كەزدەسۋگە قاتىسۋشىلار شارتتىڭ رۋحى مەن قاعيداتتارىنا سايكەس ەكىجاقتى ىنتىماقتاستىق ماسەلەلەرىن تالقىلادى. سەناتور اندرەي لۋكين ءبىزدىڭ مەملەكەتتەر باسشىلارى ەكىجاقتى ىنتىماقتاستىق پەن حالىقارالىق كۇن تارتىبىندەگى وزەكتى ماسەلەلەر بويىنشا تۇراقتى ديالوگ جۇرگىزىپ وتىرعانىن اتاپ ءوتتى. بۇگىنگى تاڭدا قازاقستان مەن رەسەي قاتىناستارى بارلىق سالادا جوعارى دامۋ قارقىنىن پاش ەتىپ كەلەدى.
«ەكى مەملەكەتتىڭ باسشىلارى بەلگىلەگەن تىعىز ىنتىماقتاستىقتىڭ جوعارى دەڭگەيى زاڭ شىعارماشىلىعى جانە زاڭ شىعارۋ ينستيتۋتتارى سالاسىنا دا ىقپال ەتەدى. قوعامدىق-ساياسي ۇدەرىستەردەگى پارلامەنتتەردىڭ ماڭىزى زور ەكەنىن ەسكەرە وتىرىپ, قازاقستاندىق تاراپ ەگەمەندىكتى ءوزارا قۇرمەتتەۋ قاعيداتتارى مەن تۋىندايتىن ماسەلەلەردىڭ ورتاق شەشىمدەرىن ىزدەستىرۋدە رەسەيمەن تەپە-تەڭ ديالوگ ورناتۋعا ەرەكشە نازار اۋدارادى. قازاقستان باۋىرلاس مەملەكەتتەردىڭ, ونىڭ ىشىندە پارلامەنتتەر پالاتالارىنىڭ وكىلدەرى اراسىنداعى ءتيىمدى پارلامەنتارالىق ءوزارا ءىس-قيمىلدى داعدىلى تۇردە جاقتاپ كەلەدى», دەدى اندرەي لۋكين.
سەناتور سونىمەن قاتار قازاقستاندا جۇرگىزىلىپ جاتقان رەفورمالار تۋرالى كەزدەسۋگە قاتىسۋشىلارعا ايتىپ بەردى جانە رەسەي فەدەراتسياسى تاراپىنان قولداۋ جانە ءححى عاسىرداعى تاتۋ كورشىلىك پەن وداقتاستىق تۋرالى شارتتىڭ ماڭىزدىلىعىن اتاپ ءوتتى.
«شارت ەكى مەملەكەت ازاماتتارىنىڭ ءال-اۋقاتى مەن ءومىر ءسۇرۋ ساپاسىن, قازاقستان مەن رەسەيدىڭ ورنىقتى الەۋمەتتىك-ەكونوميكالىق دامۋىن ارتتىرۋ جونىندەگى مىندەتتەردى ءتيىمدى شەشۋگە ىقپال ەتتى. سونىمەن قاتار بۇل حالىقارالىق-قۇقىقتىق قۇجات ىنتىماقتاستىقتىڭ ءداستۇرلى عانا ەمەس, جاڭا, جوعارى تەحنولوگيالىق جانە عىلىمي اۋقىمدى سالالاردى دامىتۋعا ارنالعان بازانى قامتاماسىز ەتتى. شارت حالىقتىڭ دەنساۋلىعىن جاقسارتۋعا, قورشاعان ورتانى قورعاۋ سالاسىنداعى ىنتىماقتاستىققا, ەكولوگيالىق باعدارلامالاردى ىسكە اسىرۋعا باعىتتالعان بىرلەسكەن ءىس-قيمىلداردى ەداۋىر كەڭەيتۋگە مۇمكىندىك بەرەدى», دەپ اتاپ ءوتتى سەناتور ا.لۋكين.
