فوتو: primeminister.kz
«جەلىنىڭ وتكىزۋ قابىلەتىن ارتتىرۋ جانە قازاقستاننىڭ باتىس ايماعىنداعى تۇتىنۋشىلاردى تۇراقتى ەنەرگيا قۋاتىمەن قامتاماسىز ەتۋ ماقساتىندا «KEGOC» اق «باتىس قازاقستان ەنەرگەتيكالىق تورابى – اتىراۋ – ماڭعىستاۋ» باعىتى بويىنشا جالپى ۇزىندىعى 780 شاقىرىمعا جۋىق 220 كۆ بەس ەلەكتر بەرۋ جەلىسىن سالدى. جۇمىس بارىسىندا 4,2 مىڭنان استام ەلەكتر باعانالارى ورناتىلىپ, «ۋرالسكايا», «پراۆوبەرەجنايا», «يندەر», «قۇلسارى», «تەڭىز» قوسالقى ستانتسيالارىن كەڭەيتۋ قامتاماسىز ەتىلدى, سونداي-اق «قاراباتان» جاڭا تاراتۋشى قوسالقى ستانتسياسى ىسكە قوسىلدى.
جوبانى ىسكە اسىرۋ ناتيجەسىندە ەلەكتر جەلىسىنىڭ قۋاتتىلىعى ايتارلىقتاي ۇلعايتىلدى: «باتىس قازاقستان ەنەرگەتيكالىق تورابى – اتىراۋ» ۋچاسكەسىندە 100 مۆت-تان 200 مۆت-قا دەيىن; «اتىراۋ – ماڭعىستاۋ» ۋچاسكەسىندە 50 مۆت-تان 200 مۆت-قا دەيىن. ناتيجەسىندە باتىس ايماق جەلىسىنىڭ سەنىمدىلىگى ەكى ەسەگە ارتىپ, اپات ىقتيمالدىعى تومەندەدى», دەلىنگەن حابارلامادا. ۇكىمەت باسشىسى اۋقىمدى جوبانى ىسكە قوسۋ ارقىلى باتىس ايماقتىڭ ەنەرگيا كوزىنە دەگەن زارۋلىگىن ازايتىپ, ەكونوميكالىق دامۋدى نىعايتۋعا بولاتىنىن ايتتى.
«مۇنىڭ بارلىعى ەلەكتر جەلىلەرىنىڭ وتكىزۋ قابىلەتىن ەكى ەسەگە ۇلعايتۋعا, سونداي-اق ەلىمىزدىڭ باتىس وڭىرىندەگى تۇتىنۋشىلار ءۇشىن ەنەرگوبلوكتاردا, ونىڭ ىشىندە ماەك ستانتسياسىندا اۆاريالىق جاعدايلاردىڭ سانىن ەداۋىر ازايتۋعا مۇمكىندىك بەرەدى», دەدى ءا.سمايىلوۆ.
باتىس ايماقتىڭ ەلەكتر جەلىسىن نىعايتۋ, سونىمەن قاتار ونىڭ ءارى قاراي قازاقستاننىڭ بىرىڭعاي ەلەكتر ەنەرگەتيكاسى جۇيەسىمەن ينتەگراتسيالانۋىنا نەگىز بولماق.
«KEGOC» اق باسقارما توراعاسى ءنابي ايتجانوۆ قۇرىلىس جۇمىستارى كەزىندە قولدانىلعان زاماناۋي ەلەكتر جەلىسى جابدىقتارى جوعارى ونىمدىلىگىمەن ەرەكشەلەنەتىنىن جەتكىزدى. ەلەكتر جەلىسىن سالۋ كەزىندە وتاندىق مەتالل جانە تەمىربەتون تىرەكتەرى, سىمدار, وقشاۋلاعىشتار مەن ترانسفورماتورلار قولدانىلدى.
