بەينەكونفەرەنتسيا بايلانىسى رەجىمىندە قازاقستان مەن وزبەكستان پرەمەر-مينيسترلەرىنىڭ ورىنباسارلارى سەرىك جۇمانعارين مەن جامشيد حودجاەۆتىڭ باسشىلىعىمەن تاراپتار مەملەكەت باسشىسىنىڭ 2022 جىلعى جەلتوقسانداعى وزبەكستانعا ساپارىنىڭ قورىتىندىسى بويىنشا قابىلدانعان قۇجاتتاردىڭ ورىندالۋىن قارادى.
اتاپ ايتقاندا, ينۆەستيتسيالىق كەلىسىمدەر مەن ساۋدا-ساتتىق كەلىسىم-شارتتارىن ىسكە اسىرۋ جونىندەگى جول كارتاسى اياسىندا 20 ينۆەستيتسيالىق جوبانى جانە 5 ساۋدا كەلىسىمشارتىن ورىنداۋ جوسپارلانعان.
كەڭەستە تاراپتار «ورتالىق ازيا» حالىقارالىق ونەركاسىپ كووپەراتسياسى ورتالىعىن قۇرۋ جوباسى بويىنشا جۇرگىزىلگەن جۇمىستار تۋرالى اقپارات بەردى. بۇگىنگى تاڭدا ۇيىمداستىرۋشىلىق-وكىمدىك قۇجاتتاردى قابىلداۋ راسىمدەرى اياقتالدى, 2023 جىلعى 9 قاراشادا تاشكەنت قالاسىندا كووپەراتسيا ورتالىعىنىڭ قىزمەتىن رەتتەۋ تۋرالى كەلىسىمگە قول قويىلدى. كەلەسى كەزەڭ جوبانىڭ تەن-ءىن ازىرلەۋگە قاتىستى ماسەلەلەردى قاراۋدى قامتيدى.
جۇمىس توبىنىڭ مۇشەلەرى ساۋدا-ساتتىقتاعى كەدەرگىلەردى جويۋ شارالارىن تالقىلادى. اتاپ ايتقاندا, قازاقستاندىق تاراپ وزبەكستانعا جەتكىزۋ جانە ءونىمنىڭ كەيبىر تۇرلەرىن ءوندىرۋ كەزىندە اكتسيزدىك سالىق مولشەرلەمەلەرىن بىرىزدەندىرۋ ۇدەرىسىن جەدەلدەتۋ قاجەتتىگىن اتاپ ءوتتى. قاتىسۋشىلار ناقتى ۇسىنىستار ازىرلەۋ ءۇشىن ارنايى جۇمىس توبىن قۇرۋعا كەلىستى.
قازاقستان مەن وزبەكستان وكىلدەرى ەركىن ساۋدا رەجىمىنىڭ ءتيىمدى جۇمىس ىستەۋى ءۇشىن ءتيىستى ەكىجاقتى قۇجاتقا قول قويۋ ارقىلى تاۋارلاردىڭ قاي ەلدە شىعارىلعانىن انىقتاۋدىڭ بىرىڭعاي ءتارتىبىن پايدالانۋ مۇمكىندىگىن زەردەلەۋگە كەلىستى.
سونىمەن قاتار تاراپتار جاڭا كولىك دالىزدەرىن قالىپتاستىرۋ, سونداي-اق ەكىجاقتى جانە ترانزيتتىك تاسىمالدار ءۇشىن قولايلى جاعداي جاساۋ ءۇشىن بىرلەسكەن جۇمىستى جالعاستىرۋعا نيەتتى.
سوڭىندا جۇمىس توبىنىڭ وتىرىسىندا ترانسشەكارالىق سۋ نىساندارىن بىرلەسىپ باسقارۋ جانە پايدالانۋ تۋرالى ۇكىمەتارالىق كەلىسىمنىڭ جوباسىن دايىنداۋ ماسەلەلەرى تالقىلاندى. 2023 جىلعى 19 جەلتوقساندا كەلىسىلمەگەن ماسەلەلەر بويىنشا ءوزارا ىڭعايلى شەشىمدەر قابىلداۋ ءۇشىن سالالىق مينيسترلەردىڭ كەلىسسوزدەرى وتەدى دەپ كۇتىلۋدە.
