ەكونوميكالىق ءوسۋدى ىنتالاندىرۋ, ينفراقۇرىلىمدى دامىتۋ, جاڭا جۇمىس ورىندارىن قۇرۋ, تەحنولوگيالىق جاڭارۋ جانە جەرگىلىكتى بيزنەستىڭ باسەكەگە قابىلەتتىلىگىن ارتتىرۋ ءۇشىن وڭىرگە شەتەلدىك ينۆەستيتسيالاردى تارتۋعا جاردەمدەسۋ ماقساتىنداعى فورۋمدى اشقان وبلىس اكىمى دارحان ساتىبالدى وڭىردە ينۆەستورلارعا بارلىق جاعداي جاسالاتىنىن اتاپ ءوتتى. فورۋمدا اۋىل شارۋاشىلىعى, جەڭىل ونەركاسىپ, ەكسپورت, لوگيستيكا جانە IT-ءبىلىم سياقتى نەگىزگى سالالار تالقىلاندى. سونداي-اق حالىقارالىق فورۋم اياسىندا قازاقستان, تۇركيا, قىرعىزستان, وزبەكستان, ازەربايجان جانە قىتاي, رەسەي ەلىنىڭ بەدەلدى كومپانيالارىمەن بىرنەشە باعىتتا 20-عا جۋىق مەموراندۋمعا قول قويىلدى. اتاپ ايتقاندا, ساۋران اۋدانىندا توڭازىتقىش قوندىرعىلار ءوندىرىسىن كەڭەيتۋ, سوزاق اۋدانىندا فوسفاتتى تاۋ جىنىستارى كەندەرىن وڭدەۋ زاۋىتىنىڭ قۇرىلىسى, «شاردارا» ەكسپورتتىق اگروونەركاسىپتىك كلاستەرىن, ماقتاارال اۋدانىندا توقىما كلاستەرىن قۇرۋ جانە كەلەس اۋدانىندا يندۋستريالدى پارك قۇرىلىسى, سايرام اۋدانىندا قۋاتتىلىعى 1000 مۆت بولاتىن يكەمدى گەنەراتسيالاۋ رەجيمى بار ارالاس تسيكلدى گاز ستانتسياسىنىڭ نەگىزىندە ەلەكتر ستانتسياسىن سالۋ, ءتۇستى رۋدالاردى جانە مەتاللۋرگيا ءوندىرىسىنىڭ ونەركاسىپ قالدىقتارىن قايتا وڭدەۋ بويىنشا كەنتاۋ بايىتۋ كومبيناتىن ىسكە قوسۋ, جەتىساي اۋدانىندا توقىما فابريكاسىن, بايدىبەك اۋدانىندا تاۋىق جۇمىرتقاسىن وندىرەتىن قۇس فابريكاسىن قۇرۋ, دىمقىل مايلىقتار مەن بالالار جورگەكتەرىن شىعارۋ باعىتىندا قولدانىستاعى جەلىنى كەڭەيتۋ بويىنشا جانە تاعى باسقا باعىتتا ىنتىماقتاستىق تۋرالى مەموراندۋمعا قول قويىلىپ, كەلىسىمدەر جاسالدى.
جيىندا ينۆەستورلارعا پەرسپەكتيۆالى ينۆەستيتسيالىق جوبالارمەن جانە ولاردى وڭىردە ىسكە اسىرۋ ءۇشىن جاعدايلارمەن تانىسۋعا مۇمكىندىك بەرىلدى. فورۋم بارىسىندا جوبالاردى بىرلەسىپ دامىتۋ ءۇشىن بيزنەس-قوعامداستىق, جەرگىلىكتى بيلىك جانە ينۆەستورلار اراسىندا ستراتەگيالىق سەرىكتەستىكتەر ورناتىلىپ, قاتىسۋشىلار تاجىريبە الماستى.
