DraperU اكسەلەراتسيا باعدارلاماسىنا 35 ەلدەن 100-دەن استام جوبا قاتىسقان. 129 ءوتىنىم ىشىنەن ورتالىق ازيادان 12 ستارتاپ ىرىكتەلىپ, اقش-تاعى كرەمني القابىنا جول تارتتى. وتانداستارىمىز بەلگىلى ۆەنچۋرلىق ينۆەستور تيم درەيپەر ۇيىمداستىرعان اۋقىمدى بيزنەس ترەنينگتەن ءوتتى. الەمنىڭ تۇكپىر-تۇكپىرىنەن كەلگەن كاسىپكەرلەر ءتورت اپتا بويى جاھاندىق تەحنولوگيا ماماندارىنان ساباق الدى. سونداي-اق باعدارلاما اياسىندا كاسىپكەرلەر وركەنيەتتەن جىراق ءومىر ءسۇرىپ, تومەن تەمپەراتۋرادا شاتىردا تۇنەپ, باتپاقتى كولدە, سۋى سۋىق تىنىق مۇحيتىندا ءجۇزىپ, ءتۇرلى قارۋ-جاراقتان وق اتىپ, ازىق ىزدەدى. باعدارلاما Demo Day ءىس-شاراسىمەن اياقتالدى. وندا TrustMe كومانداسى باعدارلاماعا قاتىسقان 100 ستارتاپ ىشىنەن ينۆەستيتسيالىق تارتىمدى شەشىم رەتىندە تانىلدى. ستارتاپتىڭ باس ديرەكتورى شىڭعىس داۋلەتباەۆتىڭ ايتۋىنشا, ميللياردەر تيم درەيپەر TrustMe-گە ينۆەستيتسيا سالۋعا قىزىعۋشىلىق تانىتقان.
ء«بىز وعان پرەزەنتاتسيا جىبەردىك. تيم درەيپەر ءبىزدىڭ ينۆەستورىمىز بولادى دەپ ۇمىتتەنەمىز. ويتكەنى ءبىزدىڭ قۇندىلىقتارىمىز ۇقساس», دەيدى TrustMe باس ديرەكتورى شىڭعىس داۋلەتباەۆ.
سونداي-اق ۇزدىك 10 ستارتاپ قاتارىنا ۇندىستانداعى قاتەرلى ىسىكتى دياگنوستيكالاۋ جوباسى, ورتودونتيا سالاسىندا توڭكەرىس جاسايتىن ليۆاندىق جوبا, كانادا مەن كاريب باسسەينى ەلدەرىنىڭ مەديتسينالىق جوبالارى, ساۋد ارابياسى, وڭتۇستىك كورەيا جانە ارگەنتيناداعى جوبالار كىردى.
وتاندىق ستارتاپ DocuSign, AdobeSign جانە DropboxSign سياقتى جاھاندىق الپاۋىتتاردىڭ تەحنولوگيالارىنان تۇبەگەيلى وزگەشە, كەلىسىمشارتقا قول قويۋعا ارنالعان يننوۆاتسيالىق شەشىمدى ۇسىنادى. كومپانيانىڭ نەگىزىن قالاۋشى شىڭعىس داۋلەتباەۆتىڭ ايتۋىنشا, TrustMe كەلىسىمشارتتاردىڭ شارتىن ءوزى باعدارلامالايدى جانە ادامي فاكتوردى جويادى. قازىرگى ۋاقىتتا TrustContract قىزمەتىن قازاقستانداعى 800-دەن استام كومپانيا پايدالانادى. ستارتاپ-كومپانيا وزبەكستان مەن اقش-تا وكىلدىكتەرىن اشىپ, العاشقى شەتەلدىك كليەنتتەرىنە دە قىزمەت كورسەتە باستادى. بۇعان دەيىن TrustMe ستارتاپى ازيا-تىنىق مۇحيتى ايماعىنداعى جوبالار اراسىنان پاكىستانداعى جاساندى ينتەللەكت جوباسىنان كەيىن ەكىنشى ورىن العان بولاتىن.
