جارمەڭكەدە بۇقار جىراۋ اۋدانىنىڭ شارۋاشىلىقتارى 8,5 توننا مال ەتىن, 1,3 توننا قۇس ەتىن, 1,5 توننا ءسۇت ونىمدەردىن, 50 مىڭ دانا جۇمىرتقا, 8 توننا كارتوپ, 1,5 توننا ءسابىزدى ساۋداعا شىعاردى. ال وساكاروۆ شارۋالارى 6,5 توننا ەت, 20 توننا كارتوپ, 2 توننادان ءسابىز, ورامجاپىراق, ءسۇت ونىمدەرىن ساتتى.
دالا ءدامى بازارداعى باعادان الدەقايدا تومەن ساۋدالاندى. ماسەلەن, سيىر ەتىنىڭ ءار كيلوسى – 2 300, جىلقى – 2 600, كارتوپ – 100, جۇمىرتقانىڭ 10 داناسى 430 تەڭگەدەن ساتىلىپ, تەمىرتاۋلىقتار ولاردى مولىنان ساتىپ الىپ, قورجىندارىن تولتىرىپ جاتتى.
جارمەڭكەگە 2 سيىر مەن 1 جاباعىنىڭ ۇشاسىن اكەلگەن وساكاروۆ فەرمەرى بايبولات ءۇرىمحاننىڭ جاباعىسى ەرتەمەن ءوتىپ كەتىپتى. قالا تۇرعىنى رايحان قايىربەكوۆا سيىردىڭ جارتى ەتىن ولشەتىپ الدى.
«اۋىلدان كەلگەن ازىق-ت ۇلىكتىڭ قۇنارى مول, ەكولوگيالىق تازا دەپ سانايمىز. مىنە, سەمىز سيىردىڭ جارتى ەتىن ساتىپ الدىم. ءبىر قىسقا جەتەدى. باعاسى دا بازارداعىدان ارزان», دەيدى ر.قايىربەكوۆا.
ال بۇقار جىراۋ اۋدانىنىڭ سورەلەرىنەن تور قالتالارىن تولتىرىپ الىپ جاتقان جۇرتتىڭ كوڭىلى توق, ءجۇزى شات. ساۋداگەر دە ءماز, دالا دامىنە قارىق بولعان قالا جۇرتى دا قۋانىشتى. ونىمەن قوسا قالانىڭ ۇلتتىق-مادەني ورتالىقتارى ونەرپازدارىنىڭ جارمەڭكە باسىنداعى كونتسەرتى دە كوپشىلىكتىڭ كوڭىلىنەن شىعىپ جاتتى.
تاڭەرتەڭنەن قىزعان جارمەڭكەنىڭ ساۋداسى مەن دۋمانىنىڭ ىشىندە تەمىرتاۋ قالاسىنىڭ اكىمى وراز تاۋىربەكوۆ باستاعان اكىمدىك قىزمەتكەرلەرى وسىنداعى ساۋدا ءتارتىبى مەن ۆەتسانيتارلىق تالاپتاردىڭ بۇزىلماي, قاتاڭ ساقتالۋىن جارمەڭكە اياقتالعانشا قاداعالاپ, باقىلاۋدا ۇستادى.
قاراعاندى وبلىسى,
تەمىرتاۋ قالاسى
