فوتو: rail-news.kz
پرەمەر-مينيستر تەمىرجول – كولىك سالاسىنىڭ جانە جالپى ەل ەكونوميكاسىنىڭ كۇرەتامىرى ەكەنىن اتاپ ءوتتى.
«ەلىمىز كوپتەگەن حالىقارالىق باعىتتار توعىساتىن, توعىز جولدىڭ تورابىندا ورنالاسقان. ازيا مەن ەۋروپا اراسىندا قازاقستان ارقىلى وتەتىن ترانزيتتىك تاسىمال كولەمى جىل سايىن وسە تۇسۋدە. تەك قانا قازاقستان مەن قىتاي اراسىنداعى تەمىرجولمەن جۇك تاسىمالداۋ وتكەن جىلى 23 ملن توننادان استى. بيىل بۇل كورسەتكىش تاعى 22%-كە ءوستى», دەدى ءاليحان سمايىلوۆ.
ۇكىمەت باسشىسى اتاپ وتكەندەي, بۇگىنگى تاڭدا جىلجىمالى قۇرام مەن ماگيسترالدىق جەلىلەردىڭ توزۋ دەڭگەيى شامامەن 60%-عا جەتىپ وتىر.
«شەكارادا جۇكتەردىڭ راسىمدەلۋىنە قاتىستى پروبلەمالار بار, بۇل ترانزيت, ەكسپورت جانە يمپورت كولەمىنە اسەر ەتەدى. سوندىقتان, بيزنەس ءۇشىن قۇجاتتاردى بارىنشا جىلدام قاراپ, دايىنداپ بەرەتىن ء«بىر تەرەزە» جۇيەسىن قۇرۋ قاجەت. بارلىق قىزمەتتەر جەدەل ءارى ءبىر مەزەتتە, ياعني سينحروندى تۇردە جۇمىس ىستەۋى ءتيىس», دەدى ءاليحان سمايىلوۆ.
ونىڭ ايتۋىنشا, تۇرعىندار تاراپىنان قتج قىزمەتىنە قاتىستى كوپتەگەن شاعىمدار كەلىپ تۇسەدى.
«بۇل – پويىزداردىڭ ۇنەمى كەشىگىپ كەلۋى, سەرۆيستىڭ ناشارلىعى, ەسكىرگەن ۆاگوندارعا قاتىستى. ال, بيزنەس بولسا ۆاگونداردىڭ ۋاقىتىندا بەرىلمەۋىن, ۇزىننان-ۇزاق كەلىسۋ راسىمدەرىن ايتىپ, شاعىمدانۋدا. وسىنىڭ بارلىعى بۇكىل ەكونوميكانىڭ دامۋىنا كەرى ىقپال ەتەدى», دەپ اتاپ ءوتتى پرەمەر-مينيستر.
جوعارىدا ايتىلعانداردى قورىتىندىلاي كەلە, پرەمەر-مينيستر كولىك, قارجى, اۋىل شارۋاشىلىعى مينيسترلىكتەرىنە, شەكارا قىزمەتى, «قازاقستان تەمىر جولى» جانە «سامۇرىق-قازىنا» قورىنا جىل سوڭىنا دەيىن جۇكتەردى راسىمدەۋدى وڭايلاتۋ ماسەلەسىن پىسىقتاۋدى تاپسىردى.
«قاراۋ مەرزىمى كەم دەگەندە 2 ەسە قىسقارۋى ءتيىس», دەدى ۇكىمەت باسشىسى.
