايتباي بوتپاي ۇلى.
كەشتىڭ قادىرلى قوناعى, ج.تاشەنوۆتان باتا العان داۋلەسكەر كۇشى مۇحامەدجان تىلەۋحان ساحناعا كوتەرىلىپ, تۇلعا جايلى ەستەلىگىمەن ءبولىسىپ, كۇي شەرتتى.
مۇحامەدجان قاناي ۇلىنا, ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ فيلولوگيا فاكۋلتەتىنىڭ دەكانى, دوتسەنت ەلدوس ەرعازى ۇلىنا جانە ءانشى جانا قۋانىشبەكقىزىنا وبلىستىق ىشكى ساياسات باسقارماسىنىڭ باسشىسى نۇرلان بيكەنوۆ العىسحات تابىستادى.
سونىمەن س.سەيفۋللين اتىنداعى قاراعاندى وبلىستىق اكادەميالىق قازاق دراما تەاترىنىڭ ديرەكتورى قۇرمان قالىموۆ «جىلدىڭ ۇزدىك قايراتكەرى» اتاندى. ايماقتىق, رەسپۋبليكالىق جىر دودالارىندا توپ جارىپ جۇرگەن جاس تالانت بەكارىس وسپانوۆ «جىلدىڭ ۇزدىك ايتىسكەر اقىنى» اتالىمىمەن ماراپاتتالدى.
قازاق پوەزياسىندا ايشىقتى قولتاڭباسى بار سەرىك ساعىنتاي «جىلدىڭ ۇزدىك اقىنى» اتالىمىندا ۇكىلەندى. «جىلدىڭ ۇزدىك قالامگەرى» اتالىمىندا ەرنار كەيكين, «عىلىم مەن بىلىمگە جانە ۇرپاق تاربيەسىنە سىڭىرگەن ەڭبەگى ءۇشىن» راشيت كارەنوۆ قۇرمەتكە بولەندى. «وقۋ-اعارتۋ جانە ۇرپاق تاربيەسىنە سىڭىرگەن ەڭبەگى ءۇشىن» تەرەڭ تاريحشى تۇڭعىشباي مۇقان ماراپاتتالدى.
«جىلدىڭ ۇزدىك مادەنيەت جانە ونەر قايراتكەرى» ساۋلە شيباەۆا, «جىلدىڭ ۇزدىك ءتىلشىسى» جانابەك نار, «جىلدىڭ اتىمتاي جومارتى» ارمان ابەۋوۆ, «جىلدىڭ ۇزدىك بەلسەندىسى» اتالىمىمەن ەرنات مەلس ۇلى اتاندى. جىل ۇزدىكتەرىنە ارنايى ديپلوم مەن قارجىلاي سىيلىق تابىستالدى.
ماراپاتتاۋ راسىمىنەن سوڭ قازاقستاننىڭ ەڭبەك سىڭىرگەن قايراتكەرى, بەلگىلى ءانشى دوسىمجان تاڭاتاروۆ اننەن شاشۋ شاشتى.
قاراعاندى وبلىسى
