فوتو: egemen.kz
پرەمەر-مينيستر ءا.سمايىلوۆ ءتيىستى قاۋلىعا قول قويدى. ەندى مال وسىرۋشىلەرگە سۋبسيديا بويىنشا بەرەشەكتى وتەۋگە وسى قاراجات جۇمسالادى.
«اۋىل شارۋاشىلىعى مينيسترلىگىنە اباي, جەتىسۋ, اقمولا, الماتى, شىعىس قازاقستان, جامبىل, باتىس قازاقستان, ماڭعىستاۋ, پاۆلودار جانە سولتۇستىك قازاقستان وبلىستارىنىڭ بيۋدجەتتەرىنە اسىل تۇقىمدى مال شارۋاشىلىعىن دامىتۋ, ونىمدىلىك پەن ءونىم ساپاسىن ارتتىرۋدى سۋبسيديالاۋعا نىسانالى ترانسفەرتتەر تۇرىندە 30 ملرد تەڭگە ءبولۋ جوسپارلاندى. وسى قاۋلىنىڭ قوسىمشاسىنا سايكەس, اقمولا وبلىسىنىڭ اكىمدىگىنە ەڭ كوپ قاراجات – 7,8 ملرد تەڭگە ءبولىندى. جامبىل وبلىسىنا 5 ملرد تەڭگە, شقو-عا 4,5 ملرد تەڭگە, بقو مال وسىرۋشىلەرىنە 1 ملرد تەڭگە باعىتتالدى. اۋىل شارۋاشىلىعى مينيسترلىگىنە قاجەتتى شارالاردى قابىلداۋ, ال قارجى مينيسترلىگىنە بولىنگەن قاراجاتتىڭ ماقساتتى پايدالانىلۋىن باقىلاۋ تاپسىرىلدى», دەلىنگەن حابارلامادا.
بيىل ۇكىمەت اگروونەركاسىپ كەشەنىن سۋبسيديالاۋعا 494 ملرد تەڭگە بولگەن بولاتىن.
