«قارادالادا – قالىڭ ءىز,
قارادالادا – جانىمىز.
قارادالادا كيەلى –
توگىلگەن كىندىك قانىمىز», – دەپ بەلگىلى قوعام قايراتكەرى, اقىن نۇرلان ورازالين وي تولعاعان قاسيەتتى قارادالا توسىندە وتكەن, رۋحتى ەلدىڭ ەرلىگىن پاش ەتكەن قويىلىمنىڭ اشىلۋ سالتاناتىنا وبلىس اكىمىنىڭ ءبىرىنشى ورىنباسارى نۇرلان ءابدىراحىم, الماتى وبلىسىنىڭ قۇرمەتتى ازاماتى ىزعاربەك بەكتۇرسىنوۆ, ۇيعىر اۋدانىنىڭ اكىمى بوتا ەلەۋسىزوۆا قاتىسىپ, ىزگى تىلەكتەرىن ءبىلدىردى.
«بۇل قويىلىم – تاريحي سانانى وياتۋعا سونى سەرپىن بەردى. مىڭ ءولىپ, مىڭ تىرىلگەن حالقىمىزدىڭ اتا قونىسىن نايزانىڭ ۇشى, بىلەكتىڭ كۇشىمەن قورعاعان ەرلىگىن پاش ەتتى. وسكەلەڭ ۇرپاقتىڭ ەل مەن جەر تاريحىن تانۋىنا تىكەلەي ىقپال ەتكەن سپەكتاكلدى ساحنالاعان ارتىستەرگە العىسىمىز شەكسىز», – دەيدى قوعام قايراتركەرى ىزعاربەك بەكتۇرسىنوۆ.
قاسيەتتى قارادالانىڭ ورتالىق ستاديونىندا وتكەن بۇل تاريحي قويىلىمدى تاماشالاۋعا الىس-جاقىننان ەكى مىڭنان استام كورەرمەن جيىلىپ, قاس-دۇشپانعا قارسى شاپقان ءباھادۇر بابالاردىڭ ەل مەن جەرىن قورعاۋداعى باتىرلىعى مەن تاباندىلىعىنا ءتانتى بولدى, تاريحي وقيعالارعا قانىقتى.
«الماتى وبلىسىنىڭ ىشكى ساياسات باسقارماسى» مم, «قوعامدىق كەلىسىم جانە دامۋ ورتالىعى» كمم-ءسى مۇرىندىق بولعان بۇل ءىس-شارا – « ۇلى دالانىڭ ۇلى تۇلعالارى» جوباسىنىڭ ءۇشىنشى كەزەڭى سانالادى. ءبىرىنشى كەزەڭدە ۇلى دالانىڭ مادەني-تاريحي قۇندىلىقتارىن, ەجەلگى داۋىردەگى ارحەولوگيالىق ەسكەرتكىشتەردى زەردەلەۋ ماقساتىندا ارنايى تاريحي ەكسپەديتسيا ۇيىمداستىرىلسا, ەكىنشى كەزەڭدە حالىقارالىق عىلىمي كونفەرەنتسيا وتكىزىلگەن.
ال ءۇشىنشى كەزەڭگە ارقاۋ بولعان تاريحي قويىلىمنىڭ ءساتتى شىعۋىنا گولليۆۋدقا ايگىلى «Kazakh Union Action Team» كاسكادەرلىك توبى جانە قازاقستاننىڭ تانىمال كينو-اكتەرلارى بار, ۇزىنىرعاسى 100-گە جۋىق ادام اتسالىستى. ءبىر ساعات كولەمىندە وتكەن قويىلىمنان كورەرمەن تاريحي تاعىلىم الدى. بەس ءتۇرلى كورىنىستەن قۇرالعان قويىلىم جوڭعار شاپقىنشىلىعىنىڭ كەزەڭدەرىن, شايقاس بارىسىن, سونىمەن قاتار سول كەزدەگى قازاق اۋىلدارىنىڭ تۇرمىس-تىرشىلىگىن بەينەلەدى.
سونداي-اق قوناقتار نازارىنا «باۋىرساق party», «قولونەرشىلەر قالاشىعى», «قۇسبەگى», «يتبەگى», تاعى باسقا 6 ءتۇرلى الاڭدا شوۋ كورىنىستەر ۇيىمداستىرىلىپ, حالىقتىق ونەرىمىزدىڭ مول مۇرالارى ۇسىنىلدى.
الماتى وبلىسى
