aqorda_resmi
باسقارما توراعاسى الەۋمەتتىك مەديتسينالىق ساقتاندىرۋ جۇيەسىنىڭ جىل باسىنان بەرى جانە جالپى ءمامس قولعا الىنعان ۋاقىت ىشىندە اتقارىلعان جۇمىستاردىڭ قورىتىندىسى تۋرالى ەسەپ بەردى. الەۋمەتتىك مەديتسينالىق ساقتاندىرۋ جۇيەسىن ەنگىزۋ ناتيجەسىندە دەنساۋلىق ساقتاۋ سالاسىنا بولىنەتىن قارجى 2,5 ەسە, ال ءبىر تۇرعىننىڭ دەنساۋلىعىنا جۇمسالاتىن شىعىن ەكى ەسە وسكەنىن ايتتى.
ازاماتتارعا ارنالعان مەديتسينالىق كومەكتىڭ قولجەتىمدىلىگىن جاقسارتۋ جايىندا, ءمامس جۇيەسىنىڭ تيىمدىلىگىن ارتتىرۋعا قاتىستى, پرەزيدەنت تاپسىرمالارىنىڭ ورىندالۋ بارىسى تۋرالى باياندادى.
الەۋمەتتىك مەديتسينالىق ساقتاندىرۋ جۇيەسىنىڭ اۋقىمىن كەڭەيتۋگە, قوردىڭ قارجىلىق تۇرعىدان تۇراقتىلىعىن قامتاماسىز ەتۋگە جانە ءمامس-كە قاتىستى بارلىق پروتسەستى جەدەل تسيفرلاندىرۋعا باعىتتالعان كەشەندى شارالار جۇزەگە اسىرىلىپ جاتىر. بۇدان بولەك, مەديتسينالىق ساقتاندىرۋ جۇيەسىنىڭ قىزمەتىنە قاتىستى حالىقتى مازالاعان وزەكتى ماسەلەلەرگە نازار اۋدارىلدى. قور جوسپارىن ىسكە اسىرۋ بارىسىندا, ەڭ الدىمەن, ناۋقاسقا جانە ونىڭ مەديتسينالىق كومەككە قاجەتتىلىگىن وتەۋگە باسا ءمان بەرىلەدى. قاسىم-جومارت توقاەۆ ابىلقايىر سقاقوۆقا الەۋمەتتىك مەديتسينالىق ساقتاندىرۋ جۇيەسىنىڭ تيىمدىلىگىن ارتتىرۋعا باعىتتالعان بىرقاتار مىندەت جۇكتەدى.
