وتكەن قىستان اۋپىرىمدەپ شىققان قالانىڭ جىلۋ جۇيەسىنە ءبىرشاما كوڭىل اۋدارىلىپ ەدى. الدىمەن مەملەكەت باسشىسى قاسىم-جومارت توقاەۆتىڭ تاپسىرماسى بويىنشا كوكشەتاۋ مەن ستەپنوگور قالالارىن جىلۋمەن جابدىقتاۋ نىساندارىن جاڭعىرتۋ تۋرالى شەشىم قابىلدانعان بولاتىن. ۇكىمەت رەزەرۆىنەن بولىنگەن 2 ميلليارد تەڭگەنىڭ ەسەبىنەن ماگيسترالدىڭ جەلىلەرگە جوندەۋ جۇرگىزىلدى. «ستەپنوگورسكايا تەتس» جانە «ستەپنوگورسك تەپلوترانزيت» سەرىكتەستىكتەرىنىڭ جەكە قارجىسى ەسەبىنەن جىلۋ-ەلەكتر ورتالىعىنىڭ جانە جىلۋمەن جابدىقتاۋ جەلىلەرىنىڭ قۇرال-جابدىقتارىنا 5,3 ميلليارد تەڭگەگە جوسپارلى جوندەۋ جۇمىستارى جۇرگىزىلگەن بولاتىن.
اپات ورنىندا جەدەل شتاب قۇرىلىپ, وعان وبلىس اكىمى مارات احمەتجانوۆ توراعالىق ەتتى. شۇعىل شارالار قولعا الىندى. «ستەپنوگورسك تەپلوترانزيت» سەرىكتەستىگىنىڭ ماماندارى ءجىتى قيمىلداپ, جىلۋ جۇيەسىندەگى اپاتتىڭ سالدارىن جويدى. قالا تۇرعىندارى ورىن العان كەلەڭسىز جاي تۋرالى ۋاقتىلى قۇلاقتاندىرىلدى. قازىر اپاتتىڭ سەبەبى انىقتالىپ, جوندەۋ جۇمىستارى جۇرگىزىلدى. تۇرعىن ۇيلەرگە جىلۋ بەرىلە باستادى.
قىس جاڭا باستالعاندا قىرسىق شالعانى كوپشىلىكتى قوبالجىتىپ وتىر. شاعىن حاباردىڭ تاقىرىبىندا ايتقانىمىزداي, اپاتتىڭ ايتىپ كەلگەنى دە راس. شوق جۇلدىزداي شاعىن عانا قالانىڭ جىلۋ جۇيەسىنىڭ توزىعى جەتكەندىگى تۋرالى سان مارتە ايتىلعان. الداعى ۋاقىتتا تۇرعىنداردى ابىگەرگە سالاتىن توسىن وقيعا ورىن الماسا يگى.
اقمولا وبلىسى,
ستەپنوگور قالاسى
