جالعان تۇسىندىرمەگە سايكەس «Pepsi» – بۇل P (Pay) E (Every) P (Penz) for S (Saving) I (Israel) (ارقايسىڭ ءيزرايلدى ساقتاپ قالۋ ءۇشىن پەنيادان تولەڭىز), ال «Coca-Cola» اببرەۆياتۋراسىن ايناداعى كەسكىنىن وقىعاندا, اراب تىلىندەگى «مەككە جوق, مۇحاممەد جوق» دەگەن ءسوز شىعادى ەكەن.
Pepsi-ءدى ءيزرايلدى قارجىلاندىرۋ ءۇشىن سيونيستەر ءوز باقىلاۋىنا العان دەگەن جالعان مالىمدەمەلەر 1980 جىلدارى پايدا بولعان. باستاپقىدا بۇل تەوريا تەك اراب وقۋشىلارىنىڭ اراسىندا عانا ايتىلدى. سودان كەيىن فەيك ستۋدەنتتىك ورتاعا اۋىستى, تۇرىك جۋرناليستەرىنىڭ اراسىندا, ءتىپتى اراب تەلەۆيدەنيەسىندەگى باعدارلامالاردا دا ايتىلدى. بۇل تۋرالى تۇرىك شولۋشىسى بۋراك بەكدىل جازعان.
Pepsi 1893 جىلى شىعارىلعان. ونى كالەب برەدحەم ويلاپ تاۋىپ, ونى ءوز ەسىمىمەن اتاعان. 1898 جىلى «برەد سۋسىنى» Pepsi-Cola بولىپ وزگەرتىلدى. ال 1961 جىلدان بەرى ول Pepsi اتاۋىمەن بەلگىلى. باستاپقىدا برەدحەم ليمونادتى اس قورىتۋدى جەڭىلدەتەتىن قۇرال رەتىندە شىعارعان. اسقازانى قورىتپاي قالعاندا نەمەسە ديسپەپسيا بولعاندا, تۇتىنۋشىلار Pepsi ساتىپ الاتىن بولعان. گرەك تىلىندە pepsis – اس قورىتۋ, ال پەپسين – اسقازان ءسولىنىڭ قاجەتتى قۇرامداس بولىگى دەگەندى بىلدىرەدى. ايتا كەتەيىك, بۇل فەرمەنت سۋسىننىڭ قۇرامىندا مۇلدەم بولعان ەمەس. ونىڭ قۇرامىنا سۋ, ۆانيل, قانت جانە باسقا ينگرەديەنتتەر كىردى.
فەيك تاريحي شىندىقتى دا جوققا شىعارادى. يزرايل مەملەكەتى سۋسىن پايدا بولعاننان كەيىن 55 جىل وتكەن سوڭ عانا قۇرىلعان – 1948 جىلى 14 مامىردا.
Coca-Cola سۋسىنىنا كەلەتىن بولساق, 2018 جىلى ونىڭ لوگوتيپىنىڭ جاسالۋى دا فەيكتىڭ تارالۋىنا سەپ بولدى. سۋسىننىڭ اتاۋىن كەرى وقىعاندا, اراب تىلىندەگى «مۇحاممەد جوق, مەككە جوق» دەگەن ءسوز شىعادى ەكەن. بۇل اقپاراتتى Coca-Cola-نىڭ تۇركياداعى رەسمي وكىلدىگى جوققا شىعاردى. كومپانيا وكىلدەرى قاۋەسەتتەر شىندىققا جاناسپايدى دەپ مالىمدەدى.
سونداي-اق «Malumatfuruş» تۇرىك فاكتچەكينگ پورتالى Coca-Cola Turkey ءدىن ىستەرى باسقارماسىنان كومپانيا لوگوتيپىندە ءدىني قۇندىلىقتاردى قورلاۋدىڭ بار-جوعىنا قاتىستى جازباشا قورىتىندى جازىپ بەرۋىن سۇراعانىن جەتكىزدى.
تۇركيانىڭ ءدىن ىستەرى جونىندەگى جوعارعى كەڭەسىنىڭ توراعاسى ەكرەم كەلەش قول قويعان جاۋاپ حاتىندا بىلاي دەلىنگەن: «كومپانياڭىزدىڭ لوگوتيپىن كەرى جازۋ مۇقيات تەكسەرىلگەنىمەن, ونى اراب ورمە جازۋىمەن بايلانىستىرۋ مۇمكىن بولمادى. سوندىقتان لوگوتيپتى كەرى جازۋدىڭ ماعىناسى جوق». دەمەك Coca-Cola لوگوتيپىن كەرى وقۋ ەشتەڭەنى بىلدىرمەيتىنىن راستادى.
Coca-Cola اتاۋىن 1886 جىلى فرەنك م. روبينسون ويلاپ تاپقان. ساۋدا ماركاسىنىڭ لوگوتيپىن دە بىرەگەي قارىپپەن ءوزى جاساعان, ول «ەكى س جارنامادا جاقسى كورىنەدى» دەپ ويلاعان. تاقىرىپتىڭ جازىلۋىندا باسقا ماعىنا بولماعان.
دەمەك تانىمال سۋسىنداردىڭ اتاۋلارىن ء«تۇسىندىرۋ» تۋرالى اقپاراتتار - جالعان.
