«ەكىباستۇز جىلۋ-ەنەرگو» جشس تاراتقان مالىمەتكە سۇيەنسەك, اپاتتىق جاعداي 10 جەلتوقسان كۇنى تۇنگى ساعات بىرلەردىڭ شاماسىندا ورىن العان. ستانسادا سول ساتتە جۇمىس ىستەپ تۇرعان 7 قازاندىقتىڭ ۇشەۋى بىردەن مازۋتقا اۋىستىرىلدى. مازۋتتىڭ قىزۋى كومىرگە قاراعاندا ازىراق, سوعان وراي ورتالىقتان شىعاتىن جىلۋ تاسىمالداعىشتاردىڭ تەمپەراتۋراسى 60-70 گرادۋسقا دەيىن تومەندەپ قالدى.
بۇل كۇنى قالادا تۇتاستاي ورتالىقتاندىرىلعان جىلۋ پارامەترلەرى تومەندەپ, پاتەرلەردەگى جىلۋ باتارەيالارىنىڭ قىزۋى قانجىلىم بولىپ قالدى. ال جىلۋ ماۋسىمى باستالعالى ونسىز دا جاعدايى ءماز ەمەس كوپقاباتتى تۇرعىن ۇيلەر ءتىپتى سالقىنداپ, پاتەرلەر ىشىندەگى تەمپەراتۋرا +10 گرادۋسقا دەيىن تومەندەگەن. مىسال ءۇشىن لومونوسوۆ كوشەسى, 11ا مەكەنجايىندا ورنالاسقان ءۇي تۇرعىنى, زەينەتكەر امان ماسىعاپوۆ اتاپ وتكەندەي, قازان ايىنان بەرى مۇنداعى پاتەرلەر جىلۋعا جارىپ كورمەپتى. ارى كەتسە +16 گرادۋس جىلىلىقتى كورسەتكەن. سوعان قاراعاندا بۇگىندە ەكىباستۇزدىڭ ىشكى جەلىلەرىندەگى ماسەلەلەر تولىق شەشىلمەگەن, جاڭا جۇيەلەر مەن قۇبىرلار سالىنعانىمەن جىلۋ اينالىمىنىڭ جاعدايى ءماز ەمەس.
وبلىس اكىمى اسايىن بايحانوۆ سول كۇنى اپات ورىن العان جەرگە بارىپ, تولىق اۋىزدىقتالعانشا ستانسادا بولدى. اكىم ءوزىنىڭ ينستاگرام پاراقشاسىندا جازعانداي, ورىن العان اقاۋ ءۇش ساعاتتىڭ ىشىندە جويىلعان. جينالعان سۋ تولىعىمەن سورىلىپ الىنعان سوڭ سۋ جىلىتۋ قازاندىقتارى مازۋتتان كومىرگە تولىق اۋىستىرىلدى. ال دۇيسەنبى كۇنى تاڭەرتەڭگىلىك ستانسا بەلگىلەنگەن پارامەترلەرگە شىقتى. التى قازاندىق اگرەگاتى جۇمىس ىستەپ, ساعات وندار شاماسىندا ورتالىقتان شىعاتىن جىلۋدىڭ قىزۋى 83 گرادۋسقا جەتكىزىلدى. كەشە تۇستەن كەيىن كەيبىر پاتەرلەردەگى تەمپەراتۋرا كوتەرىلە باستاعانى حابار جەتتى. دەگەنمەن سۋىق ۇيلەردىڭ سانى ءالى دە بارشىلىق. بۇل تىزىمگە ەنەرگەتيكتەر, بەركىمباەۆ, كوشەرباەۆ, تولستوي, تورايعىروۆ, پىشەنباەۆ جانە تاعى باسقا كوشەلەردەگى كوپقاباتتى باسپانالار تىركەلىپ وتىر.
وبلىس اۋماعىندا الداعى ەكى كۇندە اياز كۇشەيەدى دەگەن اقپار بار. قازىرگى كۇنى پاۆلودار مەن اقسۋ قالالارىندا دا جىلۋعا جارىماي وتىرعان جەكەلەگەن كوپقاباتتى ۇيلەر بارشىلىق. دەگەنمەن ولاردىڭ جاعدايى كەنشىلەر قالاسىمەن سالىستىرعاندا شۇكىر دەۋگە بولادى. ەكىباستۇز حالقىنىڭ ايازدا جاۋراپ قالماۋىن تىلەيمىز.
پاۆلودار وبلىسى,
ەكىباستۇز قالاسى
