سينوپتيكتەر الداعى كۇندەرگە كوڭىل كونشىتەتىن بولجام ايتىپ وتىر. بەلسەندى تسيكلون اسەرىنەن قازاقستاندا قار جاۋىپ, بوران بولادى. جەل ەكپىنى كەي جەرلەردە سەكۋندىنا 28 مەترگە جەتەدى.
سينوپتيكتەردىڭ ايتۋىنشا, بيىل سوڭعى جىلدارداعى ەڭ جىلى كۇز بولدى. كوپتەگەن اۋداندارداعى اۋا رايىنا يران مەن جەرورتا تەڭىزى ايماقتارىنىڭ اۋا ماسسالارى اسەر ەتتى.
ال الداعى ءۇش كۇندە كاسپيدەن كەلە جاتقان بەلسەندى تسيكلون ەلىمىزگە جاۋىن-شاشىن اكەلەدى. ماماندار سارسەنبىدە ەلدىڭ باتىسى مەن سولتۇستىك-باتىسىندا قاتتى جاڭبىر جاۋاتىنىن ەسكەرتەدى.
الداعى كۇندەرى رەسپۋبليكانىڭ باتىسىندا اۋا تەمپەراتۋراسى 2-12 گرادۋس اياز بولادى, ال رەسپۋبليكانىڭ شىعىسىندا تۇندە تەمپەراتۋرا 8-13 گرادۋس ايازدان 0-5 گرادۋس جىلىعا دەيىن كوتەرىلەدى. قازاقستاننىڭ قالعان بولىگىندەگى تەمپەراتۋرا فونىندا وزگەرىس بولمايدى. سينوپتيكتەر كەلە جاتقان قىس قاتتى بولادى دەپ بولجادى, بىراق ودان قورقۋدىڭ قاجەتى جوق ەكەنىن ايتتى. جەلتوقسان, قاڭتار جانە اقپان ايلارىندا اۋا رايىنا اتلانت مۇحيتى ايماقتارىنان ىلعالدى اۋا ماسسالارىنىڭ ءجيى قوزعالىسى اسەر ەتەدى. سوندىقتان ەلىمىزگە 20 جىل بويى بولماعان قىس كەلەدى. دەگەنمەن, ساراپشىلار مۇنى انوماليا دەپ سانامايدى.
«2023-2024 جىلدارداعى قىس 2001-2002 جىلدارداعى قىس سەكىلدى وتەدى, ياعني جىلى جانە جاۋىن-شاشىن كوپ بولادى. الداعى قىستا قازاقستاندا اۋا تەمپەراتۋراسى كليماتتىق نورمادان 1-2 گرادۋسقا جوعارى بولادى دەپ كۇتىلەدى», دەيدى «قازگيدرومەت» رمك ءباسپاسوز حاتشىسى الينا يسماعۇلوۆا.
قازاقستاندا جاڭا جىلدىڭ باسىندا سينوپتيكتەردىڭ بولجاۋىنشا, قار ءجيى جاۋاتىن بولادى. ەلىمىزدىڭ سولتۇستىگى, شىعىسى مەن ورتالىعىنىڭ تۇرعىندارى قاتتى ايازعا دايىندالۋى كەرەك. تەرمومەترلەر -17-گە دەيىن تومەندەيدى.
