“تاس بۇلاقتاي ءمولدىر, جاس قۇراقتاي كوركەم”

تالانتتى جازۋشى, مارقۇم سايىن مۇراتبەكوۆتىڭ شىعارماشىلىعىنا ارنالعان كىتاپ كورمەسى وسىلاي اتالادى. سوڭعى ۋاقىتتاردا ۇلتتىق قۇندى­لىق­تارىمىزدى دارىپتەۋ باعىتىندا قر ۇلتتىق اكادەميالىق كىتاپحاناسىنىڭ ءسىڭىرىپ جۇرگەن ەڭبەگى ايرىقشا. “جاق­س­ى­نىڭ جاقسىلىعىن ايت, نۇرى تاسى­سىن” دەيدى عوي, مىنەكي, اتالمىش ۇجىم­­عا ۇلت جاناشىرى راقىمجان وتار­باەۆ باس­شى­لىق قىزمەتىنە كەل­گەن­نەن بەرى رۋ­حاني تاعىلىمى مول, ونەگەلى باسقوسۋلار مەن كەشتەر ءجيى وتكىزىلىپ كەلەدى دەسەم, بۇل جولعى شارا مەملە­كەت­تىك سىيلىق­تىڭ لاۋرەاتى, تاۋەلسىز “تار­لان” سىي­لىعىنىڭ يەگەرى, قازاق­ستا­ن­نىڭ ەڭبەك سىڭىرگەن قايراتكەرى, جا­زۋشى سايىن مۇراتبەكوۆتىڭ شىعارما­شىلى­عىنا ارنالدى. سالتاناتتى شاراعا ءابىش كەكىلباەۆ, اكىم تارازي, فاريزا وڭعارسىنوۆا جانە ت.ب. ادەبيەت مايدانىنىڭ الدىڭ­عى شەبىندە جۇرگەن قالامگەرلەر قاتى­سىپ, كورمەنىڭ اشىلۋ لەنتاسىن قيدى. جۇرتشىلىق جازۋ­شىنىڭ كىتاپتارىن, شىعارماشىلىعىنا ارنالعان گازەتتەر مەن جۋرنالدارداعى جاريالانىمداردى قاراپ, ارىپتەستەرىنىڭ تۇلعالىق بەينەسىن ءبىر ساتكە ەستەرىنە ءتۇسىردى. ال ءماجىلىس زالىنداعى ەسكە الۋ شاراسىن اكىم تارازي جۇرگىزدى. ول ادەبيەتتەگى نار تۇلعالاردىڭ ءبىر-بىرىنە ايتاتىن جاراسىمدى ءازىل­دەرىن ەسكە الا سويلەگەندە جينالعان كوپشىلىك قاۋىم دا بۇل اڭگىمەلەردى جىلى قابىلداپ, ەرىكسىز ەزۋ تارتىپ وتىردى. العاشقى ءسوز كەزەگىن العان ءابىش كەكىلباەۆ: “بۇگىن ادەبيە­تى­مىزدىڭ ءتورت كوزى تۇگەندەلىپ وتىرعان سياقتى. سايىن – جاي ادامنىڭ تىرشىلىگىن ۇلكەن ەستەتيكالىق تۇر­عى­دان يگەرە بىلگەن ادام. حالقى­مىز­دىڭ شىعارماشىلىق كۇشىنە ەلەۋلى ىقپال جاساعان تۇلعا بولدى”, – دەي كەلىپ, جازۋشى جونىندەگى ەستەلىكتەرىن, وي تولعامدارىن كوپشىلىكپەن ءبولىستى. سونداي-اق  نۇرعوجا وراز, فاريزا وڭعارسىنوۆا, الدان سمايىل سايىن مۇراتبەكوۆتىڭ ازاماتتىق بولمىسى, شىعارماشىلىق تىنىسى جايلى تۇششىمدى اڭگىمەنى جالعاستىردى. “قازاق ادەبيەتىندە سايىن مۇراتبەكوۆ بىرەۋ عانا. بىرەۋ بولىپ قالا بەرمەك”, – دەدى فاريزا اپامىز. كەش سوڭى سايىن مۇراتبەكوۆتىڭ شىعارمالارىنان ۇزىندىلەر وقىلۋمەن اياقتالدى. اراي ۇيرەنىشبەكقىزى. سۋرەتتەردى تۇسىرگەن  اعىباي اياپبەرگەنوۆ.