كونتسەرتتىك باعدارلامادا وتاندىق كومپوزيتورلاردىڭ ءار بۋىن وكىلدەرىنىڭ شىعارمالارى ۇسىنىلدى. اسىرەسە م.تولەباەۆتىڭ «قوزى كورپەش – بايان سۇلۋ» وپەراسىنان ءۇزىندى, سونداي-اق كومپوزيتوردىڭ «توس مەنى, توس», «كەستەلى ورامال» سەكىلدى تانىمال رومانستارى ورىندالدى. ا.جۇبانوۆ پەن ل.ءحاميديدىڭ «اباي» وپەراسىنان «ابايدىڭ» ارياسى, ءا.قازاقباەۆتىڭ «جامبىل جىراۋ» وپەراسىنان ء«سۇيىنبايدىڭ» تەرمەسى, ا.جايىموۆ پەن ا.جايىمنىڭ «بەيبارىس» وپەراسىنان «بەيبارىستىڭ» ارياسى, ا.ءمۇحيتديننىڭ ء«ال-فارابي» وپەراسىنان «گۇلدەر ءبيى» شىرقالدى. سونىمەن بىرگە ۆ.ستريگوتسكي-پاكتىڭ «كەنەسارى» سيمفونيالىق پوەماسى مەن ب.قىدىربەكتىڭ «رەكۆيەمى» جانە ب.دالدەنبايدىڭ «ەل باقىتى» اتتى ۆوكالدى-سيمفونيالىق وداسى تارتۋ ەتىلدى.
كلاسسيكالىق مۋزىكا اۋەلەگەن كەشتە «استانا وپەرانىڭ» تالانتتى سوليستەرى – قازاقستاننىڭ ەڭبەك سىڭىرگەن قايراتكەرلەرى ازامات جىلتىركوزوۆ, جانات شىبىقباەۆ, مەيىر باينەش, «قۇرمەت» وردەنىنىڭ يەگەرى ايزادا قاپونوۆا, حالىقارالىق بايقاۋلاردىڭ لاۋرەاتتارى گۇلجانات ساپاقوۆا, ءمادينا يسلاموۆا, بەيىمبەت تاڭارىقوۆ, رامزات بالاكيشيەۆ, ەرجان سايپوۆ, ارتۋر گابديەۆ, التىنبەك ءابىلدا, ايگەرىم امانجولوۆا, نارۇل تويكەنوۆ سەكىلدى ونەرپازدار ورىنداعان تۋىندىلار تىڭدارمانداردى ادەمى اسەرگە بولەدى. كونتسەرتكە ارنايى شاقىرىلعان سكريپكاشى ەركەبۇلان ساپارباەۆ پەن ۆوكاليست ديلناز ومارحانوۆانىڭ ونەرى دە كورەرمەندەردى ءتانتى ەتتى. اتالعان ونەر ورداسىنىڭ حورى مەن سيمفونيالىق وركەسترى ورىنداعان شىعارمالاردى جۇرتشىلىق وتە جىلى قابىلدادى. وركەسترگە قازاقستاننىڭ ەڭبەك سىڭىرگەن قايراتكەرى ابزال مۇحيتدين مەن رۋسلان بايمۋرزين ديريجەرلىك ەتتى.
ايتا كەتەيىك, ونەر كەشىندە ساحنادا ەكى بىردەي سۇيەكتى تۋىندى تانىستىرىلدى. ونىڭ ءبىرى – تالانتتى جاس كومپوزيتور ءالىبي ءابدىنۇروۆتىڭ وسى كونتسەرتكە جازعان وركەستر مەن سكريپكاعا ارنالعان مۋزىكالىق شىعارماسى بولسا, ەكىنشىسى – كومپوزيتور سەرىكجان ءابدىنۇروۆتىڭ «فاراب-وتىرار» ۆوكالدىق-سيمفونيالىق داستانى. ەكى شىعارما دا شىنايىلىعىمەن تىڭدارمانداردىڭ كوڭىلىنەن شىقتى.
