ءار كەزەڭنىڭ كلاسسيك قالامگەرلەرىنىڭ شىعارمالارىمەن ايشىقتالعان 35 كىتاپ الەمدىك سۇرانىسقا ساي, زاماناۋي ۇلگىدە جاسالعان. جيناقتاردىڭ ءبىرازى بۇرىننان قالىپتاسقان فورما مەن تۇستەر گالەرەياسىن, ءتىپتى مازمۇنى مەن تاقىرىبىن دا بۇزىپ-جارىپ, ءوز جاڭا تارتىمدىلىعىمەن وقىرمانعا جول تارتىپ وتىر. رۋحانيات جاناشىرلارى مەن قابىرعالى قالامگەرلەر باس قوسقان سالتاناتتى شارا مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ حاتىمەن باستالدى. ءمينيستردىڭ ىزگى لەبىزىن كىتاپ پالاتاسىنىڭ ديرەكتورى ءادىل قويتانوۆ جەتكىزدى.
«قازاقتىڭ باس اقىنى ۇلى ابايدان باستالىپ, دۋلات, شاكارىم, ءماشھۇر ءجۇسىپ, م.اۋەزوۆتەرمەن جالعاسىپ, كەشەگى كلاسسيك اقىن-جازۋشىلار مەن تاۋەلسىز قازاقستاننىڭ جاس اۆتورلارىنىڭ شىعارمالارىن قامتىعان جاڭا كىتاپتار ۇلت ادەبيەتى جاۋھارلارىنىڭ بىرەگەي سەرياسى دەپ بىلەمىز. بۇل كىتاپتار اراسىندا الاشوردا قايراتكەرلەرىنىڭ ىرگەلى تۋىندىلارىمەن قاتار, قۇندى اكادەميالىق زەرتتەۋ ەڭبەكتەرى دە بار. زاماناۋي ۇلگىدە, مينيماليزم ديزايندا كوركەمدەلگەن كىتاپتاردىڭ وزىندىك ەرەكشەلىگىن دە اتاپ وتكىمىز كەلەدى.
ۇلت مادەنيەتىنىڭ التىن قازىناسىن, رۋحاني مۇراسىن ۇرپاقتان-ۇرپاققا امان جەتكىزۋ, ونى ناسيحات ەتۋ – بارشامىزعا ورتاق مىندەت. وسى ورايدا, «اباي» باسپاسىنىڭ يگىلىكتى باستاماسى كوپشىلىك سۇرانىسىن قاناعاتتاندىرىپ, وقىرمان تاراپىنان جوعارى باعالانادى دەپ سەنەمىز. جاڭا كىتاپتار كىتاپسۇيەر قاۋىمنىڭ قۋانىشىنا اينالسىن, دەلىنگەن ۆەدومستۆو باسشىسىنىڭ لەبىز حاتىندا.
اقىن, اقبەرەن ەلگەزەك باسقاراتىن «اباي باسپاسى» ىرگەلى تۋىندىلاردان تۇراتىن ايتۋلى سەريانى ءبىر جىلعا جۋىق باسپاعا دايىنداعان. كىتاپتاردىڭ اتاۋلارى مەن رەتى دە جۇيەلى ويلاستىرىلىپتى.
اتاپ ايتساق, قازاقتىڭ باس اقىنى, اعارتۋشى, قازاق جازبا ادەبيەتىنىڭ, قازاق ادەبي ءتىلىنىڭ نەگىزىن قالاۋشى اباي قۇنانباي ۇلىنىڭ ارتىندا قالعان رۋحاني مۇراسى «جۇرەكتىڭ كوزى اشىلسا...», قازاقتىڭ اۋليەسى اتانعان, اقىن, اعارتۋشى, فيلوسوف ءماشھۇر ءجۇسىپ كوپەي ۇلىنىڭ ادەبي مۇراسى «حال-احۋال», ۇلى اقىن شاكارىم قۇدايبەردى ۇلىنىڭ ەڭبەكتەرى «ناسيحات», ءسوز زەرگەرى دۋلات باباتاي ۇلىنىڭ شىعارمالارى «ساندىقتاس» دەگەن اتاۋمەن وقىرمانعا ۇسىنىلعان. سونداي-اق مىرجاقىپ دۋلات ۇلىنىڭ ولەڭدەرى «الاشقا», جۇسىپبەك ايماۋىت ۇلىنىڭ تۋىندىلارى «رابيعا», قازاق پوەزياسىنىڭ قۇلاگەرى ءىلياس جانسۇگىروۆتىڭ شىعارمالارى «ساعاناق» اتاۋىمەن باسىلعان.
قارىمدى قالامگەر بەيىمبەت ءمايليننىڭ ادەبي مۇراسى «قاندى تۇمان», كلاسسيك جازۋشى ساكەن سەيفۋلليننىڭ شىعارمالارى «اققۋدىڭ ايرىلۋى» دەيتىن اتاۋمەن جارىق كوردى. قازاقتىڭ ۇلى اقىنى, الاش قوزعالىسىنىڭ قايراتكەرى, پوەزياسى قازاق ادەبيەتىنە عانا ەمەس, تۇركى تەكتەس حالىقتار ادەبيەتىنە دە ۇلكەن ىقپال ەتكەن بەس ارىستىڭ ءبىرى ماعجان جۇماباەۆتىڭ ومىرشەڭ, رۋحتى ولەڭدەرى «تۇران», ۇلى جازۋشى م.اۋەزوۆتىڭ شىعارمالارى توپتاسقان كىتاپتار «كوكسەرەك» جانە «قيلى زامان» اتاۋىمەن وقىرمان قاۋىمعا جول تارتقان.
اقيىق اقىن مۇقاعالي ماقاتاەۆتىڭ جيناعى «وتان», ۇلى اقىن تولەگەن ايبەرگەنوۆتىڭ سالقار پوەزياسى «ساعىنىش» دەگەن اتپەن جارىق كوردى. سونىمەن قاتار «اباي» باسپاسىنان شىققان كىتاپتار تىزىمىندە قازاقتىڭ كلاسسيك اقىندارى جۇمەكەن ناجىمەدەنوۆ, تۇمانباي مولداعاليەۆ, سىرباي ماۋلەنوۆتىڭ جىر جيناقتارىنىڭ, كورنەكتى جازۋشى سماعۇل ەلۋبايدىڭ «بالالىق شاق بايانى» اتتى كىتابى دا ايرىقشا ماڭىزعا يە.
قازاقتىڭ اسا كورنەكتى اقىندارى, قازاق پوەزياسىنا وزگەشە لەپ اكەلگەن جاراسقان ءابدىراش, تەمىرحان مەدەتبەك, تىنىشتىقبەك ابدىكاكىم ۇلى, سۆەتقالي نۇرجان, تابىلدى دوسىموۆ تۋىندىلارى دا وسى جيناقتاردىڭ سالماعىن ارتتىرىپ تۇر. اتالمىش كىتاپتار تىزبەگى قر مەملەكەتتىك سىيلىعىنىڭ يەگەرى ولجاس سۇلەيمەنوۆ, مۇحتار شاحانوۆ باستاعان بۋىن يسرايل ساپارباي, نەسىپبەك ايت ۇلى, كۇلاش احمەتوۆا, سابىر اداي, گۇلنار سالىقباي, قالقامان سارين, تاناگوز تولقىنقىزى, ەرلان ءجۇنىس ەسىمدى قالامگەرلەردىڭ تۋىندىلارىمەن جالعاسا بەرمەك. سولاردىڭ ىشىندە بۇگىنگى كۇننىڭ بەتسەللەرىنە اينالعان ۇلاربەك نۇرعالىم ۇلىنىڭ «داياعاشى» كىتابى مەن اقبەرەن ەلگەزەكتىڭ «بولماعان بالالىق شاق» تۋىندىسى مۇلدە بولەك ديزايندا, جاڭاشا فورماتتا وقىرمانعا ۇسىنىلعان.
الماتى
