سۋرەتتى تۇسىرگەن – يۋري بەككەر
ەستەتيكالىق توپتىق گيمناستيكانىڭ وتانى – فينليانديا. سۋومي ەلىنىڭ مايتالماندارى ۇزاق جىلدار بويى ادەمىلىك پەن اسەمدىككە نەگىزدەلگەن وسى سپورت ءتۇرىن كەڭىنەن ناسيحاتتاپ, اقىرى ونى ۇلكەن دەڭگەيگە كوتەردى. العاشقى الەم چەمپيوناتى 2000 جىلى حەلسينكيدە ۇيىمداستىرىلسا, كەيىننەن اتالعان جارىستىڭ جالاۋى ەۋروپا مەن امەريكا قۇرلىقتارىنداعى بىرنەشە مەملەكەتتە جەلبىرەدى. بۇل باسەكەلەر ءار جىل سايىن ۇزدىكسىز ءوتىپ تۇرادى. شتاب-پاتەرى فينليانديانىڭ باس شاھارىندا ورنالاسقان اتالعان حالىقارالىق ۇيىمعا قازىرگى كەزدە 47 ەلدىڭ ۇلتتىق فەدەراتسيالارى مۇشە.
الاتاۋ باۋرايىندا وتكەن جارىستىڭ العاشقى ەكى كۇنىندە «الماتى كۋبوگى» مەن ء«تورت قۇرلىق بىرىنشىلىگىنىڭ» جۇلدەلەرى ساراپقا سالىندى. باق سىناۋشىلار قاتارىندا 8 جاستاعى بۇلدىرشىندەردەن باستاپ تاجىريبەسى تولىسقان ساقا سپورتشىلارعا دەيىن بولدى. بىرنەشە جاس ەرەكشەلىكتەرى مەن ءتۇرلى جاتتىعۋلار بويىنشا ۇيىمداستىرىلعان ءدۇبىرلى دودادا رەسەيلىك «بريول» مەن «ەۆيتا پريما», بەلارۋستىك «سيلفيدا ميكس», وڭتۇستىككورەيالىق «SJ Tiger» جانە قازاقستاندىق «جۇلدىز وريون», «فيەستا», «بلوسسۋم», «اسسول» كلۋبتارى باس جۇلدەنى ولجالادى.
– كۇنى بۇگىنگە دەيىن ازيادا بىردە-ءبىر رەت الەم چەمپيوناتى وتكەن ەمەس. قازاقستان سارى قۇرلىقتا ءبىرىنشى بولىپ وسىنداي دەڭگەيى جوعارى, مارتەبەسى بيىك ءدۇبىرلى دودانى قابىلداپ وتىر. ءسوز ورايى كەلگەندە, بىزگە زور سەنىم ارتقان حالىقارالىق ەستەتيكالىق توپتىق گيمناستيكا فەدەراتسياسىنىڭ باسشىلارىنا ريزاشىلىعىمىزدى بىلدىرەمىز. اتالعان ۇيىمنىڭ پرەزيدەنتى ليليا موروزوۆا الماتىعا ارنايى كەلىپ, جارىستى باسىنان اياعىنا دەيىن تاپجىلماي تاماشالادى. ارينە, وسىنداي زور سەنىمنىڭ بىزگە بەكەردەن بەكەر ارتىلىپ وتىرماعانى انىق. قازاقستاندا بۇل ونەردى دامىتىپ جاتقانىمىزعا اسا كوپ ۋاقىت بولا قويعان جوق. دەسەك تە اينالدىرعان بەس-التى جىل ارالىعىندا جەرلەستەرىمىز حالىقارالىق ارەنادا اۋىز تولتىرىپ ايتارلىقتاي تابىستارعا قول جەتكىزدى. بۇگىنگى تاڭدا شاكىرتتەرىمىز ازياداعى ۇزدىك كوماندالار ساناتىندا. الەمدىك دەڭگەيدەگى دودادالاردان دا ارا-تۇرا ولجالى ورالىپ ءجۇرمىز. قازىرگى كەزدە رەسپۋبليكامىزدىڭ 9 وڭىرىندە فەدەراتسيالار جۇمىس ىستەپ جاتىر. ولاردىڭ 12 فيليالى بار. ءبىر سوزبەن ايتساق, ەلىمىزدە سپورتتىڭ بۇل تۇرىنە دەگەن قىزىعۋشىلىق جىلدان-جىلعا ارتىپ كەلەدى, – دەيدى قازاقستاننىڭ ەستەتيكالىق توپتىق گيمناستيكا فەدەراتسياسىنىڭ پرەزيدەنتى ءمادينا بەكتۇرعانوۆا.
كەيىنگى كۇندەرى جاستار مەن ەرەسەكتەر اراسىندا ەكى بىردەي ءىرى جارىس ءوتتى. العاشىندا ء«تورت قۇرلىق بىرىنشىلىگى – تروفي» ءتۋرنيرىنىڭ تۇساۋى كەسىلدى. جاستار اراسىنداعى سايىستا بولگاريانىڭ «اكادەميگى» الدىنا جان سالماسا, رەسەيدىڭ ء«رۋبينى» مەن قازاقستاننىڭ «ۇمايى» ەكىنشى جانە ءۇشىنشى ورىنداردى يەلەندى. ەرەسەكتەردىڭ باسەكەسىندە وتاندىق «كەربەز-پريمانىڭ» بۇرىمدىلارى التىننان القا تاقسا, «ەفەكت» كۇمىسپەن كۇپتەلدى. رەسەيدەن كەلگەن «بلەسك» كلۋبىنا قولا مەدال بۇيىردى.
جاستاردىڭ الەم بىرىنشىلىگىندە ىرىكتەۋ سىنىنان ىركىلمەي وتكەن 12 كوماندا ونەر كورسەتتى. بۇل سايىستا العاشقى ەكى ورىندى رەسەيدىڭ «ۆيكتورياسى» مەن «مادوننا جۋنيورى» جەڭىپ السا, بولگاريانىڭ «National Team» مەن استانانىڭ «سامۇرىعى» قولا مەدالدى ەنشىلەدى. ەرەسەكتەر جارىسى شيەلەنىسكە تولى بولدى. دۋالى اۋىز مامانداردىڭ وزدەرى ەڭ سوڭعى ساتكە دەيىن كىمنىڭ وزاتىنىن ءدوپ باسىپ ايتۋعا جۇرەكسىندى. جەرگىلىكتى جانكۇيەرلەر ەلىمىزدىڭ ەڭ ۇزدىك كوماندالارى – «فريدوم» مەن «سانرايزعا» ايرىقشا سەنىم ارتتى. بىراق ءمادينا مۇتاليەۆا مەن جانەت جابوەۆا جاتتىقتىراتىن ۇجىمدارعا جەڭىس تۇعىرىنا كوتەرىلۋ باقىتى بۇيىرمادى. بۇل ولاردىڭ وسالدىعىنان ەمەس. نەگىزى جەرلەستەرىمىز وتە جاقسى ونەر كورسەتتى. ونى ماماندار دا, باسقالار دا مويىندادى. بىراق قارسىلاستارىمىز بىزدەن دە مىقتى بولدى. ماسەلەن, باس جۇلدەنى ولجالاعان رەسەيلىك «ەكسپرەسسيا» 2016 جىلى الەم چەمپيونى اتانىپ, سول جارىستا تاعى 2 كۇمىس پەن 3 قولانى ەنشىلەدى. كۇمىس مەدالدى يەلەنگەن بولگاريانىڭ «National Team» كلۋبى – بىلتىرعى الەم چەمپيوناتىنىڭ جەڭىمپازى. ودان بولەك, سوفيادان كەلگەن سۇلۋلاردىڭ قورجىنىندا جاھاندىق دودانىڭ 5 كۇمىسى مەن 4 قولاسى بار. ءۇشىنشى ورىنعا تابان تىرەگەن ماسكەۋدىڭ «مادونناسى» دۇنيەجۇزىلىك چەمپيوناتتاردا
6 مارتە تەڭدەسسىز دەپ تانىلىپ, تاعى ءتورت رەت جۇلدەگەرلەر ساناتىنا قوسىلدى. مىنە, وسىنداي اتاقتى كلۋبتار وتانداستارىمىزدىڭ الدىن وراپ كەتتى. تاعى ءبىر قولا مەدال بولگاريانىڭ ەكىنشى قۇراماسىنا بۇيىردى. ال جالپى كوماندالىق ەسەپتە ەلىمىزدىڭ جاس گيمناسشىلارى ەكىنشى ورىن السا, ەرەسەكتەر ءۇشىنشى ساتىعا تۇراقتادى.
