ۇزاق قاشىقتىقتاعى بايگە مارافونى ماحامبەت اۋدانىندا ءوتتى. ونى وبلىستىق «بايگە» فەدەراتسياسى ۇيىمداستىردى. وبلىس اكىمدىگى مەن وبلىستىق دەنە شىنىقتىرۋ, سپورت جانە تۋريزم باسقارماسى قولداۋ كورسەتتى.
ۇلتتىق سپورت, اسىرەسە بايگە دەسە, ەلەڭ ەتپەيتىن, دەلەبەسى قوزبايتىن قازاق بار ما؟ بۇل بايگەدە 10 جۇلدە تىگىلدى. مارافونعا جۇيرىك قوسقانداردىڭ ءبارى دە ءبىرىنشى جۇلدەنى يەلەنۋدەن ءۇمىتتى بولدى. ويتكەنى ونىڭ سىياقىسى – 2 ميلليون تەڭگە. جۇيرىك باپتاعان اتبەگىلەر دە, بايگەنى تاماشالاۋعا جينالعان جۇرتشىلىق تا مارە سىزىعىنا وق بويى وزىپ كەلەر قىلقۇيرىقتى اسىعا كۇتتى. اسىرەسە ات يەلەرىنىڭ دەگبىرى قالمادى.
قىلقۇيرىقتى تۇلپارلاردىڭ الامانىندا قىزىلقوعا اۋدانىنىڭ ءۇش جۇيرىگى العاشقى ءۇش جۇلدەنى يەلەندى. مۇقىر اۋىلىندا تۇرعان تايجان قاريا كەزىندە تازى ۇستاپ, جولىن جالعار ۇرپاعىنىڭ جادىنا ۇلتتىق قۇندىلىقتاردى مولىنان سىڭىرگەن. ۇلاعاتتى قاريانىڭ ءتالىمىن العان نەمەرەلەرى قوسقان «نۇرتوبەل» جۇيرىگى 90 شاقىرىمدىق بايگەدەن مارەگە ءبىرىنشى بولىپ جەتتى. جەلدەي ەسكەن جۇيرىكتى اتبەگى الەكە بولتەكوۆ باپتاعان. شاباندوزى – باقىتجان جەتكىزگەن. جەڭىمپاز جۇيرىكتىڭ يەسىنە 2 ميلليون تەڭگە بەرىلدى.
ەكىنشى جۇلدەنىڭ 1 ميلليون تەڭگەسىنە ميالى اۋىلىنىڭ تۇرعىنى قايىربەك بايمۇراتوۆتىڭ «ايتۇمار» جۇيرىگى يەلەندى. ات يەسى اۋىزدىعىمەن الىسقان بۇل جۇيرىكتى باپتاۋ ءۇشىن اتبەگى الەكە بولتەكوۆتى, شاباندوزدىققا يسا جاڭعابىلدى تاڭداپتى.
مارە سىزىعىن ءۇشىنشى قيعان «كۇنقاسقا» تۇلپارىن تايسويعان اۋىلىنىڭ تۇرعىنى ەسەنعابىل قوساەۆ قوستى. «كۇنقاسقانىڭ» شاباندوزى دوسجان دوسقالي 800 مىڭ تەڭگەگە يە بولدى.
بۇدان كەيىن كەلگەن جۇيرىكتەردىڭ يەلەرى دە جۇلدەسىز قالمادى. ماسەلەن, ءتورتىنشى ورىنعا – 700 مىڭ, بەسىنشىگە – 600 مىڭ, التىنشىعا – 500 مىڭ, جەتىنشىگە – 400 مىڭ, سەگىزىنشىگە – 300 مىڭ, توعىزىنشىعا – 200 مىڭ, ال 10-ورىن يەگەرىنە 100 مىڭ تەڭگە بەرىلدى.
اتىراۋ وبلىسى
