ءبىلىم ورداسىندا ەلىمىزدىڭ 9 وڭىرىنەن كەلگەن 300 ستۋدەنت وقىپ جاتىر. ولاردىڭ 35 پايىزى اۋىل مەكتەپتەرىنىڭ تۇلەگى, ال 42 پايىزى الەۋمەتتىك جاعدايى تومەن ساناتتاعى وتباسىلاردىڭ بالالارى.
بۇل فيليال مەملەكەت باسشىسىنىڭ جوعارى ءبىلىم بەرۋ جۇيەسىن قايتا قۇرۋ جونىندەگى تاپسىرماسىن ورىنداۋ ماقساتىندا قۇدايبەرگەن جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ بازاسىندا اشىلعان.
پرەزيدەنتكە بەرىلگەن مالىمەتكە سايكەس ەلەكتر ەنەرگەتيكاسى, مۇناي ينجەنەرياسى جانە ەنەرگەتيكالىق مەنەدجمەنت, كومپيۋتەرلىك ينجەنەريا ماماندىقتارى بويىنشا كادر دايارلاۋ ءىسى اعىلشىن تىلىندە جۇرگىزىلەدى.
مەملەكەت باسشىسىنا ستۋدەنتتەردىڭ Heriot-Watt ۋنيۆەرسيتەتىنىڭ مالايزياداعى, بىرىككەن اراب امىرلىكتەرىندەگى, شوتلاندياداعى فيليالدارىندا ءبىلىمىن جالعاستىرۋ مۇمكىندىگى بار ەكەنى جونىندە مالىمەت بەرىلدى. فيليال تۇلەكتەرى Heriot-Watt University مەن قۇدايبەرگەن جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ ديپلومدارىن بىرگە الادى.
عىلىمي جەتىستىكتەرگە ارنالعان كورمەنى ارالاۋ بارىسىندا پرەزيدەنتكە جوعارى وقۋ ورنى عالىمدارىنىڭ جاراتىلىستانۋ, تەحنيكالىق جانە گۋمانيتارلىق عىلىمدار سالاسىنداعى ازىرلەمەلەرى تانىستىرىلدى.
