ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىندە وتكەن جاڭا ەڭبەكتىڭ تانىستىرىلىمىنا اۆتور قاتىستى. ءىس-شاراعا كەلگەن عالىمدار مەن زيالى قاۋىم وكىلدەرى, سونداي-اق ورازاق اعانىڭ قايراتكەرلىك جولىن ۇلگى تۇتاتىن تالاپكەر جاستار اۆتورعا كوكەيدەگى ساۋالدارىن قويىپ, جىلى جۇزدەسۋ رۋحاني سىرلاسۋ كەشىنە ۇلاستى.
ء«ار ادامنىڭ عۇمىرى – ءبىر كىتاپ. توقسان اسىپ تاعىلىمدى عۇمىر كەشتىم بە, تاۋقىمەتتى عۇمىر كەشتىم بە, ونىڭ باعاسىن كىتاپتى وقىعان سانالى وقىرمان بەرە جاتار. وسى جاسقا دەيىن قازاق عىلىمىنا توم-توم كىتاپتار قوستىم. ەڭبەكتەرىمدى ەل تانىپ, مۇحيت اسىپ, شەتەلدىڭ جاستارىنا دا پايداسى ءتيىپ جاتىر. كىتاپتىڭ اراسىندا وت قۇشىپ, ورتەنگەنى دە بار. بىراق ءومىردىڭ ەشقانداي قالتارىس-بۇلتارىسى مەنى سىندىرا العان جوق. سوندىقتان دا العاش رەت بار عۇمىرىمدى قاعاز بەتىنە ءتۇسىرىپ, ۇسىنىپ وتىرمىن», دەگەن اۆتور كەزەكتى كىتاپتا ءوز ءومىر جولىن سۋرەتتەگەن.
قازاق ەتنوسىنىڭ قاڭقا سۇيەكتەرىنە جارتى عاسىر بويى كەشەندى ءھام سالىستىرمالى زەرتتەۋ جۇرگىزە وتىرىپ, سول ارقىلى ادامنىڭ قان جۇيەسى, ءتىس مورفولوگياسى, ماي بۇرمەسى, ءتىپتى تەرى بەدەرىنە دەيىن انىقتاۋعا بولاتىنىن العا تارتىپ, قازاق حالقى وسى ولكەنى 50 عاسىر بويى مەكەن ەتكەندىگىن عىلىمي تۇرعىدان دالەلدەگەن عالىمنىڭ بۇعان دەيىن شىققان توم-توم كىتاپتارىنا عىلىمي ىزدەنىستەرى مەن زەرتتەۋلەرى ارقاۋ بولعان. ال بۇل جاڭا ەڭبەكتىڭ ەرەكشەلىگى – اۆتور ءوزىنىڭ تۇلعالىق قالىپتاسۋ جولىن, جان بالاسىنا اشپاعان سىرلارىن, كوڭىلدەگى الاڭىن وقىرمانعا جايىپ سالادى.
سونىمەن قاتار جاڭا جيناقتىڭ استاناداعى ۇلتتىق مۋزەيدە لەنتاسى قيىلىپ, تاعىلىمدى كىتاپ ەلوردالىق وقىرمانعا جول تارتتى. ءىس-شارادا سەناتور دارحان قىدىرالى عالىمنىڭ ونەگەلى جولى تۋرالى بايان ەتتى.
– اكادەميك ورازاق سماعۇلوۆ – تاريح عىلىمدارىنىڭ دوكتورى, پروفەسسور, وتاندىق انتروپولوگيا عىلىمىنىڭ اتاسى. ول – التايدان اتىراۋعا, الاتاۋدان قاراتاۋعا دەيىنگى ۇلى دالا بەسىگىندە ۇزدىكسىز ۇرپاق ءوربىتىپ, ءوسىپ-ونگەن قازاق اتاتەگىنىڭ ەلۋ عاسىرلىق شەجىرەسىن شەرتكەن جىلناماشى, قازاق حالقىنىڭ قولا داۋىردەن بۇگىنگە دەيىن كەڭ-بايتاق كيەلى اتاجۇرتىندا كىندىگى بەرىك بايلانىپ, ءناسىل-جۇراعاتىن ءوسىرىپ-ءوربىتىپ, ەل مەن جەرىنىڭ تامىرلاستىعى بىتە قايناسىپ, ءبىرتۇتاس قۇبىلىسقا اينالعانىن الەمدىك عىلىمنىڭ قازىرگى جەتىستىكتەرىمەن ورنەكتەپ ايعاقتاعان تاريحتىڭ تامىرشىسى, ساقتاردىڭ سارقىتى بولعان قازاق جۇرتى سان عاسىر ساپىرىلىسقان حالىقتاردىڭ ۇلى كوشىنە ارالاسىپ, التى الاش اتانىپ, ءوزىنىڭ اتاقونىس مەكەنىندە ەجەلدەن بەرى بىرەگەي پوپۋلياتسيا ءتۇزىپ, تەگى مەن ءتۇر-تۇلعاسى ءبىرتۇتاس ۇلتقا اينالعانىن دايەكتەگەن عۇلاما عالىم, توقساننىڭ تورىندەگى تارلانبوز تاريحشى, – دەدى ول.
«اشارشىلىقتان امان قالعان بالا», ء«مايىتحانادان باستالعان مانساپ», «قۋعىنداعى عالىم», «عىلىم ساحناسىنىڭ سىرتىندا», «تاۋەلسىزدىككە جەتكەن عالىم», «تىرەگىم بولعان وتباسىم» دەپ اتالعان التى بولىمنەن تۇراتىن كىتاپتا قانىش ساتباەۆ, الكەي مارعۇلان باستاعان حالقىمىزدىڭ ءبىرتۋار ۇلدارى تۋرالى جارقىن ەستەلىكتەر, اۆتوردىڭ كۇيىنىشى مەن ءسۇيىنىشىن سۋرەتتەگەن مولتەك سىرلار وقىرماندى تەرەڭ ويعا جەتەلەيدى. اۋىلدان الماتىعا اتتانعان ءسات, انتروپولوگياعا جاسالعان العاشقى قادامدار دا بايىپتى باياندالعان.
عىلىم جولىنا بار عۇمىرىن ارناعان تۇلعانىڭ تەپەرىشى مەن تاعىلىمى مول تاعدىرى تۋرالى تەرەڭ ويلارىن اۆتوردىڭ ءوز اۋزىنان جازىپ العان «AmalBooks» باسپاسىنىڭ جوبا جەتەكشىسى – ارايلى جاقسىلىق. كىتاپ «مەلومان» دۇكەندەرى ارقىلى ساتىلىمعا تۇسپەك.
