اسىل سۇڭعاتقىزى «تەلەفون – تاربيە قۇرالىنا» اينالعان تۇستا, كولەمى كوپ, دەرەگى داستاندارعا جۇك بولاتىن ۇلتتىق قۇندىلىقتارىمىز بەن مادەنيەتىمىزدى بۇگىنگى بۋىنعا توتە ءتۇسىندىرۋدىڭ ءتيىمدى ۇلگىسىن سالۋعا دەن قويعان. توعىزىنشى سىنىپ وقۋشىسى بۇعان دەيىن 2 كوميكس البومدى كوپشىلىك نازارىنا ۇسىنىپ ۇلگەردى.
«ينتەرنەت دامىعان زاماندا كوپشىلىك ۇزىن-سونار ءماتىندى وقىعىسى كەلمەيدى. ءبىزدىڭ ەلدە كەڭ تانىلا قويماسا دا كوميكس ارقىلى قىسقا ۋاقىتتا اقپاراتتى تەز جەتكىزۋگە بولادى», دەيدى اسىل سۇڭعاتقىزى.
اسىل وسكەمەن قالاسىنداعى ش.ءۋاليحانوۆ اتىنداعى مەكتەپتىڭ 9-سىنىپ وقۋشىسى. ول سۋرەت سالۋعا بالا كۇنىنەن اۋەس بولعان. اتا-اناسى اسىلدىڭ بۇل قابىلەتىن اڭعارىپ, تالانتىن شىڭداۋعا ءاردايىم قول ۇشىن سوزىپ ءجۇر.
ءسوزى از, سۋرەتى كوپ بۇل جانردا شەبەرلىگىن شىڭداپ كورۋدى اسىلعا ۇستازى, «Egemen Qazaqstan» گازەتىنىڭ مەنشىكتى ءتىلشىسى مەرەي قاينار ۇلى ۇسىنىپتى. ول اسىلعا العاشىندا كوميكس, كاريكاتۋرا نەگىزىن ۇيرەتىپ, باعىت بەرگەن. ەڭبەكقور قىز, ۇستازى نۇسقاعان جولدان تايماي تاريحتى سۋرەتپەن سويلەتىپ, تۇلعالاردىڭ سان-قىرىن تانىتىپ ءجۇر.
اسىلدىڭ تۇڭعىش كوميكس-البومى الاش كوسەمى ءاليحان بوكەيحانوۆتىڭ 155 جىلدىق مەرەيتويىنا ارنالىپتى. «الاش كوسەمى» اتتى كوميكسىندە قايراتكەردىڭ تۇلعالىق سان قىرىن سۋرەت ارقىلى شەبەر اشقان. ال, ەكىنشى تۋىندىسى بىلتىر جارىق كورگەن «ەر توستىك» ەرتەگىسى.
اسىل سۇڭعاتقىزىنىڭ كەزەكتى البومى اقىن ماعجان جۇماباەۆتىڭ 130 جىلدىعىنا ارنالعان. ول بۇل تۋىندىسىن 7 اي بويى دايىنداعان.
«مەنىڭ كوميكس تۋىندىلارىم جاس تالعامايدى. ۇلكەن دە, كىشى دە كوميكستى كورىپ وتىرىپ, مول ماعلۇمات الىپ قانا قويماي, ۋاقىتىن ۇنەمدەيدى. ماسەلەن, مەنىڭ سىنىپتاس دوستارىم البومدارىمنىڭ تانىستىرىلىمىنان قالماي كەلەدى, شىعارماشىلىعىم ولارعا اركەز قىزىق. مەنىڭ ماقساتىم كوميكستەرىم ارقىلى تاريحقا جالپى جۇرتتى قىزىقتىرۋ, كىتاپ وقۋعا باستاما بولۋ», دەيدى ول.
سونداي-اق وقۋشى «ستيكەر پاك» جاساپ ءجۇر. جاپسىرما قاعازدارعا الاش قايراتكەرلەرى ايتقان اسىل سوزدەر مەن اۆتوردىڭ پورترەتىن باسىپ شىعارىپ, زامانداستارىنا تاراتادى. اتالى ءسوزدى اۋديتورياعا قاراي يكەمدەگەن اسىل تسيفرلىق داۋىردە تاريحتى وقىتۋدا جاڭا شەشىمىنىڭ بولۋى ماڭىزدى ەكەنىن جەتكىزدى.
اسىلدىڭ بۇل تۋىندىلارىنا قىزىعىپ, سەرىكتەستىك ۇسىنۋشىلار قاتارى قالىڭ. سۋرەتشى قىز كەزەكتى رەت Qazaq camel فيرماسىنا ارناپ كوميكس قۇراستىرىپ, قارجىلاي تابىس تاپقان. ول, سونىمەن بىرگە, كوميكس-البومدار مەن «ستيكەر پاكتاردى دا» ساتىپ الۋشىلار كوپ ەكەنىن ايتتى.
ال, اسىلدىڭ ۇستازى مەرەي قاينار ۇلى كوميكس - جاستاردىڭ وقۋعا ىنتاسىن ارتتىراتىن ءتيىمدى قۇرال دەيدى.
«كوميكس – بولاشاعى زور جانر. الايدا جانردىڭ جەتكىلىكتى باعالانباي وتىرعانى الاڭداتادى. ماسەلەن, ادەتتە «اباي جولى» رومانىن وقۋعا 2 اي كەتسە, كوميكس ارقىلى 1 اپتادا وقىپ تامامداۋعا بولادى. بىزگە شەت ەلدىڭ كوميكستەرىن اۋدارۋدى دوعارىپ, ءتول كوميكستەرىمىزدى شىعارۋدىڭ كەزى جەتتى», دەدى مەرەي قاينار ۇلى.
مەرەي قاينار ۇلى ءالى كۇنگە اسىلدىڭ شىعارماشىلىعىن شىڭداۋدان قول ۇزبەگەن. ول ەندى اسىلعا بەردىبەك سوقپاقپاەۆتىڭ, مارات قابانباەۆتىڭ بالالارعا ارنالعان اڭگىمەلەرىن كوميكسكە اينالدىرۋدى ۇسىنعان.
اسىلدىڭ الداعى ارمانى − عالامتور كەڭىستىگىندە بالالارعا ارنالعان قازاق ءتىلدى كونتەنتتى كوبەيتۋ.
