ءسوز باسىندا ءماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ ۇلتتىق مۇددەگە ساي كەلەتىن كىتاپتاردى كوپتەپ باسىپ شىعارۋ ماسەلەسى ءاردايىم مەملەكەت باسشىسى قاسىم-جومارت توقاەۆتىڭ نازارىندا ەكەنىن جانە مەملەكەت, پارتيا تاراپىنان مادەنيەتكە, ادەبيەتكە قولدان كەلگەنشە كومەك كورسەتىلە بەرەتىنىن اتاپ ءوتتى.
«ادەبيەتتەگى جاس بۋىن ءۇشىن « ۇلى دالا» بايقاۋى ايتۋلى وقيعاعا اينالدى. وسى ماڭىزدى ءىس-شارانى جىل سايىن تاۋەلسىزدىك كۇنىنە ورايلاستىرىپ وتكىزەمىز. ويتكەنى ۇلت تاۋەلسىزدىگىنىڭ رۋحاني تىرەگى – ونىڭ ءتىلى مەن ادەبيەتى, مادەنيەتى. ءبىز ءوز تاراپىمىزدان سىزدەردى قولداۋعا ءاردايىم ءازىرمىز», دەدى ول.
ەرلان قوشانوۆتىڭ پىكىرىنشە, قازىر قوعامدىق كەسەلگە اينالعان ەسىرتكى, لۋدومانيانىڭ بەلەڭ الۋى «رۋحاني قالقاننىڭ» بولماۋىنان. سوندىقتان وقىرمانعا وسى زاماننىڭ بولمىسىن بەينەلەيتىن تىڭ تۋىندىلار, وبرازدار مەن جاڭا كەيىپكەرلەر كەرەك. توراعا كىتاپسۇيەر قاۋىم جاڭا تولقىن قالامگەرلەردەن سالماقتى, ماعىنالى دۇنيەلەر كۇتىپ وتىرعانىن ايتتى.
ء«بىز كىتاپپەن ءومىر سۇردىك. ادەبيەت بىزگە مورالدىق, رۋحاني قالقان بولدى. ال رۋحاني قالقان دەگەنىمىز نە؟ ول – جاستاردى, وسكەلەڭ ۇرپاقتى دۇرىس جولعا باعىتتاپ, بۇرىس جولدان ساقتايتىن قۇندىلىقتارىمىز. بۇرىن قوعامدى كىتاپ تاربيەلەسە, قازىر ينتەرنەت پەن كوشە تاربيەلەپ جاتىر. مۇنىڭ جولى – جاس ۇرپاقتى وتانشىلدىققا, ىزگىلىككە, ادامگەرشىلىككە تاربيەلەۋ. ال ول قۇندىلىقتاردىڭ ءبارى – كىتاپتا, ادەبيەتتە. بۇل تۋرالى مەملەكەت باسشىسى دا ءاردايىم ايتىپ كەلەدى», دەدى پارتيا توراعاسى.
اتالعان بايقاۋ وسىمەن ءتورتىنشى رەت وتكىزىلىپ وتىر. بيىل ادەبي دودانىڭ وبلىستىق ىرىكتەۋى ۇيىمداستىرىلىپ, بايقاۋعا باس-اياعى 300-دەن استام شىعارما كەلىپ ءتۇستى. ونىڭ 170-ءى شەشۋشى كەزەڭگە جولداما الدى.
« ۇلى دالا» بايقاۋىنا «ادەبي سىن» اتالىمىن ەنگىزۋ ۇلكەن جاڭالىق بولدى. جالپى, ادەبي سىن بولمايىنشا, ادەبيەت دامىمايدى. بايقاۋعا ءبىر ەمەس, بىرنەشە ماتەريال كەلىپ ءتۇستى. ونىڭ ءبارىن وي ەلەگىنەن وتكىزىپ, لايىقتى باعاسىن بەردىك. سوندىقتان بۇل جانرعا كەلەشەكتە بارىنشا كوڭىل ءبولۋ كەرەك», دەدى قازىلار القاسىنىڭ مۇشەسى, ادەبي سىنشى امانگەلدى كەڭشىلىك ۇلى.
سونىمەن «پوەزيا» اتالىمى بويىنشا ءبىرىنشى ورىندى ۇمتىل زارىققان, ەكىنشى ورىندى ايزادا راحىمجانوۆا, ءۇشىنشى ورىندى ەربول الشىنباي يەلەندى. ال «پروزا» اتالىمىندا ءبىرىنشى ورىنعا باقىتبەك قادىر, ەكىنشى ورىنعا سايان سەكسەنباەۆ, ءۇشىنشى ورىنعا مەرەي قاينار ۇلى لايىق دەپ تانىلدى.
«بالالارعا ارنالعان شىعارما» اتالىمى بويىنشا ءبىرىنشى ورىندى نۇربەك كەڭەسباي, ەكىنشى ورىندى اباي ورىنباي, ءۇشىنشى ورىندى اقمارال وماروۆا قانجىعالادى. «دراماتۋرگيا» اتالىمىندا ءبىرىنشى ورىندى قانات تىلەۋحان, ەكىنشى ورىندى تايبەك ابدۋللين, ءۇشىنشى ورىندى قۋات قيىقباي جەڭىپ الدى.
«ادەبي سىن» اتالىمى بويىنشا ءبىرىنشى ورىن ءبىرجان احمەرگە, ەكىنشى ورىن انار ابدۋلليناعا, ءۇشىنشى ورىن مەيىر ورازعاليەۆكە بۇيىردى. سونىمەن قاتار «الاش اماناتى» ارنايى سىيلىعىن زەرتتەۋشى-عالىم باقتيار باتەۋ, «ماعجان جۇماباەۆتىڭ 130 جىلدىعى» سىيلىعىن اقىن, ساتيريك ابىلاي ماۋدانوۆ يەلەندى.
« ۇلى دالا» رەسپۋبليكالىق شىعارماشىلىق بايقاۋى جەڭىمپازدارىنىڭ قاتارىندا قوس بىردەي ارىپتەسىمىز بار ەكەنىن ايتا كەتكەن ءجون. «پروزادا» ۇزدىك شىققان باقىتبەك قادىر «Egemen Qazaqstan» گازەتى الەۋمەت ءبولىمىنىڭ ءتىلشىسى بولسا, وسى اتالىمىندا ۇشتىككە ىلىككەن مەرەي قاينار ۇلى – گازەتىمىزدىڭ شىعىس قازاقستان وبلىسىنداعى ءتىلشىسى.
