ادەپتى ادامدار ءۇشىن مادەنيەتتى بولۋ قوعامعا تابيعي تۇردە ەنۋگە مۇمكىندىك بەرەتىن ادەتتەردىڭ ءبىرى بولعانىمەن, ريزاشىلىقتىڭ ماعىناسى الدەقايدا كەڭ. العىس ايتۋ – كورسەتىلگەن جاقسىلىق ءۇشىن ريزاشىلىق ءبىلدىرۋ. بۇل ءومىردى جانە ونىڭ بارلىق عانيبەتىن باعالاۋدىڭ جالعىز جولى. ەگەر العىس بولماسا, ءبىز ءبىر-ءبىرىمىز ءۇشىن ەشتەڭە جاساماس ەدىك. ەلىمىزدەگى جانە الەمدەگى ۆولونتەرلىك قوزعالىستىڭ بەلسەندى دامۋى, بىرتىندەپ تانىمال بولا ءتۇسۋى وسىعان دالەل.
ەلىمىزدەگى ۆولونتەرلەر مۇقتاج جاندارعا الەۋمەتتىك كومەك, ەكوبەلسەندىلىك, مادەني جوبالار جانە سپورتتىق ءىس-شارا سەكىلدى قوعام ءومىرىنىڭ ءتۇرلى سالاسىندا كومەك قولىن سوزىپ كەلەدى. بۇكىل الەمدى ابىگەرگە تۇسىرگەن پاندەميا كەزىندە ۆولونتەرلىكتىڭ بەلسەندى كورىنىسى بايقالدى. ۆولونتەرلەرىمىز كوروناۆيرۋستىڭ تارالۋىنا قارسى كۇرەسكە جانە ونىڭ جالپى حالىق ءۇشىن دە, الەۋمەتتىك وسال توپتار ءۇشىن دە جاعىمسىز سالدارىن ازايتۋعا ەلەۋلى ۇلەس قوستى. وسىلايشا, پاندەميا كەزىندە ۆولونتەرلەر قاتارىنا 500 مىڭعا جۋىق ازامات قوسىلىپ, 1 ميلليونعا جۋىق حالىققا كومەك كورسەتىلدى.
وقىس جاعداي مەن اپاتتىڭ ايتىپ كەلمەيتىنىن ءبىز جاقسى بىلەمىز. قوستاناي جانە اباي وبلىسىنداعى ءورت, ەكىباستۇز قالاسىنداعى توتەنشە جاعداي كەزىندە زارداپ شەككەندەرگە كومەك كورسەتۋ ماقساتىندا ۇلتتىق ۆولونتەرلەر جەلىسى قايىرىمدىلىق اكتسياسىن بىردەن جاريالادى. ەلىمىزدەگى ۆولونتەرلىك پەن قايىرىمدىلىقتىڭ تاعى ءبىر جارقىن مىسالى – تۇركياعا كورسەتىلگەن كومەك.
ۆولونتەرلەردىڭ اۋقىمدى ۇلەسىن ەسكەرە وتىرىپ, مەملەكەت تاراپىنان دا شارالار كەشەنى ىسكە اسىرىلدى:
- مەملەكەت باسشىسىنىڭ باستاماسىمەن 2020 جىلدى ۆولونتەر جىلى اياسىندا وتكىزۋ, سونداي-اق ينتەرنەت جانە الەۋمەتتىك جەلىلەر ارقىلى ۆولونتەرلەر قىزمەتىنىڭ مۇمكىندىكتەرى تۋرالى اقپارات تاراتىلدى.
- ۆولونتەرلىكتى دامىتۋدىڭ 2021-2023 جىلدارعا ارنالعان جول كارتاسى قولعا الىندى. جول كارتاسى مەملەكەت باسشىسىنىڭ ۆولونتەر جىلى شەڭبەرىندە بەرىلگەن تاپسىرمالارىن ىسكە اسىرۋ جونىندەگى شارالار كەشەنىن كوزدەيدى. اتالعان شارالار ازاماتتاردىڭ ۆولونتەرلىك قىزمەتكە قاتىسۋىن جانداندىرۋعا, ولاردىڭ كۇندەلىكتى يگى ىستەرگە ۇمتىلۋىنا ىقپال ەتۋگە, سونداي-اق بۇل باعىتتى ودان ءارى جۇيەلى دامىتۋ ءۇشىن جاعداي جاساۋعا ارنالعان.
- رەسپۋبليكالىق فرونت-وفيس جانە 20 وڭىرلىك فرونت-وفيس اتىنان ۆولونتەرلىك ينفراقۇرىلىم قۇرىلدى, ولار ۆولونتەرلىك توپتارعا, ۇيىمدار مەن ۆولونتەرلەرگە كونسۋلتاتسيالىق كومەك كورسەتەدى. ۆولونتەر بولۋعا نيەتتى ءاربىر ازامات Qazvolunteer.kz ونلاين پلاتفورماسىنا تىركەلۋ ارقىلى قايىرىمدى ءىسىن باستاي الادى. قازىرگى ۋاقىتتا 56 مىڭنان استام بەلسەندى ۆولونتەر, ۆولونتەرلەر ءۇشىن مىڭنان استام جوبا ۇسىناتىن 3,5 مىڭنان استام ۇيىم تىركەلگەن.
- ۆولونتەرلىك ۇيىمدارمەن بىرلەسكەن جوبالار شەڭبەرىندە ءتۇرلى الەۋمەتتىك ءىس-شارالارعا – 6 700-دەن اسا, ەكولوگيالىق اكتسيالارعا 7 300-دەن اسا ۆولونتەر قاتىستى. دەنساۋلىق جاعدايىن جاقسارتۋ ماقساتىندا 7 339 ادامعا كومەك كورسەتىلدى. «كۇمىس ۆولونتەرلىككە» 1 000-عا جۋىق ازامات قوسىلدى.
- ۆولونتەرلەردىڭ ىنتالاندىرۋ ماسەلەسى – ەڭ ماڭىزدى الەۋمەتتىك قۇبىلىس. جىل سايىن ۇزدىك وتاندىق جانە شەتەلدىك ۆولونتەرلەردى كوتەرمەلەۋ ءۇشىن «جىل ۆولونتەرى» حالىقارالىق سىيلىعى تاعايىندالدى. وسى ۋاقىت ىشىندە (2020-2022 جىلدار) قازاقستان, رەسەي, وزبەكستان جانە قىرعىزستاننان 141 ۆولونتەر سىيلىق الدى. سونداي-اق, ۆولونتەرلەر جىل سايىن مەملەكەتتىك ناگرادالارمەن جانە العىس حاتتارمەن ماراپاتتالادى.
- حالىقارالىق ۆولونتەرلىك تە قارقىندى دامىپ كەلەدى. بۇۇ دامۋ باعدارلاماسىمەن جۇمىس اياسىندا 7 وتاندىق ۆولونتەر بۇۇ-نىڭ يوردانيا, كەنيا, تايلاند جانە تۇركياداعى ءتۇرلى قۇرىلىمداردا جۇمىس ىستەدى. 2023 جىلى وتاندىق ۆولونتەرلەردىڭ بۇۇ قۇرىلىمدارىنداعى جۇمىسىن جالعاستىرۋ تۋرالى كەلىسىمگە قول قويىلدى.
ۆولونتەرلىك الەم بويىنشا كەڭ تارالىپ, جالپى عالامدىق قوزعالىس پەن بەلسەندى كۇشكە اينالدى. 2022 جىلى قازاقستان, قىرعىزستان, تاجىكستان, تۇرىكمەنستان, ازەربايجان, ارمەنيا, وزبەكستان ۆولونتەرلەرىنىڭ قاتىسۋىمەن ورتالىق ازيا ۆولونتەرلەر فورۋمى, شىلدە ايىندا ۆولونتەرلەردىڭ حالىقارالىق فورۋمى ءوتتى. فورۋمنىڭ ماقساتى – ۆولونتەرلىك قوزعالىستى قولداۋ جانە دامىتۋ, ەرىكتىلەردىڭ مارتەبەسىن ارتتىرۋ, ىنتىماقتاستىق پەن ءوزارا ارەكەتتەسۋدى نىعايتۋ. فورۋم اياسىندا ۆولونتەرلەردىڭ قىزمەتىنە قاتىستى ءتۇرلى سالا, اتاپ ايتقاندا 34 ەلدىڭ 40 بىلىكتى سپيكەرى ۆولونتەرلىكتىڭ قىر-سىرىن تالقىلادى. جۇرگىزىلىپ جاتقان جۇمىستىڭ ارقاسىندا ۆولونتەرلىك ۇيىمداردىڭ – 3 (2020 جىلى – 224, 2023 جىلى 680-نەن اسا), بەلسەندى ۆولونتەرلەردىڭ 4 ەسەگە (2020 جىلى – 50 مىڭ, 2022 جىلى – 200 مىڭنان اسا) وسكەنى بايقالادى.
ادامي بايلانىس ءتۇرلى ۇلتتىق ەرەكشەلىك پەن ادامي قاتىناستاردىڭ الۋان تۇرلىگىنە سايكەس وزگەشە بولادى. ادام جاقسى ءسوز, جاقسى ىسكە وتە سەزىمتال. بۇل اسىرەسە جوعارى گۋمانيزم قارىم-قاتىناسىن ۇستاناتىن, ۇلكەندەرگە قۇرمەتپەن, كىشىلەرگە ىزەتپەن قاراپ, وسكەلەڭ ۇرپاققا ۇقىپتى قارايتىن قازاق حالقىنىڭ ونەگەسى. قازاق – قايىرىمدىلىق ءسوزىنىڭ ەتيكاسى مەن ەستەتيكاسىنا ۇلكەن ءمان بەرگەن ۇلت. ال قايىرىمدىلىق مادەنيەتىن قالىپتاستىرۋ – ءبىزدىڭ الدىمىزدا تۇرعان ۇلكەن ماقساتتاردىڭ ءبىرى. ەلىمىزدە ءار ۆولونتەردىڭ الداعى ۋاقىتتا كەرەمەت جوبالاردى ىسكە اسىرىپ, باستاما الۋىنا سەنىم مول.
اقبىلەك تاعاباەۆا,
قازاقستان قوعامدىق دامۋ
ينستيتۋتىنىڭ ساراپشىسى
