وسى باعىتتا شاحتينسك شاھارىندا جىل باسىنان بەرى 59 مۇمكىندىگى شەكتەۋلى ادام جۇمىسقا ورنالاسقان. ولار ءۇشىن ارنايى جۇمىس ورىندارى قۇرىلسا, جۇمىس بەرۋشىلەر مەملەكەتتەن سۋبسيديا الادى. شاحتينسك قالالىق «مانساپ» ورتالىعىنىڭ جەتەكشىسى رۇستەم ماناپوۆ ەڭبەك جانە حالىقتى الەۋمەتتىك قورعاۋ مينيسترلىگى جۇمىس ورىندارىن قۇرۋعا ارنالعان شىعىنداردى سۋبسيديالاۋدى ەنگىزگەنىن جانە ورتالىققا جىل باسىنان بەرى 63 مۇگەدەكتىگى بار ادام جۇگىنگەنىن ايتادى.
«ولاردىڭ 59-ىن جۇمىسقا ورنالاستىردىق. جۇمىس بەرۋشىلەردى مۇگەدەك ادامداردى جۇمىسقا ورنالاستىرۋعا قىزىقتىرۋ ءۇشىن ەڭبەك جانە حالىقتى الەۋمەتتىك قورعاۋ مينيسترلىگى جۇمىس ورىندارىن قۇرۋعا ارنالعان شىعىنداردى سۋبسيديالاۋدى ەنگىزدى. ياعني كومپانيا باسشىسى جۇمىس كەڭىستىگىن ۇيىمداستىرادى, ال مەملەكەت 300 اەك-كە دەيىنگى شىعىنداردى وتەيدى. بۇعان قوسا وسى جىلدان باستاپ جۇمىس بەرۋشىلەرگە مۇگەدەكتىگى بار ادامداردىڭ جالاقىسىن سۋبسيديالاۋ باستالدى. جۇمىس ىستەگەن ءبىرىنشى جىلى مەملەكەت – 70%, ەكىنشى جىلى – 65% جانە ءۇشىنشى جىلى جالاقى مولشەرىنىڭ 60%-ىن سۋبسيديالايدى», دەيدى.
شاحتينسك قالاسىندا ءوز كاسىبىن دوڭگەلەتىپ وتىرعان «ايزەرە» امبەباپ تىگىن كاسىپورنى 2017 جىلى اشىلعان. سول كەزدە بەس اداممەن جۇمىس باستاپتى. تىگىن تسەحىنىڭ بۇگىندە جۇمىسى جەتىلىپ, بەس جىل ىشىندە 20 شاقتى شەبەردى جۇمىسپەن قامتىپ وتىر.
تسەح پوليتسيا قىزمەتكەرلەرىنە, دارىگەرلەرگە جانە باسقا دا تاپسىرىس بويىنشا كيىم تىگەدى. «مانساپ» ورتالىعىنىڭ ۇسىنىسىمەن تاعى ءتورت ادامدى جۇمىسقا قابىلداعان. بىرەۋى – «الەۋمەتتىك جۇمىس ورنىنا», ۇشەۋى «كۇمىس جاس» جوباسى بويىنشا جۇمىسقا ورنالاستىرعان. جۇمىسكەرلەردىڭ جالاقىسى مەملەكەت ەسەبىنەن سۋبسيديالانادى. «بىزدە تۇراقتى ءوندىرىس بار, تاپسىرىس جەتكىلىكتى. مەن تاعى 10 ادامدى قابىلداۋعا دايىنمىن», دەيدى تسەح باسشىسى ق.ساۋحانوۆا.
سۆەتلانا ريابتسەۆا – «مانساپ» ورتالىعىنا جۇگىنگەندەردىڭ ءبىرى. ەكى ايدان بەرى وسى تسەحتا جۇمىس ىستەيدى.
«جاسىم 52-دە, تىگىنشىمىن. قۇلاعىمنىڭ مۇكىسى بار. بۇرىن ءبىز الماتىدا تۇردىق, سول جەردە مەنىڭ كىشكەنتاي اتەلەم بولدى. بىرنەشە جىل بۇرىن وتباسىممەن دولينكاعا كوشىپ كەلدىك, ءبىر جىلدان اسا ۋاقىت جۇمىس تابا المادىم. ماعان «مانساپ» ورتالىعىنا جۇگىنۋگە كەڭەس بەردى, سول جەردەن ماعان جۇمىس تابىلدى. تسەحتا ماعان ءبارى ۇنايدى, ۇجىم وتە جاقسى», دەيدى س.ريابتسەۆا.
تسەح باسشىسى ق.ساۋحانوۆا بولسا, سۆەتلانانىڭ جۇمىسقا دەگەن ىنتاسىنىڭ جوعارى ەكەنىنە ريزا.
«سۆەتلانانى جۇمىسقا الۋدى ماعان «مانساپ» ورتالىعى ۇسىندى. ول بىزدە ەكىنشى اي جۇمىس ىستەيدى, ءوزىن جاقسى مامان رەتىندە كورسەتتى. تىگىنشىلىك قابىلەتى زور», دەيدى ق.ساۋحانوۆا.
تسەح يەسى مۇگەدەكتىگى بار ادامدارعا قولايلى جاعداي جاساۋ ءۇشىن ەكى ينفراقىزىل بولىكتەن جانە برايل شريفتىندەگى اقپاراتتىق كورسەتكىشتەن تۇراتىن ارنايى جارىق شامشىراعىن ساتىپ الىپتى. بۇل ەرەكشە قىزمەتكەرلەر ءۇشىن نۇسقاۋلىق رەتىندە قىزمەت ەتەدى. مەملەكەت جارىق شامدارىن ساتىپ الۋ شىعىندارىن وتەپ بەردى. بۇل دا بولسا كاسىپورىن ءۇشىن ۇلكەن قولداۋ.
قاراعاندى وبلىسى,
شاحتينسك قالاسى
