فوتو: aqparatqogam
فورۋمعا پرەزيدەنت اكىمشىلىگى, پرەزيدەنت ءارحيۆى, پرەمەر-ءمينيستردىڭ كەڭسەسى, مادەنيەت جانە اقپارات مينيسترلىگى, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ وكىلدەرى, پارلامەنت دەپۋتاتتارى, استانا قالاسى اكىمىنىڭ اپپاراتى باسشىلارى, قوعام قايراتكەرلەرى, ارحيۆ سالاسىنىڭ شەتەلدىك جانە وتاندىق ماماندارى مەن ارداگەرلەرى قاتىستى.
«تاۋەلسىز قازاقستاننىڭ قالىپتاسۋ تاريحىندا ارحيۆتەردىڭ اقپاراتتىق الەۋەتىن پايدالانباۋ مۇمكىن ەمەس. ويتكەنى, ارحيۆ ءىسىن ۇيىمداستىرۋدىڭ جاي-كۇيى مەملەكەتتىڭ دامۋ كورسەتكىشتەرىنىڭ ءبىرى بولىپ تابىلادى. سوڭعى جىلدارى ارحيۆ قورلارىنىڭ دەرەكتى كوزدەرىنە قول جەتكىزۋدى ۇيىمداستىرۋ, ولاردى تسيفرلىق فورماتقا كوشىرۋ جانە قۇجاتتاردى عىلىمي, ساياسي ماقساتتاردا پايدالانۋعا قاشىقتان قول جەتكىزۋدى ۇسىنۋ, ازاماتتاردىڭ قۇقىقتارى مەن مۇددەلەرىن قورعاۋ بويىنشا شارالار كەشەنى جۇرگىزىلدى. وسى زاڭنىڭ اياسىندا قابىلدانعان «مادەني مۇرا», «حالىق تاريح تولقىنىندا» مەملەكەتتىك باعدارلامالارى مەن «ارحيۆ-2025» كەشەندى جوسپارلارى شەڭبەرىندە شەتەلدىك ارحيۆتەر مەن مۋزەيلەردەن, عىلىمي ورتالىقتاردان جانە كىتاپحانالاردان قازاقستان تاريحىنا قاتىستى قۇندى قۇجاتتار اكەلىندى», دەدى مادەنيەت جانە اقپارات ۆيتسە-ءمينيسترى ارمان جۇدەباەۆ.
فورۋم اياسىندا ەلىمىزدەگى ارحيۆتەردىڭ دامۋ جانە قالىپتاسۋ تاريحى تۋرالى «ارحيۆ – ۇلتتىڭ تاريحي جادى» كورمەسى, ورتالىق مەملەكەتتىك كينو-فوتوقۇجاتتار مەن دىبىس جازبالارى ءارحيۆىنىڭ قازاق حالقىنىڭ الەۋمەتتىك-ساياسي تاريحى مەن مادەنيەتىنە ارنالعان «ارحيۆ قازىناسى – عاسىرلار كۋاسى» كورمەسى جانە استانانىڭ تاريحىنان سىر شەرتەتىن «شاھار شەجىرەسى» كورمەسى مەن فوتوالبومنىڭ تۇساۋكەسەرى ءوتتى.
جيىن بارىسىندا مەملەكەت جانە قوعام قايراتكەرلەرى, تاريحشى عالىمدار ارحيۆ ماماندارىمەن ارحيۆ سالاسىن دامىتۋ جانە جاڭعىرتۋ ماسەلەسىن تالقىلادى. ارحيۆ سالاسىنىڭ ارداگەرلەرىنە قۇرمەت كورسەتىلىپ, «ارحيۆ جانە بولاشاق ۇرپاق» اتتى رەسپۋبليكالىق جوبا اياسىندا استانا قالاسىنىڭ مەملەكەتتىك ءارحيۆى وتكىزگەن «جاس ارحيۆيست» كونكۋرسىنىڭ قاتىسۋشىلارى ماراپاتتالدى.
فورۋمدا ەلىمىزدىڭ الىس-جاقىن شەت مەملەكەتتەرمەن ارحيۆ سالاسىنداعى ىنتىماقتاستىقتى, بايلانىستاردى كەڭەيتۋ, بىرىككەن عىلىمي زەرتتەۋلەر جۇرگىزۋ ماسەلەلەرىمەن اينالىساتىن وتاندىق جانە شەتەلدىك عالىمداردىڭ عىلىمي-تەوريالىق جانە پراكتيكالىق تاجىريبەسىن جالپىلاۋ مەن جۇيەلەۋ بويىنشا وتىرىستار ۇيىمداستىرىلدى.
