رامازان ستامعازيەۆ – ريشاتتىڭ ۇستازى. ۇستازى دا مىقتى, ءوزىنىڭ تالابى دا تاس جارىپ تۇر, بۇگىندە ءان بيىگىندەگى تالانت. قازاقتىڭ قارا دومبىراسىن بالا كەزدەن سەرىك ەتكەن جاس تالانت كوپتىڭ كوزىنە ەرتەرەك تۇسسە كەرەك. جاقىن-جۋىعى جارقىراعالى تۇرعان بالانى ونەرگە بارۋعا كەڭەستەرىن بەرەدى. ءسويتىپ, 1996 جىلى جەزقازعان مۋزىكالىق كوللەدجىنە وقۋعا تۇسەدى. نەگىز بار, ءبىلىمىن ارمەن جەتىلدىرۋ كەرەك, الماتىداعى قۇرمانعازى اتىنداعى ۇلتتىق كونسەرۆاتورياسىنا اتتانادى. ۇلت ونەرىنىڭ ۇلكەن ۇستاحاناسىندا 2000 جىلدان 2004-كە دەيىن ايگىلى ءانشى رامازان ستامعازيەۆتەن ءتالىم الادى. كىل مىقتىلاردان ءان ايتۋدىڭ, دومبىرا تارتۋدىڭ قىر-سىرىن مەڭگەرىپ كەلىپ, 2005 جىلى قالي بايجانوۆ اتىنداعى كونتسەرتتىك بىرلەستىك قۇرامىنداعى «ارقا سازى» فولكلورلىق انسامبلىنە قابىلدانادى.
وسى ۋاقىتتا شابىتى شارىقتايدى. قابىرعالى ونەر ۇجىمىنىڭ قاتارىندا ءجۇرىپ رەسپۋبليكالىق بايقاۋلارعا قاتىسادى. جۇسىپبەك ەلەبەكوۆ, قاسىم امانجولوۆ, دانەش راقىشەۆ جانە تاعى دا باسقا تۇلعالاردىڭ اتىنداعى بەدەلدى كونكۋرستاردىڭ لاۋرەاتى اتانىپ, بيىل ۇلتتىق ونەرگە قوسقان ۇلەسى ەلەنىپ, وبلىس اكىمىنىڭ «جىلدىڭ ۇزدىك ءانشىسى» سىيلىعىن الدى.
ءانشى كەشىنىڭ شىمىلدىعىن اسەت نايمانباەۆتىڭ «قوڭىر قازىمەن» تۇرەدى. ءا دەگەن بەتتە كوپشىلىكتىڭ الدىندا كوسىلىپ سالا بەردى. ماناربەك ەرجانوۆتىڭ «قويشىنىڭ ءانىن» دە شىرقادى.
ءبىرشاما اننەن كەيىن كەزەك قۇرمەتتى مەيماندارعا بەرىلدى. اقجارما تىلەكتەرىن ايتىپ, سىيلىقتارىن تارتۋ ەتتى. شەت اۋدانى اكىمىنىڭ قۇتتىقتاۋىن ورىنباسارى ورال زامىربەك ۇلى جەتكىزدى.
اۋدان اكىمى مۇحيت مۇحتاروۆ ءوز حاتىندا بىلاي دەپ جازىپتى: ء«سىزدى ءبىز ۇلتىمىزدىڭ بەكزادا ونەرى – ءداستۇرلى ءان مۇراسىن دارىپتەپ, حالىق اندەرىن كەيىنگى بۋىنعا ناسيحاتتاپ جۇرگەن كۇمىس كومەي, جەز تاڭداي ءانشى, ۇلاعاتتى ۇستاز, تالانتتى جەرلەسىمىز رەتىندە تانيمىز ءارى ونەرىڭىزدى جوعارى باعالايمىز. بۇگىنگى اسەم ءان كەشىڭىز تىڭدارمانىڭىزعا دەگەن ىستىق ىقىلاسىڭىز بەن ورنەكتى ونەر الەمىنە دەگەن ادال ۇستانىمىڭىزدىڭ تاعى ءبىر كورىنىسى دەپ بىلەمىز», دەلىنگەن.
كەشتىڭ قۇرمەتتى قوناعى رامازان ستامعازيەۆ شاكىرتىنە اعالىق لەبىزىن ءبىلدىرىپ, انمەن شاشۋ شاشتى.
– بۇگىنگى ءان كەشىنە كەلگەنىمە قۋانىپ تۇرمىن. ويتكەنى ءار ديقان ءوزى ەككەن ءدانىنىڭ جايقالعانىن, وسكەنىن, ونگەنىن كورگىسى كەلەدى. ريشات شابدەنوۆ تە وسىدان پالەنباي جىل بۇرىن مەنەن ساباق الىپ, قاناتىن قاققان ەدى. بۇگىندە ونەر ولكەسىندە كوسىلىپ ءجۇر. شاكىرتىمە ۇلى ءھام قاسيەتتى ساپاردا تەك ساتتىلىك تىلەيمىن. مەنىڭ سىنىبىما تۇسكەن شاكىرتتەردىڭ اراسىنداعى بىرەگەيى بولدى. بۇگىندە ونەرىن سۇيگەن حالقىنا ارناپ جاتىر ەكەن. حالقىنىڭ باتاسى ءتيسىن, – دەدى ر.ستامعازيەۆ.
كەش يەسى دە شىعارماشىلىق كەشىن تۇيىندەر ساتتە ەلىنىڭ الدىندا اعىنان جارىلدى.
– ءبىزدىڭ اسىل مۇراتىمىز – اتا-بابادان جەتكەن ۇلى مۇرانى كەلەشەك بۋىنعا ءوز بيىگىندە جەتكىزۋ. سول ءۇشىن تىنباي ەڭبەك ەتىپ كەلەمىز. قادىرمەندى تىڭدارمان, ءان دەپ سوققان جۇرەكتەرىڭىزدەن اينالدىم. قازاقتىڭ ونەرى جاساسىن! ءانىمىز شارىقتاي بەرسىن, – دەدى ر.شابدەنوۆ.
ءانشىنىڭ قۇشاعى گۇلگە تولدى. يىعىنا ءتۇرلى شاپان دا جابىلدى. باستىسى, ەلىنىڭ رياسىز قوشەمەتىنەن راحات الدى.
