بالاپان ابەنوۆ 1960 جىلى قارقارالى اۋدانىندا دۇنيەگە كەلگەن. ەڭبەك جولىن 1977 جىلى ن.ءابدىروۆ اتىنداعى كەڭشاردا توكار بولىپ باستاعان. 1983 جىلى ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنە وقۋعا ءتۇسىپ, زاڭگەر اتاندى. 1988-1999 جىلدار ارالىعىندا قاراعاندى وبلىسىنىڭ پروكۋراتۋراسىندا جۇمىس ىستەدى. قاتارداعى تەرگەۋشىدەن تەمىرتاۋ قالاسى پروكۋرورىنىڭ ورىنباسارى قىزمەتىنە دەيىن جوعارىلاعان. 1999-2005 جىلدار ارالىعىندا وبلىستىق ادىلەت دەپارتامەنتى باستىعىنىڭ ورىنباسارى, كەيىن وبلىستىڭ سوتتار اكىمشىسى بولدى. وبلىس اكىمىنىڭ كەڭەسشىسى قىزمەتىن دە اتقارعان. 2016 جىلى 26 جەلتوقساندا ارقا جۇرتى ارداقتى ازاماتىنان ايىرىلدى.
تىرشىلىگىندە ادىلدىگىمەن, تۋرا سوزىمەن جۇرتتىڭ جۇرەگىنە جول تاپقان ازامات. زاڭ سالاسىندا شەندى قىزمەتتەر اتقارىپ, ەلگە شاپاعاتىن كوپ تيگىزگەن. تىرشىلىگىندە سىيلاسقاندار «بۇگىنگىنىڭ ءبيى ەدى» دەپ تەبىرەنىسپەن ەسىنە الادى.
ب.ابەنوۆتى ەسكە الۋعا ارنالعان بۇل تۋرنير 2018 جىلدان باستاپ ءوتىپ كەلەدى. بيىلعى ءتۋرنيردىڭ اشىلۋ راسىمىنە جوعارعى سوتتىڭ سۋدياسى دوسجان ءامىروۆ پەن مەملەكەتتىك جانە قوعام قايراتكەرلەرى ەرالى توعجانوۆ, كامالتين مۇحامەدجانوۆ, پارلامەنت ءماجىلىسىنىڭ دەپۋتاتى قۇدايبەرگەن بەكسۇلتانوۆ, قازاقستاننىڭ ەڭبەك سىڭىرگەن قايراتكەرلەرى رىمبالا وماربەكوۆا, جاقسىكەلدى كەمالوۆ, اقىن, اباي اتىنداعى مەملەكەتتىك سىيلىقتىڭ يەگەرى سەرىك اقسۇڭقار ۇلى, قالالىق ءماسليحاتتىڭ توراعاسى التىنتورە بوكەنوۆ, زاڭگەردىڭ ۇستازى نۇرساحان بەيسەنبەكوۆا جانە وزگە دە قادىرلى قوناقتار قاتىستى. مەيماندار قادىرلى ازامات تۋرالى ەستى ەستەلىكتەرىمەن ءبولىستى. وبلىستىق دەنە شىنىقتىرۋ جانە سپورت باسقارماسىنىڭ باسشىسى تەمىرحان ابىلاەۆ بۇل ءتۋرنيردىڭ ماڭىزى مەن ءمانى زور ەكەنىن اتاپ ءوتتى.
– ب.ابەنوۆتىڭ عۇمىرى كەلتە بولسا دا, حالقىنا كوپ پايداسىن تيگىزىپ, جاقسىلىق جاساپ كەتتى. جۇلدىزداي جارق ەتتى. اتپالداي ازاماتتىڭ كەشكەن عۇمىرى تالايعا ۇلگى. ەلىمىزدە ب.ابەنوۆتەي ازاماتتار كوبەيسە دەگەن تىلەك بار. وسى ءتۋرنيردىڭ ماڭىزى زور. سەبەبى ونىڭ ەسىمى ەل جادىنان وشپەۋگە ءتيىس. مارقۇمدى ەسكە الىپ, وسىنداي دوپ دوداسىنىڭ وتۋىنە ىقپال جاساپ جۇرگەن دوستارىنا, باۋىرلارىنا, تۋعان-تۋىسقاندارىنا العىس. جاقسىنىڭ جاقسىلىعى ايتىلعانى ابزال. مىنا جاستار دا ءوز ءىسىنىڭ شەبەرلەرىنە اينالىپ, كەلەشەكتە ەل نامىسىن الەمدىك دەڭگەيدە قورعاسا دەيمىز, – دەدى ت.ابىلاەۆ.
– ارقادا ب.ابەنوۆتىڭ جاقسىلىعىن كورمەگەن ادامدار وتە از. مارقۇم تىرشىلىگىندە تالايعا شاراپاتىن تيگىزدى. قينالعانداردىڭ قاسىنان تابىلا ءبىلدى. پاراسات پەن اقىلدىڭ يەسى ەدى. ءمارت, جومارت ەدى. بارىنە اقىلشى بولدى. ەل تىزگىنىن ۇستاعان نەبىر شەندىلەر بالاپان مارقۇمنان كەلىپ اقىل سۇرايتىن. ادىلدىكتى جاقتاعان, مەملەكەت مۇددەسى ءۇشىن ايانباي تەر توككەن حالقىنىڭ اسىل پەرزەنتى. مۇنداي ازاماتتار ءجۇز جىلدا ءبىر تۋادى, – دەپ ءادىل ازامات جايىندا تەبىرەنە سويلەدى اقىن سەرىك اقسۇڭقار ۇلى.
تۋرنيردە اباي اۋدانىنان كەلگەن كوماندا شەبەر ويىن كورسەتىپ, 1-ورىندى قانجىعالادى. بيىلعى تۋرنيرگە تىڭعىلىقتى دايىندالىپتى. الاڭدا پرەسسينگتى كوپ جاساپ, قارسىلاسقا ارتىق قادام جاساتپادى. ءتۇرلى كومبيناتسيالاردى جۇزەگە اسىردى. دوپ دوداسىندا جاسىنداي جارقىراعان فۋتبولشىلارعا مەدال مەن كۋبوك جانە اقشالاي سىيلىق تابىستالدى. 2-ورىن قاراعاندىعا بۇيىرسا, 3-ورىن – تەمىرتاۋدىڭ قورجىنىندا.
ە.بوكەتوۆ اتىنداعى قاراعاندى ۋنيۆەرسيتەتىنىڭ باسقارما توراعاسى نۇرلان دۋلاتبەكوۆ ءبىلىم ورداسىنىڭ اتىنان ارنايى جۇلدەلەر تابىستادى. تۋرنيردە ەرەكشە ويىن ورنەگىن كورسەتكەن ويىنشىلار دا ەسكەرىلىپ, ولارعا سىيلىقتار تارتۋ ەتىلدى.
قاراعاندى وبلىسى
