سۋرەتتى تۇسىرگەن – جانگەلدى ابدىعالىم
وبلىس اكىمىنىڭ حالىقپەن بۇل كەزدەسۋى جاڭا فورماتتا ءوتتى. «Arlan» ورتالىعىنىڭ ءبىرىنشى قاباتىندا ۇستەلدەر قويىلىپ, اكىممەن ءبىر مەزگىلدە باسقارمالار, دەپارتامەنتتەر مەن كوممۋنالدىق قىزمەتتەردىڭ باسشىلارى تۇرعىنداردىڭ سۇراقتارىنا جاۋاپ بەردى. قابىلداۋ ء«بىر تەرەزە» قاعيداتى بويىنشا جانە ەلەكتروندى كەزەك تارتىبىمەن ءوتتى. كەزدەسۋگە كەلگەن حالىققا قولايلى بولۋ ءۇشىن بارلىق جاعداي جاسالعان. ماسەلەن, وسى 6,5 ساعات بارىسىندا جەدەل جاردەم قىزمەتكەرلەرى دە تىرپ ەتكەن جوق. بۇعان قوسا بالامەن كەلگەندەردىڭ جاعدايى دا قاراستىرىلعان. ول ءۇشىن ارنايى ويىن الاڭى جابدىقتالىپ, اتا-اناسى قابىلداۋدا بولعاندا بالالارى ەمىن-ەركىن ويناپ, ۋاقىتىن وتكىزدى.
قاراعاندى قالالىق ءماسليحاتىنىڭ دەپۋتاتى, وبلىس اكىمىنىڭ مۇگەدەكتىگى بار ادامدار ماسەلەلەرى جونىندەگى شتاتتان تىس كەڭەسشىسى نياز سۇندەتاليەۆ تە كەزدەسۋدە بولدى. بۇل جولى ول بيلىككە بازىنالارىن ايتا كەلگەن ەرەكشە قاجەتتىلىكتەرى بار تۇرعىندارعا كەڭەس بەرۋگە كەلىپتى. ول مۇنداي كەزدەسۋلەر حالىقتىڭ شەنەۋنىكتەرمەن بەتپە-بەت كەزدەسىپ, ءتۇرلى سۇراقتارعا جاۋاپ الۋعا مۇمكىندىك بەرەتىنىن ايتادى.
– ءوڭىر باسشىسى مۇگەدەك ادامدار مەن ەرەكشە قاجەتتىلىكتەرى بار بالالاردىڭ ماسەلەسىن جەكە باقىلاۋىندا ۇستايدى. قاراعاندىدا Ten Qogam مۇگەدەكتىگى بار ادامداردى الەۋمەتتىك بەيىمدەۋ ورتالىعى جۇمىس ىستەيدى. سۇراقتاردىڭ ءبىر بولىگىن ورتالىق ارقىلى شەشە الساق, وندا قىزمەتكەرلەر جەدەل كومەك كورسەتەدى. ال ەگەر باسقارمالاردىڭ قۇزىرەتىندە بولسا, ءبىز ولاردىڭ وكىلدەرىمەن كەزدەستىرەمىز. دەسە دە, رەسپۋبليكالىق دەڭگەيدە شەشىلۋگە ءتيىس ماسەلەلەر دە بار. وندايدا جوعارى ورگاندارعا جۇگىنەمىز, – دەيدى ن.سۇندەتاليەۆ.
قابىلداۋ كەزىندە بىرقاتار باسقارما باسشىلارىنا جۇگىنگەندەر بولماسا, ەندى بىرىنە اجەپتاۋىر كەزەك پايدا بولدى. سونىڭ ءبىرى – وبلىستىڭ پوليتسيا دەپارتامەنتى باستىعىنىڭ ءبىرىنشى ورىنباسارى قۇرمانعالي ىسماعۇلوۆقا كەلۋشىلەر. ءار ادامدى مۇقيات تىڭداپ, ماسەلەسىن شەشۋگە تىرىستى پوليتسيا پولكوۆنيگى.
– بىرقاتار سۇراقتى دەر كەزىندە شەشۋ مۇمكىن بولسا, ەندى بىرىنە ۋاقىت كەرەك. ال قانداي دا ءبىر ءىس-شارالار اتقارۋ نەمەسە ءبولىنىس ماماندارى كەرەك بولسا, مەن قول استىمداعى قىزمەتكەرلەرمەن بەينەبايلانىسقا شىعىپ, كەزدەسەتىن ۋاقىتتى بەلگىلەپ, اتقارىلۋعا ءتيىس ءىس-شارالاردى ناقتىلايمىز, – دەيدى ق.ىسماعۇلوۆ.
قازىبەك بي جانە ءاليحان بوكەيحان اتىنداعى اۋدان اكىمدەرىنە دە حالىق كوپتەپ كەلدى. تۇرعىندار اۋلانى اباتتاندىرۋ, بالالاردىڭ ويىن الاڭدارى, ۇيلەردىڭ شاتىرى, سۋ, جارىق ماسەلەلەرىمەن كەلىپتى.
وبلىس ورتالىعىنداعى ەڭ ۇلكەن اۋدانداردىڭ ءبىرى ءاليحان بوكەيحان اتىنداعى اۋدان اكىمى دوسبول كۇلەكەەۆ تە كەلۋشىلەردىڭ سۇراقتارىن مۇقيات تىڭداپ, ارقايسىسىنا بايىپپەن جاۋاپ بەردى.
– كەلۋشىلەردىڭ ماسەلەلەرىن جازىپ الىپ, قايسىبىرىن دەرەۋ رەتتەپ جاتىرمىز. ماسەلەن, ەسىك الدىندا قۋراعان اعاشتار كوپ دەپ كەلگەندەر بار. جازدا مەردىگەرلەردىڭ بولماۋىنا بايلانىستى جۇمىستاردى ىستەي الماساق تا, قازىر اتقارىپ جاتىرمىز. مەردىگەرمەن وسى جەردە بايلانىسقا شىعىپ, كەلۋشىلەردىڭ سۇراقتارىنا ولاردىڭ وزدەرى جاۋاپ بەردى, – دەيدى د.باتىربەك ۇلى.
ء«بىر جىلدا بارىنە ۇلگەرۋ مۇمكىن ەمەس» دەگەن اكىم كەزدەسۋگە شاعىممەن ەمەس, العىسپەن كەلگەندەردىڭ بار ەكەنىن دە ايتادى.
– بيىل پريشاحتينسك قالاسىندا اۋەزوۆ كوشەسىنىڭ جولىن جوندەپ, جارىقتاندىرۋ ماسەلەسىن شەشىپ بەرگەن ەدىك. سول ءۇشىن حالىق ءدان ريزا. كەزدەسۋگە ارنايى كەلىپ, راحمەتىن ايتىپ كەتىپ جاتىر. بۇل – ءبىر عانا مىسال. پرەزيدەنت قاسىم-جومارت توقاەۆ ايتقانداي, حالىقتىڭ جەرگىلىكتى ماسەلەسى تولىعىمەن شەشىلۋگە ءتيىس. ماسەلەن, جول, جاياۋ جۇرگىنشىلەر جولى, كولىك قاتىناسى سياقتى ماسەلەلەردى وڭ شەشۋگە بولادى. جۇمىسىمىزدى ءارى قاراي جالعاستىرا بەرەمىز, – دەدى د.باتىربەك ۇلى.
جىل باسىنان ەرماعانبەت بولەكپاەۆ ءوڭىردىڭ قالالارى مەن اۋدان تۇرعىندارىمەن وتكىزگەن 25 كەزدەسۋدە 8 مىڭعا جۋىق ادامدى قابىلداعان. ءدال وسى كەزدەسۋلەردە 800-دەن اسا سۇراق قويىلىپتى. ءبىرى سول جەردە شەشىلسە, دەنى ۇزاقمەرزىمدى بولعاندىقتان, وبلىستىق بيۋدجەتتى قاراستىرۋ كەزىندە ەسكەرىلمەك.
– جىل بويعى حالىقپەن كەزدەسۋدى قاراعاندى قالاسىمەن اياقتاپ وتىرمىز. بۇعان دەيىن ارىپتەستەرىممەن بىرگە جەرگىلىكتى جەرلەردە حالىقپەن كەزدەستىك. كوتەرىلگەن ماسەلەلەردىڭ باسىم بولىگى تۇرعىن-ءۇي كوممۋنالدىق شارۋاشىلىعى, ءۇي ماسەلەسى, ءبىلىم سالاسى جانە تاعى باسقالارىن قامتىدى. سۇراقتاردىڭ سول جەردە شەشىلگەندەرى دە بار. ال ۋاقىت جانە قاراجاتتى قاجەت ەتەتىندەرى وبلىستىق بيۋدجەتتى قاراستىرۋ كەزىندە ەسكەرىلەدى, – دەدى ە.قابدۋلا ۇلى.
كەزدەسۋدە كوتەرىلگەن بارلىق ماسەلە جۇيەلەنىپ, جەرگىلىكتى اتقارۋشى ورگانداردىڭ, سونداي-اق جاۋاپتى سالالاردىڭ باقىلاۋىندا بولادى. ماسەلەن, پريشاحتينسك قالاسى تۇرعىندارىمەن كەزدەسۋدە كوتەرىلگەن ماسەلەلەر.
– جىل باسىندا پريشاحتينسك تۇرعىندارىمەن كەزدەستىم. ولار ءۇشىن ەڭ ماڭىزدىسى كولىك قاتىناسى ەكەن. جاڭا اۆتوپارك جۇمىسىن ەندى باستاعان قيىن كەزەڭ بولاتىن. قازىر جۇمىس جولعا قويىلدى. اۆتوپارك بىردەن 50-گە جۋىق جاڭا اۆتوبۋس ساتىپ الدى. ودان بولەك, بالالار ورتالىعىنىڭ قۇرىلىسىن باستادىق. ءدال وسىنداي نىساندى مايقۇدىقتا دا سالامىز. وسى قارقىنمەن جۇمىس جالعاسسا, كەلەر جىلى كوكتەمدە قۇرىلىسى اياقتالىپ تا قالادى. سونداي-اق بالاباقشادا ورىن تاپشىلىعى دا شەشىمىن تابادى. جەر تەلىمى انىقتالىپ, قۇرىلىستى جوسپارلاپ قويدىق, – دەدى وبلىس باسشىسى.
ايماق باسشىسى ايتقان تاعى ءبىر وزەكتى ماسەلە – شاحتەر كەنتىنىڭ ورتالىق جىلىتۋ جۇيەسىنە قوسىلۋى. 30 جىلدان اسا ءبىر رەتكە كەلمەگەن بۇل جايت تا جۋىردا شەشىمىن تابادى.
– ورامىشىندەگى جەلىلەردى رەتتەدىك, قوسۋعا دايىنبىز. ەندى تۇرعىندارمەن بىرگە ءۇي اراسىنداعى جەلىلەردى جوندەۋ جانە قالپىنا كەلتىرۋ ماسەلەسى قالدى. قازىر قاراعاندى اكىمدىگى ءتيىستى جۇمىستاردى جۇرگىزىپ جاتىر. شاحان كەنتىندەگى ءتارىزدى تۇرعىن-ءۇي كوممۋنالدىق شارۋاشىلىعى ورتالىعى ارقىلى پايىزسىز نەسيە بەرىپ, 50-دەن اسا ءۇيدى ورتالىق جىلۋ جەلىسىنە قوسۋعا تىرىسامىز, – دەدى ە.بولەكپاەۆ.
6,5 ساعاتقا سوزىلعان كەزدەسۋ وسىنداي سيپات الدى. قىسقاسى, بيلىك بۇقارا بۇيىمتايىن بەتپە-بەت تىڭدادى, ەندى ماسەلەلەر شەشىمىن تابادى.
قاراعاندى وبلىسى
