مادەنيەت وشاعى قالا تۇرعىندارى مەن قوناقتارىن الەمنىڭ اسەمدىگىن پاش ەتەتىن اسەرلى فوتوسۋرەتتەرمەن تانىستىردى. تايماس نۇرتاەۆ جەر شارىنىڭ تۇكپىر-تۇكپىرىن ارالاپ, ۇمىتىلماس ساياحاتتاردىڭ جارقىن ەستەلىكتەرىن تاريحقا تاسپالاعان. سۋرەتشىنىڭ گالەرەياسىندا ساحارا ءشولى, الەمدەگى ەڭ ەرەكشە ارالداردىڭ ءبىرى – گرەنلانديا, تاريحى تەرەڭ يتاليا, يسلانديانىڭ «مۇز ەلى» ايرىقشا كورىنىس تاپقان.
فوتوگەر قىتايعا ساپارى بارىسىندا تۇسىرگەن تسزيۋچجايگوۋ ۇلتتىق ساياباعىنىڭ, حۋانلۋنگ كوگىلدىر كولدەرىنىڭ كوركەم پەيزاجدارىنىڭ ورتاسىندا اعىپ جاتقان جاسىل-سارى لي وزەنى, اۆاتار تاۋلارىنىڭ فوتوسۋرەتتەرى كورەرمەندى بىردەن باۋرايدى.
ول 2017 جىلى شپيتسبەرگەن ارالىنان سولتۇستىك ەندىكتەرگە ساپارى ناتيجەسىندە, وسى ارالدىڭ تاڭعاجايىپ جانە ەرەكشە تابيعاتى مەن جانۋارلار الەمىن سۋرەتكە تۇسىرگەن. ونىڭ وبەكتيۆىنە ىلىنگەن اق ايۋلار, يتبالىقتار, مورجدار مەن كيتتەر جانۋارلار الەمىنە قىزىعۋشىلاردىڭ نازارىن اۋداردى. فوتوسۋرەتتەردەگى ارگەنتينا مەن برازيليانىڭ كوركەم تابيعاتى, گاۋچو شاباندوزدارى, تورەس-دەل-پاين ۇلتتىق پاركى, گرەي كولى جانە پاين ءماسسيۆى تارتىمدىلىعىمەن باۋرايدى.
كورمەنىڭ ەرەكشە بولىگىن ەلىمىزدىڭ كوركەم تابيعاتىن بەدەرلەگەن «قازاقستان تابيعاتىنىڭ مارجاندارى» اتتى فوتوجۇمىستار قۇرايدى. وندا اۆتور, تۋعان ولكەسى مەن ىلە الاتاۋىنىڭ اسەم جەرلەرىن, الماتى مەن الماتى وبلىسى اۋماعىن, كولساي, ءحانتاڭىرى, شارىن كولى مەن شارىن شاتقالى, «التىنەمەل» ۇلتتىق قورىعى, «باياناۋىل» ۇلتتىق ساياباعى, جاسىباي, مارقاكول, بۋراباي, زايسان, قايىڭدى, ۇلكەن الماتى وزەنى, بۇقتىرما سۋقويماسى, كاسپي تەڭىزى, ايعايقۇم, ماڭعىشلاق, ءۇستىرت شاتقالى, ۇشقوڭىر جايلاۋى, اقكەرگەشىن, اقتولاعاي قىرقاسى ت.ب. تۇسىرگەن فوتوجۇمىستارىن ۇسىنعان.
تايماس نۇرتاەۆ بىشكەك قالاسىندا دۇنيەگە كەلگەن, 60-جىلداردىڭ اياعىنان باستاپ الماتى قالاسىنىڭ تۇرعىنى. نەگىزگى ماماندىعى قۇرىلىسشى بولعانىمەن, فوتوونەرگە دەگەن سۇيىسپەنشىلىك ونىڭ ەكىنشى ماماندىعىنا اينالعان.
الماتى
