ءبىز, اۋىل بالالارى, 14 جاسىمىزدان ەڭبەككە ارالاستىق, جازعى دەمالىسىمىزدا كەڭشاردىڭ مال ازىعىن جيناۋ جۇمىسىنا قولعابىس ەتتىك. ءومىر بويى ەشبىر جۇمىستان قاشقان جوقپىز. زەينەت جاسىنا كەلگەن كەزدە جالاقىمىز تومەن بولدى. اۋىلدا ەڭبەكاقى 40-50 مىڭ تەڭگەدەن اسپايتىن. سوندىقتان زەينەت جاسىنا كەلگەندە بازالىق زەينەتاقىمىز 20-30 مىڭ تەڭگە توڭىرەگىندە عانا بولدى. 2018 جىلى ەڭبەك ءوتىلىمىزدى ەسەپتەپ, 12 800 تەڭگە قوستى. زەينەتاقى وسكەن سايىن پايىزدىق ءوسىم تەك بازالىق زەينەتاقىعا قوسىلادى, بۇل ماردىمسىز. مىسالى, قازىر ينفلياتسيا 23 پايىز بولسا, ءبىزدىڭ زەينەتاقىمىزعا قوسىلعان 8-9 مىڭ تەڭگەدەن نە پايدا بار؟
ءبىز – سوعىستان كەيىن دۇنيەگە كەلىپ, بالالىق, جاستىق شاعى ەڭ اۋىر كەزەڭگە تاپ بولعان بۋىنبىز. حال-قادىرىمىزشە ەڭبەك ەتىپ, بالالارىمىزعا جانە ءوزىمىز قارتايعاندا جۇمسايمىز دەپ بانككە جيناعان اق ادال قارجىمىز كۇيىپ كەتتى. ونى قايتارۋ ءۇشىن ۇكىمەت ەشتەڭە ىستەگەن جوق.
بۇگىندە تەلەديداردان ەلىمىز بويىنشا ورتاشا زەينەتاقى مولشەرى 125 مىڭ تەڭگە دەگەن اقپارات ەستىپ جاتامىز. الايدا 1955 جىلعا دەيىن دۇنيەگە كەلگەن اۋىل ازاماتتارىنىڭ زەينەتاقىسى وتە تومەن. قازىرگىدەي قىمباتشىلىق زاماندا ازىق-ت ۇلىك قانا ەمەس, كوممۋنالدىق تاريفتەر, جول بيلەتتەرى, ەم-دوم, ءدارى-دارمەك باعالارى دا شارىقتاپ كەتتى.
ءوز باسىم ءومىر بويى ازعىر, كاپۋستين يار اسكەري پوليگوندارىنىڭ ىرگەسىندە, وردا اۋدانىندا تۇردىم. جاسىمىز 70-تەن اسىپ كەتتى. دەنساۋلىعىمىز دا جاقسى ەمەس. مەنىڭ ءوز اتىمنان جانە 1945-1955 جىلدار اراسىندا تۋعان ەڭبەك ارداگەرلەرىنىڭ اتىنان سۇرايتىنىم, ءبىزدىڭ زەينەتاقىمىزدىڭ بازالىق بولىگىنە قوسا جيناقتاۋشى بولىگى دە وسىرىلسە ەكەن. ويتكەنى ينفلياتسياعا بايلانىستى زەينەتاقىمىزعا قوسىلىپ جاتقان قوسىمشا ماردىمسىز. تاپقانىمىز قاپقانىمىزعا جەتپەي جاتىر.
حابدۋلقادىر اقپەيىسوۆ,
زەينەتكەر
ورال
