zhumagulov_zhalgas
ۇزىن-ىرعاسى 15 جەكپە-جەك ۇيىمداستىرىلاتىن ايقاستا جالعاس جۇماعۇلوۆ تا ونەرىن كورسەتەدى. ول بۇعان دەيىن مما الەمىندەگى ەڭ تاڭداۋلى ۇيىم سانالاتىن ايگىلى UFC ورىسىندە سىنعا ءتۇستى, باسقا دا ايتۋلى پروموۋتەرلىك كومپانيالاردىڭ چەمپيوندىق بەلبەۋىن يەلەندى. جاپون ناكامۋراعا قارسى وكتاگونعا شىعاتىن جالعاستىڭ جەكپە-جەككە كەلىسىم بەرگەنى ءۇشىن الاتىن سىياقى سوماسى 30 ميلليون تەڭگە ەكەنى راس پا؟ Naiza tv يۋتۋب ارناسىنا سۇحبات بەرگەن ليگانىڭ ماتچمەيكەرى جانداربەك كيسيموۆ استانا تورىندە وتەتىن ايقاستا جالعاس جۇماعۇلوۆ جەڭىسكە جەتسە, قوماقتى سىياقىعا كەنەلەتىنىن ايتتى.
«جالعاستىڭ قارسىلاسى برازيليالىق ياگو ريبەيرو بولعان, بىراق ول كوزىنەن جاراقات الىپ, وتاعا ءتۇستى. دارىگەرلەر ۇزاق ۋاقىت فيزيكالىق كۇش تۇسىرۋگە رۇقسات بەرمەگەندىكتەن, كەلە المادى. ونىڭ ورنىنا جاپون ناكامۋرا دەگەن سپورتشىنى شاقىرتتىق. جالعاس جۇماعۇلوۆ Naiza-نىڭ تاريحىندا ازىرگە ەڭ كوپ سىياقى العان سپورتشى سانالىپ وتىر. جەكپە-جەككە كەلىسكەنى ءۇشىن الاتىن سىياقىسى بار, جەڭىسكە جەتسە تاعى دا بونۋس قوسىلادى. ارينە ول مما الەمىندە ەلىمىزدىڭ بايراعىن تالاي دودالارعا جەلبىرەتىپ, ابىرويىمىزدى اسىردى. سوندىقتان قوماقتى قاراجات الۋعا لايىقتى», دەدى جانداربەك كيسيموۆ.
بۇگىنگى دودانىڭ باستى جەكپە-جەگىندە دياس ەرەنعايىپوۆ جاپون رۋي فۋكۋداعا قارسى جەكپە-جەككە شىعىپ, چەمپيوندىق بەلبەۋىن قورعايدى.
