مامانداردىڭ ايتۋىنشا, بىرقازاندار توبىل وڭىرىنەن قىركۇيەكتە ۇشىپ كەتەدى ەكەن. «ال مىنا قۇس ابدەن السىرەپ قالعان بولسا كەرەك. قاناتتىلارعا وركەنيەت دامۋى دا كەرى اسەر ەتەدى. بۇگىندە ادامزات بالاسى قۇستار الەمىن دە جاۋلاپ الىپ جاتىر دەسەك بولادى. اقيقاتىن ايتساق, ولار ءبىزدىڭ جەرگە كىرىپ جاتقان جوق, الىمساقتان بەرى وزدەرى باۋىر باسقان ىستىق مەكەنىنە كەلىپ قونادى. بۇل – سولاردىڭ جەرى», دەيدى ارىستان.
قورىقشىنىڭ ايتۋىنشا, بىرقازان الدەنەمەن اۋىرىپ نەمەسە جارالانىپ قالعان بولۋى كەرەك. ونىڭ ۇستىنە, ءىرى قۇس شەكتەن تىس ماي جيناپ, سەمىرىپ السا دا, ۇزاق جولعا ۇشۋعا جاراماي قالادى ەكەن. مۇنىڭ ناقتى سەبەبىن الداعى ۋاقىتتا ماماندار انىقتايتىن بولادى.
بىرقازان – نەگىزىنەن بالىقتى قورەك ەتەتىن قۇس. تاۋلىگىنە ءبىر كيلوعا دەيىن بالىق جەيدى دەگەن دەرەك بار. سوندىقتان ەرىكتى جاستار دا قورىقشىنىڭ ءبىر جاعىنا شىعىپ, قوستانايدان بالىق ساتىپ الىپ جىبەرىپ جاتىر.
قازىر بىرقازان ارىستاننىڭ ەسكى دە بولسا, جىلى اسۇيىندە قاماۋلى تۇر. «بۇل ءىرى قۇس قوي. سوندىقتان ءارى-بەرى ەركىن جۇرەتىن كەڭ ءارى جايلى ورىن بولسا, قاناتى تەز قاتايادى. الماتىدا سونداي ورىندار بار ەكەن. جاقىن جەردەن جىلى ۆولەرى, جاعدايى بار ادامدار حابارلاسىپ قالا ما دەگەن ءۇمىت تە جوق ەمەس. ەڭ باستىسى, قۇسقا كوكتەمگە دەيىن قامقورلىق كەرەك. كومەكتەسەتىن ەشكىم تابىلماسا, ەبىن تاۋىپ, جاعدايىن جاساپ, جىلى كۇنگە ءوزىم-اق جەتكىزەرمىن», دەيدى قورىقشى.
قوستاناي وبلىسى
