سۋرەتتى تۇسىرگەن – جانگەلدى ابدىعالىم
بۇگىنگى تاڭدا كاسىپتىك وقۋدى 435 مامان اياقتاپ, 317-ءسى جۇمىسقا ورنالاستىرىلدى. وقۋ كەزىندە مەملەكەتتەن 32 685 تەڭگە كولەمىندە شاكىرتاقى الادى جانە جولاقىسى تولەنەدى. «وڭىرىمىزدە كاسىپورىندار بازاسىندا ورنالاسقان 20 وقۋ ورتالىعى بار. ولار تىگىنشى, اسپاز, كونديتەر سياقتى سۇرانىسقا يە ماماندىقتار بويىنشا ماماندار دايىندايدى», دەيدى وبلىستاعى ەڭبەك ۇتقىرلىعى ورتالىعىنىڭ ديرەكتورى داۋرەن قوشقاراليەۆ.
ساران قالاسىنداعى «A.V.Group» كومپانياسىندا وسى جوبا اياسىندا ەڭبەككە ارالاسقاندار سانى كوپ. اتالعان كومپانيا 2013 جىلى قۇرىلعان بولاتىن. بيىل 10 جىلدىعىن اتاپ ءوتتى. كاسىپورىن تەك جەڭىل ونەركاسىپپەن شەكتەلىپ قالماي, بىرنەشە ءوندىرىستى دامىتىپ وتىر. ايماعىمىزدا العاشقىلاردىڭ ءبىرى بولىپ پوليگرافيالىق ءوندىرىستىڭ تولىق تسيكلىن قۇرعان. الداعى جوسپارلارى دا اۋقىمدى. قازاق تىلىندە برايل شريفتىمەن ءتۇرلى دۇنيەلەر باسىپ شىعارۋمەن اينالىساتىن ەلىمىزدەگى جالعىز كاسىپورىن اتانباق. جوباسى ءازىر. كەلەسى جىلى ىسكە قوسپاق نيەتتە. بۇعان قوسا, جول بەلگىلەرىن جاسايتىن تسەح تا بار. كومپانيا جيھاز وندىرۋمەن دە اينالىسادى, ارنايى كيىمدەر مەن تۇتىنۋ تاۋارلارىن شىعارادى. قازىرگى تاڭدا كاسىپورىندارىندا 150 ادام جۇمىس ىستەيدى.
– كاسىپورىنداعى 70 ادام ءبىزدىڭ وقۋ ورتالىعىنىڭ بازاسىندا قىسقامەرزىمدى كاسىپتىك وقۋدان ءوتتى. ساران قالاسىنىڭ مانساپ ورتالىعىمەن تىعىز بايلانىستامىز. ولار بىزگە جۇمىسسىزداردى جىبەرەدى. ءبىز ولاردى 3 ايدان 6 ايعا دەيىن وقىتامىز, سودان كەيىن جۇمىس ورنىن ۇسىنامىز. ءوزىمىز ءۇشىن ماماندار دايىندايمىز, سوندىقتان ولاردىڭ بىلىكتىلىگىنە سەنىمدىمىز. بولاشاقتا وسى باعدارلاما بويىنشا تاعى 200-گە جۋىق ادامدى جۇمىسقا ورنالاستىرۋعا دايىنبىز. سونداي-اق ءبىز ارنايى كيىمنەن الىستاپ, كوپشىلىك تۇتىناتىن كيىم تىگۋمەن دە اينالىسقىمىز كەلەدى, – دەيدى «A.V.Group» جشس باس ديرەكتورى ۆلاديمير الەسكەروۆ.
ساران قالاسىنىڭ تۇرعىنى ەلميرا ۆولكوۆا ۇزاق جىل مەكتەپتە ينفورماتيكا پانىنەن ساباق بەرگەن. ءبىر جىل بۇرىن ماماندىعىن اۋىستىرعىسى كەلىپ, قىسقامەرزىمدى كۋرستارعا تىركەلگەن.
– جۇمىسپەن قامتۋ ورتالىعىنا جۇگىندىم, ماعان «A.V.Group» سەرىكتەستىگىنىڭ وقۋ ورتالىعىنىڭ بازاسىندا تۇپتەۋشىگە وقۋدى ۇسىندى. ءۇش اي وقىدىم, تاجىريبەدەن دە ءوتتىم, سودان كەيىن جۇمىس ىستەيمىن دەپ شەشتىم. كۋرستار كەزىندە ستيپەنديا الدىم. قىسقامەرزىمدى كاسىپتىك وقىتۋ باعدارلاماسى – جاڭا ماماندىقتى تەز مەڭگەرگىسى كەلەتىندەر ءۇشىن جاقسى مۇمكىندىك. ويتكەنى ءبىلىم تولىققاندى بەرىلەدى. قازىر مەنىڭ سۇيىكتى ءىسىم بار, بلوكنوت جانە دە باسقا دا كەڭسە ونىمدەرىن جاسايمىن. سونىمەن قاتار جۇمىس ورنىم ءدال ءۇيىمنىڭ جانىندا, – دەيدى ەلميرا.
قىسقامەرزىمدى كاسىپتىك وقىتۋ باعدارلاماسىنىڭ تۇلەكتەرى جاڭا ماماندىقتى يگەرىپ, كەپىلدى جۇمىسقا ورنالاسىپ قانا قويماي, مەملەكەتتىك ۇلگىدەگى سەرتيفيكاتتاردى دا الادى. سونىمەن قاتار كەيبىر كۋرستاردى ونلاين وقۋعا دا بولادى. ولاردىڭ ءتىزىمى enbek.kz سايتىندا كورسەتىلگەن.
قاراعاندى وبلىسى,
ساران قالاسى
