سۋرەتتەردى تۇسىرگەن – ەرلان ومار, «EQ»
اتالعان جيىننىڭ اشىلۋ سالتاناتىنا ەۋرازيا ۇلتتىق ۋنيۆەرسيتەتىنىڭ رەكتورى, ۇعا اكادەميگى, تاريح عىلىمدارىنىڭ دوكتورى ەرلان سىدىقوۆ, قوعام قايراتكەرى ساۋىتبەك ابدراحمانوۆ, ۇعا اكادەميگى ءۋاليحان قاليجان, سپورت جۋرناليستيكاسىنىڭ ارداگەرى نەسىپ ءجۇنىسباي ۇلى, ۇعا اكادەميگى, تانىمال جۋرناليست باۋىرجان ومار ۇلى, «Egemen Qazaqstan» گازەتى باس رەداكتورىنىڭ ورىنباسارى تالعات باتىرحان, بەلگىلى سپورت ءجۋرناليسى قىدىربەك رىسبەك ۇلى, پروفەسسور سەرىك نەگيموۆ, Altyn Qyran Foundation قوعامدىق قورىنىڭ ديرەكتورى رينات كەرتاەۆ, QazSport تەلەارناسىنىڭ ديرەكتورى ناعي باقىتبەك, قازاقستان سپورت جۋرناليستەرى فەدەراتسياسىنىڭ وكىلى ءىلياس وماروۆ, سەيداحمەت بەردىقۇلوۆتىڭ جيەنى ءمادي ءامىرجانوۆ جانە وزبەكستان, باشقۇرتستاننان كەلگەن عالىمدار قاتىسىپ, سپورت جۋرناليستيكاسى تاقىرىبىندا بايانداما جاسادى.
جيىننىڭ كىرىسپە سوزىندە رەكتور ەرلان ءباتتاش ۇلى قالامگەردىڭ شىعارماشىلىعى مەن ونىڭ قازاق سپورت جۋرناليستيكاسىنىڭ قالىپتاسۋىنا سىڭىرگەن ەڭبەگى تۋرالى ايتا كەلە, بەردىقۇلوۆ اتىنداعى اۋديتوريانىڭ اشىلۋىنا قولداۋ كورسەتكەن Altyn Qyran Foundation قوعامدىق قورىنا, ونىڭ باسشىسى بەلگىلى مەتسەنات يسلامبەك سالجانوۆقا العىسىن جەتكىزدى.
قازاق باسىلىمدارىندا سەيداعاڭنىڭ ءىزىن باسقان بەلگىلى قالامگەرلەر ءۋاليحان قاليجان, ساۋىتبەك ابدراحمانوۆ جانە «بەردىقۇلوۆتىڭ بەشپەتىنەن شىققان» شاكىرتتەرى نەسىپ ءجۇنىسباي ۇلى, باۋىرجان ومار ۇلى, قىدىربەك رىسبەك ۇلى ۇستازدىڭ ۇلاعاتتى بولمىسى, رەداكتورلىق شەبەرلىگى, قىزمەت جولى, وزىنەن كەيىنگىلەرگە كورسەتكەن جاناشىرلىعى, ۇيىمداستىرۋشىلىق قابىلەتى مەن شىعارماشىلىعى تۋرالى ايتتى.
قالامگەردىڭ ءتول شاكىرتى, بۇگىندە قازاقتىڭ تالاي سپورت جۋرناليستەرىنىڭ جولباسشىسىنا اينالعان نەسىپ ءجۇنىسباي ۇلى ۇستازىمەن بىرگە قىزمەت ەتكەن جىلدارىن ەسكە الدى. «بۇل كىسى تاقىرىپ قويۋدىڭ ۇلكەن شەبەرى ەدى. تاقىرىپ قويۋدا الدىنا جان سالمايتىن. ماقالانىڭ تاقىرىبى ناشار بولسا, قارامايتىن. ءبىر كۇنى «لەنينشىل جاستا» شىڭعىس ايتماتوۆپەن كەزدەسۋ بولدى. كەلەسى كۇنى گازەتتىڭ ايقارما بەتىنە «ادامزاتتىڭ ايتماتوۆى» دەگەن دۇنيە جارىققا شىقتى», دەدى ن.ءجۇنىسباي ۇلى.
كەزدەسۋدە قالامگەردىڭ تاعى ءبىر شاكىرتى, فيلولوگيا عىلىمدارىنىڭ دوكتورى, پروفەسسور باۋىرجان ومار ۇلى دا ەستەلىگىن ايتتى. ول ارداقتى ۇستازىنىڭ ون التى جىل «لەنينشىل جاستى» باسقارعانىن, وسىناۋ كەزەڭدە قازاق جۋرناليستيكاسىندا ەكى مەكتەپ قالىپتاستىرعانىن, العاشقىسى جازۋ شەبەرلىگىنىڭ مەكتەبى بولسا, ەكىنشىسى قازاق سپورت جۋرناليستەرىنىڭ مەكتەبى ەكەنىن اتاپ ءوتتى. «بەردىقۇلوۆتىڭ سول قولىمەن جازىلعان سوڭعى بۇيرىقتارى ارقىلى قىزمەتكە الىنعان ءبىز شىنىندا دا شەكسىز باقىتتى ەدىك», دەدى عالىم.
«بەردىقۇلوۆتىڭ بەشپەتىنەن شىققان» تاعى ءبىر قالامگەر, تۋريزم جانە سپورت مينيسترلىگىنىڭ دەنە شىنىقتىرۋ جانە سپورت بويىنشا رەسپۋبليكالىق وقۋ-ادىستەمەلىك جانە تالداۋ ورتالىعىنىڭ ديرەكتورى قىدىربەك رىسبەك ۇلى ۇستازى تۋرالى «نامىس ساردارى» دەگەن بايانداما جاسادى.
جيىندا بەلگىلى جۋرناليست تالعات باتىرحان كوپكە ۇلگى بولعان سايىپقىران سەيداعاڭنىڭ سۇڭعىلا قالامگەر ەكەنى تۋرالى ءسوز قوزعادى. سونىمەن قاتار ادەبيەتتانۋشى سەرىك نەگيموۆ تە سەيداعاڭ تۋرالى سىر شەرتتى. بۇدان كەيىن تۋريزم جانە سپورت ءمينيسترى ەرمەك مارجىقپاەۆتىڭ, قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆتىڭ قۇتتىقتاۋ حاتتارى وقىلدى. پارلامەنت سەناتىنىڭ دەپۋتاتى, بەلگىلى قالامگەر نۇرتورە ءجۇسىپ ونلاين فورماتتا سەيداعاڭنىڭ قازاق جۋرناليستيكاسىن دامىتۋعا قوسقان ەڭبەگى تۋرالى ايتتى.
«زاماناۋي مەديكوممۋنيكاتسيا جۇيەسىندەگى سپورت جۋرناليستيكاسى» جانە «سپورتتاعى مەدياكوممۋنيكاتسيانىڭ دامۋىنا تسيفرلىق تەحنولوگيانىڭ اسەرى» اتتى ەكى سەكتسياعا بولىنگەن وتىرىستا بەردىقۇلوۆتىڭ قازاق جۋرناليستيكاسىنداعى ەڭبەگى جان-جاقتى ايتىلدى. سونىمەن بىرگە س.بەردىقۇلوۆتىڭ ءتول شاكىرتى, مارقۇم ءدۇرالى دۇيسەبايدىڭ اعامىزدىڭ دا سپورت جۋرناليستيكاسىنا قوسقان ۇلەسى تۋرالى ءسوز ەتىلگەنى قۋانتتى. كونفەرەنتسيا اياسىندا اشىلعان س.بەردىقۇلوۆ اتىنداعى اۋديتوريا بولاشاق سپورت جۋرناليستەرىن دايارلايتىن شەبەرحانا بولماق.
