ستاتيستيكالىق مالىمەتكە سۇيەنسەك, ەلىمىزدە 30 جىل ىشىندە جول-كولىك اپاتىنان 83 مىڭنان استام ادام قازا تاپقان. كەيىنگى ءۇش جىلدا قازاقستان جولدارىنداعى جول-كولىك وقيعالارى جىل سايىن 6 پايىزعا ءوسىپ كەلەدى. ساراپشىلاردىڭ ايتۋىنشا, مۇنداي اپاتتاردىڭ 87 پايىزعا جۋىعى جۇرگىزۋشىلەردىڭ كىناسىنەن بولادى.
جول-كولىك اپاتى دەپۋتاتتاردىڭ دا نازارىندا. ءماجىلىستىڭ كەيىنگى بىرنەشە وتىرىسىندا وسى ماسەلەگە قاتىستى دەپۋتاتتىق ساۋال جولداندى. ماسەلەن ەربولات ساۋرىقوۆتىڭ كەلتىرگەن دەرەكتەرىنە ساي, 2023 جىلدىڭ ون ايىندا ەلىمىزدە 11مىڭ 618 جول كولىك وقيعاسى بولعان. سالدارىنان 1942 ادامنىڭ ءومىرى قيىلعان. جان تاپسىرعان جاسوسپىرىمدەر مەن بالالار سانى دا از ەمەس. ال ءارتۇرلى دەڭگەيدەگى دەنە جاراقاتىمەن تۇسكەندەردىڭ سانى 14 مىڭ 456 ادامدى قۇراپ وتىر.
ال دەپۋتات ناۋرىز سايلاۋباي بۇعان جۇرگىزۋشىلەردى دايارلاۋ دەڭگەيىنىڭ تومەندىگى, قاراپايىم جول قوزعالىسى ەرەجەلەرىن بىلمەۋ جانە جۇرگىزۋشى كۋالىگىن الۋ ورىندارىنداعى سىبايلاس جەمقورلىق سەبەپ بولىپ وتىرعانىن العا تارتادى.
«بىرنەشە رەت ەمتيحان تاپسىرا الماعان ازاماتتار امال جوقتان ماسەلەنى جەڭىل شەشۋدىڭ جولدارىن ىزدەيدى. زاڭدى اينالىپ وتۋگە تىرىسادى. البەتتە مۇنىڭ سالدارى سىبايلاس جەمقورلىققا الىپ كەلەدى. كولىك جۇرگىزۋ كۋالىگىن الۋ قيىنداپ كەتكەنى دە حالىق اراسىندا نارازىلىق تۋعىزىپ وتىر. بيىل ىشكى ىستەر ءمينيسترىنىڭ 20 شىلدەدەگى بۇيرىعىمەن جۇرگىزۋشى كۋالىكتەرىن بەرۋ قاعيدالارىنا وزگەرىستەر ەنگىزىلگەنىمەن, سىبايلاس جەمقورلىق دەرەگىن ازايتۋ ماسەلەسى ءالى شەشىم تاپپاعانىن كورىپ وتىرمىز», دەيدى ن.سايلاۋباي.
