قاراشا ايىنان باستالعان ەكپە جۇمىستارى قوناەۆ قالاسىندا دا قارقىندى جۇرگىزىلۋدە. بۇگىندە 982 بالا ەكپە الدى. جوسپار بويىنشا 4 453 بالا ەكپە الۋى كەرەك. بۇل تۋرالى قوناەۆ قالالىق اۋرۋحاناسىنىڭ ەپيدەميولوگ-دارىگەرى ەرلان سارجانوۆ ايتتى. دارىگەردىڭ سوزىنشە, كەز كەلگەن اۋرۋدىڭ الدىن الۋ ءۇشىن ەكپە الۋ كەرەك. سول سەبەپتى قوناەۆتا بالالاردى قوسىمشا يممۋنداۋ ءجۇرىپ جاتىر. ونىڭ ىشىنە 6 ايدان 11 ايعا دەيىنگى, 2-5 جاس ارالىعىنداعى بالالار كىرەدى. بۇدان بولەك, قىزىلشاعا جوسپارلى ەگۋ (1-6 جاس ارالىعى) جۇرگىزىلىپ جاتىر.
«وتكەن اپتانىڭ جەكسەنبىسىندە 1 500 دانا ەكپە اكەلىندى. سونداي-اق مەديتسينالىق قىزمەتكەرلەر دە قىزىلشاعا قارسى ۆاكتسينا الىپ جاتىر. قالاداعى ەپيدەميالىق جاعداي تۇراقتالعانشا قوسىمشا يممۋنداۋ پروتسەسىن توقتاتپايمىز. شاھارعا قاراستى شەڭگەلدى جانە زارەچنىي اۋىلدىق وكرۋگتەرىندەگى تۇرعىندار دا ۆاكتسينا الا الادى. بۇل ءۇشىن مەديتسينالىق قىزمەتكەرلەرگە جۇگىنۋگە ءتيىس», دەدى ەپيدەميولوگ.
ال جۇقپالى اۋرۋلار ءبولىمىنىڭ جالپى تاجىريبە دارىگەرى نۇرعازى شامۇراتوۆتىڭ ايتۋىنشا, اتالعان بولىمگە دەنە قىزۋىنا, جوتەل مەن السىزدىككە شاعىمدانىپ كۇنىنە 20-25 ناۋقاس كەلەدى.
«قىزىلشا جۇقتىرعانداردىڭ كوبى – 1 جاسقا دەيىنگى بالالار. اۋرۋى اسقىنعانداردى بىردەن ستاتسيونارلىق ەمدەۋگە جاتقىزىپ جاتىرمىز. ال كەيبىر ناۋقاستار ءۇي جاعدايىندا ەمدەلۋدە. ولاردىڭ جاعدايىن باقىلاۋدا ۇستاپ وتىرمىز. بۇعان دەيىن اۋرۋحانادان ەمدەلىپ شىققانداردىڭ سانى 100-دەن اسادى», دەدى دارىگەر.
جىل باسىنان بەرى قوناەۆ قالاسىندا قىزىلشامەن اۋىرعاندار سانى 157 بولسا, ولاردىڭ ىشىندە 19-ى امبۋلاتورلى ەم الىپ, 138-ءى جۇقپالى اۋرۋلار بولىمشەسىنە جاتقىزىلعان.
ەلىمىزدە 6 قاراشادان قىزىلشاعا قارسى قوسىمشا جاپپاي يممۋنداۋ باستالدى. 23 قاراشا كۇنى قازاقستانعا قوسىمشا جاپپاي يممۋنداۋ جۇرگىزۋ ءۇشىن 500 مىڭ دوزا مولشەرىندە قىزىلشاعا, قىزامىققا جانە پاروتيتكە قارسى ۆاكتسينا (ققپ) پارتياسى كەلدى. ءبىرىنشى كەزەكتە 6 ايدان 11 ايعا دەيىنگى بالالار يممۋنداۋعا جاتادى. جەلتوقساننان باستاپ ەگۋ مارتەبەسىنە قاراماستان 2 جاستان 5 جاسقا دەيىنگى بالالاردى, مەديتسينا قىزمەتكەرلەرىن (55 جاسقا دەيىن), سونداي-اق پروفيلاكتيكالىق ەگۋدى وتكىزىپ العان 18 جاسقا دەيىنگى ادامداردى قىزىلشاعا قارسى قوسىمشا يممۋنداۋ جوسپارلانعان.
كۇن سۋىتقالى تۇماۋ ەپيدەمياسى دا كەڭ تارالىپ جاتىر. بۇل كەزەڭدە يممۋنيتەتتى نىعايتۋ, دارۋمەنگە باي تاعام تۇرلەرىن پايدالانۋمەن قاتار, ناۋقاستارمەن جاقىن قارىم-قاتىناستا بولماۋ سىندى قاراپايىم قاعيدالاردى ساقتاۋدى ەستە ۇستاعان ابزال. «ساقتانساڭ – ساقتايدى» دەگەندەي, بۇگىندە تۇماۋعا قارسى 6 974 ادام ەكپە العان. ونىڭ 5 815-ءى – ەرەسەكتەر.
الماتى وبلىسى
