«كورەرمەندەر قويىلىمدى جاڭا قىرىنان تاماشالادى دەپ ويلايمىن. ءتىپتى سوليستەر دە وزگەرگەن, ويتكەنى ولاردىڭ وقيعا جەلىسىن وي ەلەگىنەن وتكىزۋگە, وسى حيكايا تۋرالى ويلانۋعا ۋاقىتى بولدى. مەن ولاردىڭ ءوز رولدەرىن جاڭاشا بايانداپ, كەيىپكەرلەرىنە باسقاشا قارايتىنىن بايقادىم. ترۋپپا كەرەمەت دايىندالعان, بۇل تۇرعىدا ۇجىمنىڭ ۇستاز بالەتمەيستەرلەرى زور ەڭبەك ەتتى. سپەكتاكلدىڭ قۇرامى جاڭارعانىنا, وندا كەيىپكەرلەرىنە جاڭاشا كوزقاراسپەن قارايتىن جاڭا ارتىستەردىڭ پايدا بولعانىنا ريزامىن. ماسەلەن, ءمادينا ونەرباەۆا تاماشا جاڭا ماحاببات دەپ ايتار ەدىم. سىزىقتاردى ادەمى كەلتىرەتىن سوفيا ءادىلحانوۆا كەيىپكەرىمەن تياناقتى جۇمىس ىستەگەن. سىرقاتتى سومدايتىن سۇلتانبەك عۇمار, بەتحوۆەننىڭ بەينەسىندەگى ارمان ورازوۆ ءوز پارتيالارىنا جاڭاشا بوياۋ قوسقان. شىندىعىن ايتقاندا, قازىر ترۋپپادا كەمەلىنە كەلگەن ارتىستەر مەن جاستاردىڭ تەڭگەرىمى بار», دەدى قويۋشى حورەوگراف رايموندو رەبەك.
تاماشا تۋىندىعا شەبەر حورەوگرافيا, عاجاپ مۋزىكا مەن ۇلى ليۋدۆيگ ۆان بەتحوۆەننىڭ ءومىرىن بەينەلەيتىن جان تەبىرەنتەرلىك حيكايا بىرىكتىرىلگەن. مۋزىكانىڭ اسەمدىگى تۋرالى ايتقاندا, سيمفونيالىق وركەستردىڭ, وپەرا ترۋپپاسىنىڭ سوليستەرى مەن حوردىڭ ەڭبەگى ەرەكشە بولدى. نەمىس بالەتمەيستەرى جۇرتشىلىققا تەرەڭ ماعىنالى بىرەگەي سپەكتاكلدى ۇسىنا وتىرىپ, بيدە ەموتسيالىق الۋاندىلىقتى, تراگيزم مەن كومپوزيتوردىڭ ىشكى الەمىن اشىپ كورسەتە ءبىلدى.
سونداي-اق دارىندى جاپون سۋرەتشىسى يوكو سەياما بەزەندىرگەن ساحنادا بەتحوۆەننىڭ ءومىر تاريحى كوركەم بەدەرلەنگەن. كومپوزيتوردىڭ بالالىق شاعىنان باستاپ, ءومىرىنىڭ قيىن كەزەڭدەرى, شىعارماشىلىق جەتىستىكتەرى مەن قۋانىشتارى – ستسەنوگرافيادا ايشىقتى كورىنىس تاپقان. بەتحوۆەننىڭ, سونداي-اق باح, گايدن, موتسارت پەن زاماناۋي كومپوزيتور ديرك ءحاۋبريحتىڭ تۋىندىلارىنا نەگىزدەلگەن مۋزىكالىق تاڭداۋ وتە ءساتتى ۇيلەستىرىلگەن. قازاقستاننىڭ ەڭبەك سىڭىرگەن قايراتكەرى دولورەس ۇمبەتاليەۆا ورىنداعان ادەمى سولو كوڭىل پەرنەسىن تاپ باستى. ول ي.س.باحتىڭ «پرەليۋديە دو-مينور» شىعارماسىن, ل. ۆان بەتحوۆەننىڭ وركەستر مەن فورتەپيانوعا ارنالعان №4 كونتسەرتىن (ەكىنشى ءبولىم), «ەليزاعا» شىعارماسىن, №14 اي سوناتاسىن ء(بىرىنشى ءبولىم), وركەستر مەن فورتەپيانوعا ارنالعان №5 كونتسەرتىن (ەكىنشى ءبولىم) شەبەر ورىندادى.
ء«بىز سپەكتاكلگە ءبىر اي بۇرىن دايىندالا باستادىق. رايموندو رەبەك كەلگەننەن كەيىن ءبيدىڭ تازالىعىن تەكسەرىپ, كەيبىر وزگەرتۋلەر ەنگىزدى. دەگەنمەن جاڭارتىلعان نۇسقا تۇپنۇسقادان ەش وزگەرگەن جوق. ءوزىم ورىنداعان پارتيامدى ايتسام, ايگىلى كومپوزيتور بەتحوۆەننىڭ ءرولىن سومداۋ مەن ءۇشىن ۇلكەن ابىروي بولدى. دايىندىق بارىسىندا بەتحوۆەننىڭ ءومىر جولىن ءبىراز زەرتتەدىم. ءوزىم جارتىلاي مۋزىكانتقا اينالىپ, تولىق وبرازعا ەنىپ, كورەرمەنگە كومپوزيتوردىڭ كەمەڭگەر شىعارمالارى تۋرالى ايتىپ بەرە الدىم دەپ ويلايمىن. مەن بۇل سپەكتاكلدە بەتحوۆەننىڭ مۋزىكا الەمىندەگى مايتالمانداردىڭ ىشىندەگى عارىشقا ەڭ جاقىنى ەكەنىن جەتكىزۋگە تىرىستىم. بەتحوۆەن جان دۇنيەسى كەڭ, شىعارماشىلىق مۇراسى باي ادام بولعان, الايدا ول دەرتكە شالدىققاندىقتان, تاعدىرى قيىن بولدى», دەيدى قازاقستاننىڭ ەڭبەك سىڭىرگەن قايراتكەرى باقتيار ادامجان.
سونداي-اق تەاتردىڭ تالانتتى ارتىستەرى ءوز پارتيالارىن جوعارى دەڭگەيدە ورىنداپ, شەبەرلىكتەرىن بارىنشا كورسەتتى. اسىرەسە سوليستەردىڭ بالەتكە ەكپىن مەن ىرعاق قوسقان اكتەرلىك ويىندارى كەرەمەت. بەتحوۆەن بەينەسىن باقتيار ادامجان مەن ارمان ورازوۆ تاماشا الىپ شىقتى. ماڭگى وشپەيتىن ماحابباتتى قازاقستاننىڭ ەڭبەك سىڭىرگەن قايراتكەرلەرى ايگەرىم بەكەتاەۆا مەن ءمادينا ونەرباەۆا سومدادى. ەۆتەرپانى اسەل شايكەنوۆا مەن Cوفيا ءادىلحانوۆا وينادى. سىرقاتتى سەرىك ناقىسپەكوۆ پەن سۇلتانبەك عۇمار بەينەلەدى. سوليستەر ءبيدىڭ ءتىلى ارقىلى تاڭدامالى پا-دە-دە-دەن باستاپ, جىگەرلى انسامبلدىك نومىرلەرگە دەيىن حورەوگرافيانىڭ بارلىق نيۋانسىن جەتكىزدى. ترۋپپانىڭ ەرەكشە حاريزماسى مەن ورىنداۋ شەبەرلىگى كومپوزيتور ءومىرىنىڭ ءار ءساتىن ماڭىزدى اشىپ بەردى.
تۇجىرىپ ايتقاندا, بۇل قويىلىمدا ۇلى كومپوزيتوردىڭ ءومىرى عانا باياندالعان جوق, سونىمەن بىرگە كورەرمەنگە ونەردىڭ ولمەيتىنىن, مۋزىكانىڭ ماڭگىلىك ەكەنىن, ونىڭ عاسىردان-عاسىرعا جالعاسا بەرەتىنى جايىندا استارمەن پاراساتتى وي ايتىلدى.
