40 جاستاعى تورەجان ماقاشەۆكە سول كۇنى جوسپارلى وتا جاساۋ كەرەك ەدى. الايدا مەدبيكە تامىر ارقىلى تسەفترياكسون ءدارىسىن سالىپ, ناۋقاس سودان كەيىن كوز جۇمعان.
وبلىستىق كلينيكالىق اۋرۋحانا انافيلاكتيكالىق شوكتان جوسپارلى ەم الۋ كەزىندە ناۋقاس كوز جۇمعانىن راستاپ وتىر.
«ناۋقاسقا وپەراتسيا كەزىندە ىقتيمال اسقىنۋلاردى بولدىرماۋ ءۇشىن پروفيلاكتيكالىق ماقساتتا «تسەفترياكسون» پرەپاراتى تاعايىندالدى. ناۋقاستىڭ «تسەفترياكسون» پرەپاراتىنا اللەرگياسى بار ەكەندىگى تۋرالى ايتىلعانىن ەسكەرە وتىرىپ, كلينيكا دارىگەرلەرى اللەرگولوگيالىق جانە يممۋنولوگيالىق كومەك كورسەتۋ ستاندارتىنىڭ تالاپتارىنا سايكەس ونى ەنگىزەر الدىندا تەرىىشىلىك اللەرگيالىق سىناق تاعايىندادى, ول تەرىس ناتيجە كورسەتتى. ناۋقاستىڭ امبۋلاتوريالىق كارتاسىندا اللەرگيالىق رەاكتسيانىڭ بولۋى تۋرالى دەرەكتەر بولعان جوق. رەانيماتسيا دارىگەرلەرىنىڭ بارلىق كۇش-جىگەرىنە قاراماستان, ناۋقاس قايتىس بولدى. وبلىستىق كلينيكالىق اۋرۋحانانىڭ دەنساۋلىق ساقتاۋ سالاسىنداعى نقا تالاپتارىنا سايكەس دارىلىك پرەپاراتتى قولدانۋدىڭ جاعىمسىز سالدارى تۋرالى ۇلتتىق دارىلىك زاتتار مەن مەديتسينالىق بۇيىمداردى ساراپتاۋ ورتالىعىنا حابارلاما, مەديتسينالىق جانە فارماتسەۆتيكالىق باقىلاۋ دەپارتامەنتىنە جوسپارلى ەمدەۋگە جاتقىزۋ كەزىندە ءولىم تۋرالى شۇعىل حابارلاما جىبەرىلدى», دەپ ءتۇسىندىردى قاراعاندى وبلىستىق كلينيكالىق اۋرۋحاناسى ۇجىمى.
وقيعاعا بايلانىستى قىلمىستىق ءىس قوزعالدى. قازىرگى ۋاقىتتا قاراعاندى وبلىسى بويىنشا مەديتسينالىق جانە فارماتسەۆتيكالىق قىزمەت ساپاسىن باقىلاۋ كوميتەتى جوسپاردان تىس تەكسەرۋ جۇرگىزىپ جاتىر.
تەكسەرۋ ناتيجەلەرى بويىنشا ءتيىستى شارالار قابىلدانباق.
