دۋالدى جۇيە - تەوريا مەن پراكتيكانى ۇشتاستىرا وقىتۋ ءتۇرى. وقۋ ورىندارى مەن كاسىپورىنداردىڭ ءوزارا ءتيىمدى ىنتىماقتاستىعى شەڭبەرىندە ستۋدەنتتەر ءبىلىم بەرۋ مەكەمەسىندە تەوريالىق ءبىلىم الادى, ال پراكتيكالىق داعدىلاردى بەيىندى ۇيىمداعى جۇمىس ورنىندا بەكىتەدى.
بولاشاق ماماندار ءۇشىن – بۇل قارجىلىق تاۋەلسىزدىك الۋدىڭ تاعى دا ءبىر تاماشا مۇمكىندىگى, ويتكەنى ولار وقۋ كەزىندە كاسىپورىنداردان 150-200 مىڭ تەڭگە كولەمىندە جالاقى الادى. بۇدان باسقا, وندىرىستىك پراكتيكا كەزەڭى اۆتوماتتى تۇردە ەڭبەك وتىلىنە الىنادى. كوللەدجدى بىتىرگەننەن كەيىن جاقسى دايارلىقتان وتكەن جۇمىسىنا قايتا ورالۋ مۇمكىندىگى بار.
– دۋالدى وقىتۋ بويىنشا جۇك كوتەرگىش كرانداردىڭ ءماشينيسى ماماندىعىن الامىن, – دەيدى وسكەمەن قۇرىلىس كوللەدجىنىڭ ەكىنشى كۋرس ستۋدەنتى پاۆەل پروكوپچيك. – «VK Development Group» جشس-دە ماماندىقتىڭ بارلىق قىر-سىرىنا ۇيرەتەتىن تالىمگەرىم بار. جاقسى مامان بولعىم كەلەدى جانە وقۋدى اياقتاپ, وسى كومپانياعا قايتا ورالىپ جۇمىس ىستەگىم كەلەدى.
ءوڭىردىڭ كاسىپورىندارى دا ىنتىماقتاستىقتىڭ وسىنداي تۇرىنە مۇددەلى. بۇل – وندىرىستىك مىندەتتەردى وڭاي ورىندايتىن بىلىكتى مامان الۋدىڭ تاماشا مۇمكىندىگى.
– 2013 جىلى دۋالدى ءبىلىم بەرۋ جۇيەسىن ەنگىزۋ اياسىندا ءبىزدىڭ كومپانيا ستۋدەنتتەردىڭ كاسىبي داعدىلارىن الۋى ءۇشىن وندىرىستىك الاڭعا اينالدى. وسكەمەن جوعارى پوليتەحنيكالىق كوللەدجىمەن ىنتىماقتاستىقتا «جىلۋ ەلەكتر ستانتسيالارىنىڭ جىلۋ ەنەرگەتيكالىق قوندىرعىلارى» ءبىلىم بەرۋ باعدارلاماسى اياسىندا جۇمىس جۇرگىزىلىپ جاتىر. قازىر بىزدە بەس ستۋدەنت تاجىريبەدەن ءساتتى وتۋدە, – دەيدى «وسكەمەن جەو» جشس كورپوراتيۆتىك وقىتۋ ورتالىعىنىڭ جەتەكشىسى ناتاليا سلوبودچيكوۆا. – وسىلايشا, كادرلاردى ءوزىمىز تاربيەلەيمىز. ستۋدەنتتەر وندىرىستىك پروتسەسكە ءسىڭىسىپ, تولىققاندى قىزمەتكەرلەرگە اينالادى. 2021 جىلى دۋالدى وقىتۋ جۇيەسى بويىنشا العاشقى تۇلەكتەردى دايارلاپ شىعاردىق, قازىر ولاردىڭ كەيبىرى ءبىزدىڭ ستانتسيادا جۇمىس ىستەپ ءجۇر.
شقو ءبىلىم باسقارماسىنىڭ حابارلاۋىنشا, بۇگىنگى تاڭدا وڭىردەگى كوللەدجدەردە دۋالدى جۇيە بويىنشا 46 ماماندىق بويىنشا 3908 ستۋدەنت ءبىلىم الىپ جاتىر. دايارلىق «كازتسينك» جشس, «وسكەمەن جەو» جشس, «سوگرا جەو» جشس, «سمۋ-شىعىس» جشس, «ريددەر ورمان شارۋاشىلىعى» قمم جانە باسقا دا كاسىپورىندارمەن سەرىكتەستىكتە جۇرگىزىلەدى.
