بيومەتريالىق سايكەستەندىرۋ ارقىلى تىركەۋ جۇرگىزۋدى قولدانىسقا ەنگىزۋگە ەلىمىزدەگى بيومەتريالىق بازانىڭ ءبىر جەرگە شوعىرلاندىرىلماعانى كەدەرگى بوپ تۇر. سوندىقتان اتالعان ماسەلەنى جۋىق ارادا شەشۋ ءارى اۋەجايداعى تسيفرلاندىرۋ دەڭگەيىن ارتتىرۋ ماڭىزدى.
– استانا حالىقارالىق اۋەجايى IATA حالىقارالىق اۋە كولىگى قاۋىمداستىعى مەن ICAO حالىقارالىق ازاماتتىق اۆياتسيا ۇيىمىمەن تىعىز ارىپتەستىك ورناتقان. ءبىز وسى حالىقارالىق ۇيىمداردىڭ ستاندارتتارىنا سايكەس اۋەجاي قىزمەتىن دامىتۋدى جالعاستىرامىز. بيومەتريالىق سايكەستەندىرۋ باعدارلاماسىن ەنگىزۋدى اۆياتسيا سالاسىنداعى تەلەكوممۋنيكاتسيا جانە IT باعدارلامالاردى دايارلاۋعا نەگىزدەلگەن شۆەيتساريالىق اقپاراتتىق ۇيىم SITA-مەن بىرلەسە جۇرگىزۋگە نيەتتىمىز. بيومەتريالىق سايكەستەندىرۋدىڭ كومەگىمەن جولاۋشىلار رەيسكە تىركەلۋ كەزىندە قاجەتتى وپەراتسيالاردىڭ بارلىعىن ورىنداۋعا, قۇجاتتاردى ءوز بەتىنشە تولتىرۋعا جانە باسىپ شىعارۋعا, تولقۇجاتتىڭ ەلەكتروندى نۇسقاسىن تولىق قولدانۋعا مۇمكىندىك الادى, – دەيدى «نۇرسۇلتان نازارباەۆ حالىقارالىق اۋەجايى» اق باسقارما توراعاسى ەرعازى جولداسوۆ.
ايتا كەتۋ كەرەك, SITA-مەن الدىن الا كەلىسىم بويىنشا 27-30 قاراشا كۇندەرى جولاۋشىلاردى بيومەتريالىق سايكەستەندىرۋ ارقىلى تىركەۋ باعدارلاماسى استانا حالىقارالىق اۋەجايىندا سىناق رەجىمىندە ىسكە قوسىلادى. سىناق رەجىمىنە ارنايى فوكۋس-توپ قۇرىلعان. ەسكە سالا كەتەيىك, جولاۋشىلاردى بيومەتريالىق سايكەستەندىرۋ ارقىلى تىركەۋ دۋباي, سينگاپۋر, گانكونگ, سەربيا جانە پاكىستاننىڭ حالىقارالىق اۋەجايلارىندا كەڭىنەن قولدانىلادى.
