بەسقاۋعاداعى قايعىلى وقيعا

ەكىباستۇزدان 55 شاقىرىم جەردە ورنا­لاسقان بەسقاۋعا اۋىلىندا تۇراتىن جەتكىن­شەك­تىڭ جوعالعانى تۋرالى حابار العاش 17 قاراشا كۇنى كەشكىلىك پوليتسيادا تىركەلەدى. ميلا­نانىڭ اناسى ىشكى ىستەر ورگاندارىنا ءوزى حابارلاسىپ, قىزىن ىزدەپ تابۋدى وتىنگەن. بۇل كۇنى تەك ەكىباستۇز اۋماعىندا عانا ەمەس, تۇتاس وبلىستا دابىل قاعىلىپ, پوليتسيانىڭ جەكە قۇرامى مەن قۇتقارۋشىلار ىزدەۋگە كى­رىستى. بالانىڭ جوعالعانى تۋرالى اقپارات جەر­گى­لىكتى چاتتار ارقىلى تاراپ, ىزدەۋگە ەرىكتىلەر مەن جەكە ازاماتتار دا جۇمىلدى. ولاردىڭ سانى جەكسەنبى كۇنى 400 ادامنان اسقان.

اناسى پوليتسەيلەرگە ايت­قان­داي, ول بالالارىن جيناپ, الىس فەرمادا مال باعىپ جۇرگەن كۇيەۋىنە بارماقشى بولعاندا ميلانا ۇيدەن قاشىپ كەتكەن. سودان قىزىن جوعالتقان-مىس. الايدا ءتارتىپ ساقشىلارى مەن ەرىكتىلەر توڭىرەكتىڭ ءبارىن تۇگەل ءتىنتىپ, قاراماعان جەرلەرى جوق. اكەسى الەكساندر كولچين دە بىردەڭەدەن سەزىكتەندى مە: «قىزىمدى جەر جۇتىپ كەتپەسە, وسى ۋاقىتقا دەيىن تابىلاتىنداي بولدى عوي. قانشاما ادام كومەكتەسۋگە كەلىپ جاتىر. بالكىم الدەبىرەۋلەر ۇرلاپ كەتكەن بولار. بۇعان دەيىن وسىنداي قىلىق تانىتىپ, ۇيدەن كەتىپ قالعانى بار ەدى. الايدا ءدال مۇنداي ەكى تاۋلىك بويى جوعالىپ كەتۋى مۇمكىن ەمەس», دەگەن ەدى جەكسەنبى كۇنى تاڭەرتەڭگىلىك.

ميلانانى ىزدەستىرۋ 3 تاۋلىككە جۋىق جالعاستى. بىراق ىزدەستىرۋ توپتارى قىزدى تابۋعا ايعاق بولاتىنداي ەشتەڭەگە كەزىگە المادى. اقىرى پوليتسەيلەر اناسىندا ءبىر گاپتىڭ بارىن سەزدى مە, ونى قايتا-قايتا جاۋاپقا تارتقان. جەتكىنشەكتىڭ بەلگىسىز سەبەپپەن جوعالىپ كەتۋىنىڭ ءمان-جايلارى بىرتىندەپ انىقتالىپ, وقيعانىڭ جەلىسى ايقىندالا باستادى. ناتيجەسىندە, اناسى بالاسىن ءوز قولىمەن ولتىرگەنىن مويىندادى. ءتارتىپ ساقشىلارىنا بەرگەن جاۋابىندا ول قىزىن بايقاماي قاتتى سوعىپ جىبەرگەنىن, سونىڭ سالدارىنان بەيكۇنا جەتكىنشەكتىڭ ءتىل تارتپاي كەتكەنىن بايانداعان. ال اۋىلدا تۇراتىن تانىسى ميلانانىڭ مۇردەسىن جاسىرۋعا كومەكتەسكەن.

«كامەلەتكە تولماعان بالانى ءولتىردى دەگەن كۇدىكپەن پوليتسيا قىزمەتكەرلەرى قىلمىستىڭ ءىزىن جاسىرعان اناسى مەن ونىڭ تانىسىن ۇستادى. ۇستالعاندار قىلمىسىن مويىندادى. ادام ءولتىرۋ فاكتىسى بويىنشا قىلمىستىق كودەكستىڭ 99-بابى 3-بولىگى نەگىزىندە سوتقا دەيىنگى تەرگەۋ باستالدى. قازىرگى ۋاقىتتا قاجەتتى تەرگەۋ ارەكەتتەرى جۇرگىزىلىپ جاتىر. وقيعا ورنىندا مامانداندىرىلعان توپ جۇمىس ىستەۋدە. پاۆلودار وبلىسى پوليتسيا دەپارتامەنتىنىڭ, پروكۋراتۋرانىڭ جانە ءوڭىر اكىمدىگىنىڭ باسشىلىقتارى بار», دەپ مالىمدەدى وبلىستىق پوليتسيا دەپارتامەنتى باستىعىنىڭ ورىنباسارى بولات نۇرسەيىتوۆ.

جۇرت اراسىندا قازىرگى ۋاقىتتا ميلانانىڭ اناسىنا قاتىستى ءتۇرلى اڭگىمە جەلدەي ەسىپ تۇر. تانيتىندار ونىڭ پسيحيكاسىندا اقاۋ بار, ونداي بولماعاندا ءوز بالاسىن ولتىرۋگە بارماس ەدى دەپ اقتاۋعا تىرىسادى. ەندى بىرەۋلەر قىزى اناسىنىڭ الدەبىر قىلىقتارىن اكەسىنە ايتۋعا تالپىنعانى ءۇشىن سوققى الىپ, ءجانتاسىلىم ەتتى دەپ ەسەپتەيدى. باۋىر ەتى بالاسىن ءوز قولىمەن ءولتىردى دەگەنگە كوپ ادامداردىڭ سەنگىسى جوق. وقيعانىڭ شىنايى سەبەپ-سالدارىن الداعى ۋاقىتتا پوليتسەيلەر انىقتاي جاتار.

ميلانانى ىزدەستىرۋ ءىس-شارالارىنا ەلمەن بىرگە جۇمىلعان وبلىستىق ءماسليحات دەپۋتاتى اسىلبەك تۋعانباي: «بولعان وقيعا قابىرعامىزدى قايىستىردى», دەيدى. «بەسقاۋعا اۋىلىنا بارىپ, كىشكەنتاي ميلانانى ىزدەۋ جۇمىستارىنا شاما-شارقىمىزشا اتسالىسۋعا تىرىسقان ەدىك. امال نەشىك... سوڭى قايعىلى اياقتالارىن كىم بىلگەن؟ وكىنىشكە قاراي, قوعامدا ىشكىلىككە سالىنعان, تۇرمىسى تومەن وتباسىلار از ەمەس. ءبىز وسىنداي جايسىز شاڭىراقتارداعى بالالاردىڭ بولاشاعىنا مۇقيات بولۋىمىز كەرەك. جەرگىلىكتى اتقارۋشى بيلىك, جاۋاپتى مەكەمەلەر, مەكتەپ, قوعام وكىلدەرى تاراپىنان جان-جاقتى باقىلاۋدى كۇشەيتكەن ءجون. وبلىس بويىنشا جايسىز ورتادا تاربيەلەنىپ جاتقان بالالاردى انىقتاپ, ارنايى مونيتورينگ جاسالۋعا ءتيىس. تۇرمىسى تومەن وتباسىلارداعى بالالار مەن ولاردىڭ اتا-انالارىنا قاتىستى دا پسيحولوگيالىق كو­مەكتى كۇشەيتۋ قاجەت دەپ ەسەپتەيمىن. قو­عام بولىپ وسىنداي وتباسىلارعا قولداۋ كور­سە­تۋدىڭ جولدارىن قاراستىرعان ءجون», دەيدى ول.

دۇيسەنبى كۇنى بالا قۇقىقتارى جونىندەگى ۋاكىل دينارا زاكيەۆا ميلانانىڭ ولىمىنە قاتىستى پىكىر ءبىلدىردى. ونىڭ ايتۋىنشا, بيىل ەلىمىزدە 25 بالا كوز جۇمسا, ونىڭ 6-اۋى جاقىن ادامدارىنىڭ قولىنان قازا تاپقان. «كىسى قولىنان مەرت بولعان 7 جاسار قىز تابىلدى. الدىن الا بولجام بويىنشا كۇدىكتى رەتىندە ۇستالعان بالانىڭ اناسى كىناسىن مو­يىندادى. بۇل وتباسىنىڭ وزگە بالالارى ارنايى ورتا­لىق­قا ورنالاستىرىلادى», دەپ مالىمدەدى د.زاكيەۆا. ول مۇنداي اۋىر زارداپتار كوبىنە كەلەڭسىزدىكتىڭ, ىشىمدىكتىڭ, وتباسىنداعى زورلىق-زومبىلىقتىڭ سالدارىنان تۋىنداپ جاتاتىنىن ايتادى.

پاۆلودار وبلىسى,

ەكىباستۇز اۋىلدىق ايماعى