سونىمەن «قاراشادا ءومىر تۇر…» اتتى ادەبي-سازدى كەش پوەزيا بەكەتىنەن شىققان پويىزدىڭ قاراعاندىعا كەلىپ توقتاۋىنان باستالادى. وسى ءبىر مەزەتتە س.سەيفۋللين اتىنداعى وبلىستىق اكادەميالىق قازاق دراما تەاترىنىڭ ارتىستەرى ساحنا الاڭىنا شىعىپ, كەش تامامدالعانشا تەاترلاندىرىلعان قويىلىمدى ءساتتى ءوربىتىپ شىعادى. ايتپاقشى, اقىنداردىڭ دا اكتەرلىك شەبەرلىكتەرىنە جۇرت قايران قالىستى.
ءارتىس جىگىتتەر ادەبي قويىلىمدى جۋرناليستيكانىڭ جامپوزى نۇرماحان ورازبەكوۆتىڭ قاراعاندىعا كەلىپ, قارقارالىدان الاپات اقىن سەرىك اقسۇڭقار ۇلىن الدىرعانىنان باستايدى. سول ساتتە كورەرمەننىڭ اراسىنان سەرىك اقسۇڭقار ۇلى مەن قويلىباي اسان ساحناعا كوتەرىلىپ, ولەڭدەرىن تەبىرەنىپ تۇرىپ وقيدى. سودان سوڭ داۋلەت ىرىسباي ۇلىنىڭ «قاراعاندى ءۆالسى» ءانىن مەدەت وساتاەۆ ورىندايدى.
ساحناداعى ارتىستەر ارمەن قاراي ادەبي كەشتى بىلاي وربىتەدى. ەرتەدە «قازاق ادەبيەتى» گازەتىنە اقسۇڭقار ۇلى الماتىعا اباداندارىن ەرتىپ كەلگەنى جونىندە جازىلعانىن ايتىپ, سول كەزدەگى ادۋىندى بۋىندى ورتاعا الدىرادى. سەرىك ساعىنتاي, رۋسلان نۇرباي, قايرات اسقار جالىنداپ تۇرىپ جىرلارىن وقيدى. الدىڭعى بۋىن اعالارىن ىزدەپ, پوەزيا مەيرامحاناسىنا بەت الادى.
ودان كەيىنگى بۋىننىڭ ولەڭى دە, ونەرى دە كورەرمەننىڭ ىستىق ىقىلاسىنا بولەنەدى. اقىندار سۇلتان داۋلەتحان ۇلى, ءىلياس مۇقاي, جالەل قۋاندىق ۇلى, ەلميرا سايلاۋقىزىنىڭ سىرشىل ولەڭدەرىنە كەزەك بەرىلەدى. ءساتتىباي ءجۇنىسوۆتىڭ گيتارامەن شىرقاعان, ەرقانات كەڭەسبەك ۇلىنىڭ دومبىرامەن ورىنداعان ءانى اسەرلى شىعادى.
ال ءانشى سايان بودەس ورتاعا سۋىرىلىپ شىعىپ, اقىنداردىڭ قۇرمەتىنە ەرلان تولەۋتايدىڭ «سەن جانە مەن» ءانىن اۋەلەتەدى.
بۇدان كەيىنگى جاس تولقىن دا ورتاعا جارقىراي شىقتى. ەرىك نارىن ۇلى ءوزىنىڭ ولەڭىنەن سوڭ, گيتارانىڭ سۇيەمەلدەۋىمەن ليريكالىق ءانىن شەبەر ورىندادى. ادىلەت شوپەننىڭ پوەزياسىنا دا ىقىلاس ەرەكشە بولدى. سالتانات قايىربەكتىڭ اسەم اۋەنىنە دە ەلىتتىك.
ادەبي-سازدى كەشتىڭ قورىتىندىسى ەل جۇرەگىن, ءتىپتى ەلجىرەتىپ جىبەرەدى. كورەرمەننىڭ كوز جانارىنا جاس ۇيىرتەدى. شاحتەرلەردىڭ جەر استىنداعى ەرەن ەڭبەگىن قويىلىم ارقىلى كورسەتە وتىرىپ, سالتانات قايىربەكتىڭ «كەنشىنىڭ شامى», جانات جاڭقاش ۇلىنىڭ «قۇربانداردىڭ قانى» ولەڭى كۇڭىرەنە وقىلادى. بارلىق اقىن ساحناعا شىعىپ, ءبىر-ءبىر قىپ-قىزىل گۇل شوعىن قويىپ, كەنشىلەر رۋحىنا تاعزىم ەتەدى. كورەرمەن تىك تۇرىپ, قوشەمەت كورسەتەدى. سەبەبى بۇل كەش بۇعان ابدەن لايىقتى-اق.
«قاراشادا ءومىر تۇر…» اتتى ءداستۇرلى پوەزيا كەشىمىز وسى جىلى ميۋزيكلعا اينالىپ, ءبىر ساعات كورەرمەننىڭ كوڭىلىن تەڭىزدىڭ تولقىنىنداي تەربەدى. بۇل ءوزى ءبىر جاعى سەرىك اقسۇڭقار ۇلى باستاعان قاراعاندى ادەبي ورتاسىنىڭ عۇمىرىنا ءبىر ساعاتتىق شولۋ دەسەك تە بولادى. كەش سوڭىندا شاحتەرلەرگە ارنالعان ولەڭدەر وقىلىپ, كورەرمەننىڭ كوزىنە جاس ءۇيىرىلدى. «قاراشادا ءومىر تۇر». ياعني بۇل جەردە قاراعاندىنىڭ ءومىرى قامتىلدى. قۋانىشى دا, قايعىسى دا. ءبىر توپ ءدۇلدۇل اقىنداردىڭ بۇلبۇل ءانشى ەكەنىنە كوز جەتتى. رەجيسسەرلىك جۇمىستا سۇلتان سەرىكتىڭ شەبەرلىگىنە ءتانتىمىز. شىلبىرىمىزدى تارتپاي, شىعارماشىلىق ەركىندىك بەرگەن قالا اكىمدىگىنە ەرەكشە العىس ايتامىز», – دەيدى قازاقستان جازۋشىلار وداعى قاراعاندى وبلىستىق فيليالىنىڭ توراعاسى, اقىن جانات جاڭقاش ۇلى.
ۇتىمدى ۇيىمداستىرۋشىلاردىڭ قاتارىنداعى بەلگىلى پروديۋسەر اسحات قاجىتايدىڭ دا قاجىرلى ەڭبەگىن اتاپ وتكەنىمىز ءجون.
تۇيىندەي كەتسەك, قاراعاندى قاراشىعىنداعى قاراشا وسىلاي ءوتىپ جاتىر. مۇندا ولەڭ دە, ءومىر دە بار…
قاراعاندى وبلىسى
