«جاڭا ينۆەستوردى ماڭىزدى مىندەتتەر كۇتىپ تۇر. ارينە, اۋەلى ەڭبەك قاۋىپسىزدىگىن قامتاماسىز ەتۋ جانە قىزمەتكەرلەرگە جاعداي جاساپ, ءال-اۋقاتىن ارتتىرۋ قاجەت. سونىمەن قاتار الەۋمەتتىك جوبالار ارقىلى جەرگىلىكتى قوعامداستىقتى دامىتۋعا بەلسەندى قاتىسىپ, كومەك كورسەتۋ كەرەك», دەدى ەرماعانبەت بولەكپاەۆ.
جيىندا اندرەي لاۆرەنتەۆ ۆاديم ءباسيندى QARMET كومپانياسىنىڭ باس ديرەكتورى رەتىندە تانىستىردى. ينۆەستور الداعى ۋاقىتتا 3 ملرد اقش دوللارى كولەمىندە ينۆەستيتسيا قۇيۋدى جوسپارلاپ وتىر. ونىڭ 1,3 ملرد دوللارى كەلەسى جىلى سالىنادى. سونداي-اق ۇلتتىق ينۆەستور قىسقامەرزىم ىشىندە جۇمىس بارىسىندا ۇجىمدىق كەلىسىمشارت پەن كاسىپورىن جۇمىسشىلارىنىڭ ەڭبەكاقىسىن تولەۋ جۇيەسىنىڭ ساقتالۋىن, ءوندىرىس ورنىنىڭ قاۋىپسىزدىگىن جانە ەكولوگيالىق احۋالىن ودان ءارى جاقسارتۋدى كوزدەيدى. سونداي-اق ءوندىرىستى جاڭعىرتۋ جانە قايتا ۇيىمداستىرۋ, شىعارىلاتىن ءونىم كولەمىن, نومەنكلاتۋراسىن جانە تۇرلەرىن ۇلعايتۋ دا بار مىندەتتەمەلەرىنىڭ قاتارىندا.
Qazaqstan Steel Group اكتسيونەرىنىڭ QARMETتەگى رەسمي وكىلى بولىپ تالعات تەمىرحانوۆ تاعايىندالدى. بۇعان دەيىن ونەركاسىپ جانە قۇرىلىس ءمينيسترى قانات شارلاپاەۆ بريفينگ بارىسىندا كاسىپورىندى قازاقستاندىق ينۆەستور ساتىپ العانىن مالىمدەگەن بولاتىن.
– وزدەرىڭىز بىلەسىزدەر, 2023 جىلعى تامىزدا مەملەكەت باسشىسى قاسىم جومارت توقاەۆ «ارسەلورميتتال تەمىرتاۋ» كاسىپورىندارىندا جالعاسىپ جاتقان اپاتتار كومپانيانىڭ ءوز ينۆەستيتسيالىق جانە وزگە دە مىندەتتەمەلەرىن ەلەۋلى بۇزۋشىلىقتارعا اكەپ سوقتىرعانىن مالىمدەگەن بولاتىن. سونداي-اق پرەزيدەنت «ارسەلورميتتالدىڭ» ءبىزدىڭ نارىقتا بۇدان ءارى جۇمىسىن جالعاستىرۋى مۇمكىن ەمەس ەكەندىگىنە نازار اۋدارعان. بۇل كەزدە قازاقستان ۇكىمەتى «ارسەلورميتتال تەمىرتاۋ» يەلەرىمەن ArcelorMittal كومپانياسىنىڭ مەتاللۋرگيالىق كومبينات قۇرامىنان شىعۋى تۋرالى كەلىسسوزدەر جۇرگىزىپ جاتقان ەدى. ولار 2022 جىلدىڭ 3 قاراشاسىندا امتنىڭ ەنشىلەس كاسىپورنى – لەنين اتىنداعى شاحتادا بولعان قايعىلى اپاتتان كەيىن باستالدى, – دەدى قانات شارلاپاەۆ.
كەلىسسوز ناتيجەسىندە, 2022 جىلعى 9 جەلتوقساندا قازاقستان ۇكىمەتى مەن ArcelorMittal اراسىندا «Standstill Agreement» كەلىسىمىنە قول قويىلعان. بۇل كەلىسىم نەگىزىندە قازاقستاندىق تاراپقا كاسىپورىندى باعالاۋ مەن اۋديت جۇرگىزۋگە مۇمكىندىك بەردى. قانات شارلاپاەۆتىڭ ايتۋىنشا, «ارسەلورميتتال تەمىرتاۋ» قىزمەتىن تالداۋ جانە باعالاۋ ءۇشىن حالىقارالىق كونسۋلتانتتار تارتىلعان. ولار كاسىپورىنعا قۇقىقتىق تالداۋ, قارجىلىق اۋديت جانە تەحنيكالىق ساراپتاما جۇرگىزدى.
كەلىسسوز بارىسىندا ArcelorMittal قازاقستاننان 3,5 ميلليارد دوللار سۇراعان. بىراق حالىقارالىق كەڭەسشىلەر ەسەپتەۋلەرى اتالعان سوماعا سايكەس كەلمەدى. ەكى تاراپتىڭ كەلىسىمگە بىردەن كەلە الماي, ۇدەرىستىڭ ۇزاققا سوزىلۋىنىڭ بىردەن-ءبىر سەبەبى – وسى.
– ماقساتىمىز قىرۋار قاراجات جۇمسالاتىن جانە ۇزاققا سوزىلاتىن حالىقارالىق سوت ۇدەرىستەرىنە جول بەرمەي, كومبيناتتى ءادىل باعامەن ساتىپ الۋ بولدى. سونداي-اق كەلىسسوزدەردى جەدەل ءارى شۇعىل وتكىزۋ كاسىپورىننىڭ توقتاپ قالۋىنا جول بەرمەۋ قاجەتتىلىگىنەن تۋىندادى. اتاپ ايتقاندا, دومنا پەشىنىڭ توقتاپ قالۋى, شاحتالاردى سۋ باسۋ جانە تاعى دا باسقا جاعدايلاردى بولدىرماۋ ماڭىزدى ەدى, – دەيدى مينيستر.
كەلىسىمشارت بويىنشا QSG «ارسەلورميتتال تەمىرتاۋ» اكتيۆتەرىن 286 ملن دوللارعا ساتىپ العان. ودان بولەك جىل سايىن 4 رەت تەڭ جارنامەن 450 ملن دوللار مولشەرىندە كەيىنگە قالدىرىلعان كەپىلدى تولەمدى تولەيدى. سونىمەن قاتار كەلىسىم جابىلعان كەزدە «ارسەلورميتتال تەمىرتاۋدىڭ» وتەلمەگەن توپىشىلىك قارىزى رەتىندە 250 ملن دوللار وتەيدى.
قانات شارلاپاەۆ ArcelorMittal وكىلدەرىن «قازاقستان حالقىنا» قايىرىمدىلىق قورىن قولداۋ ءۇشىن 16 ملرد تەڭگەگە (34,6 ملن دوللار) جارنا اۋدارۋعا كوندىرگەنىن دە جەتكىزدى. قورعا امت-دان تۇسەتىن قاراجات قاراعاندى وبلىسى تۇرعىندارىنىڭ دەنساۋلىق ساقتاۋ, ءبىلىم بەرۋ, مادەنيەت, سپورت سالالارىنداعى وزەكتى ماسەلەلەرىن شەشۋگە جانە ءوڭىردىڭ الەۋمەتتىك ماڭىزى بار جوبالارىن دامىتۋعا باعىتتالادى. وسى سومانىڭ 50 پايىزى تەمىرتاۋ قالاسىن دامىتۋ ماقساتىندا قولدانىلادى, دەدى مينيستر.
قاراعاندى وبلىسى
