كەش شىمىلدىعى تاتتىمبەت اتىنداعى اكادەميالىق قازاق حالىق اسپاپتارى وركەسترىنىڭ «سارجايلاۋىمەن» ءتۇرىلىپ, كومپوزيتوردىڭ «تولاعايىمەن» تۇرلەندى. رەسپۋبليكالىق جانە حالىقارالىق كونكۋرستاردىڭ لاۋرەاتى ارايلىم جۇكەنوۆا جۇرەككە جەتكىزە شىرقادى. مادەنيەت سالاسىنىڭ ۇزدىگى ەرجان بازاربەكوۆ «ارقا ارۋى» ءانىن اۋەلەتتى. قازاقستاننىڭ ەڭبەك سىڭىرگەن قايراتكەرى جاقسىگەلدى كەمالوۆ «اسىل جاردى», قازاقستاننىڭ ەڭبەك سىڭىرگەن قايراتكەرى داۋرەنبەك اركەنوۆ «مەڭدى قىزدى», ءانشى ريشات شابدەنوۆ «ويىل تولقىنىن», دۋلات احانوۆ «تۇنگى سىر» مەن «دانياردىڭ ءانىن», مەدەت وساتاەۆ «بالقانتاۋدى», قازاقستاننىڭ مادەنيەت قايراتكەرى مەرۋەش باشاي «نەنى ويلادىڭ؟», «اسىلىم» اندەرىن شەبەر جەتكىزدى. «جايلاۋكول كەشتەرىن» «مەرەي» كۆارتەتى, «تەمىرتاۋ ءتۇنىن» «اۋەن» تريوسى ءساتتى ورىندادى. ءان كەشى «ەدىل مەن جايىق» انىمەن قورىتىندىلاندى.
ەستى انگە قۇلاق قۇرىشىن قاندىرعان سوڭ, كەش يەسى يليا جاقانوۆ پەن ءبىر توپ قۇرمەتتى قوناق ساحناعا كوتەرىلدى.
«قۇداي قۋات بەرىپ, توقسانعا قاراي بەت الدىڭىز. جۇزگە جەتىڭىز. ءانىڭىز اسقاقتاي بەرسىن, اعا», دەگەن وبلىس اكىمىنىڭ ورىنباسارى ەرلان قۇسايىن ءان اكادەميگىنىڭ يىعىنا شاپان جاۋىپ, ات مىنگىزدى.
يليا جاقانوۆتىڭ كوپ ءانى جاڭاارقاعا ارنالىپ جازىلعان. وسىنى ەسكەرگەن جاڭاارقا ەلىنەن دە ءبىر توپ ازامات ارنايى كەلىپ, قۇرمەت كورسەتتى. اۋدان اكىمىنىڭ ورىنباسارى اسەت امانجول دا يىعىنا شاپان كيگىزىپ, ەلدىڭ اتىنان ات مىنگىزدى. كوپ جىل ۇلاعاتتى ۇستاز بولعان وزبەك بيمەندين دە ءدال وسىنداي قۇرمەت ءراسىمىن جاسادى.
«شىعارمالارىمدى شالقىتقان سىزدەرگە راحمەت! وركەستردىڭ باس ديريجەرى ەرلان باقتىگەرەيگە دە مىڭ العىس. وبلىس اكىمشىلىگىنە, مادەنيەت باسشىلىعىنا شىن جۇرەكتەن العىس ايتامىن», دەپ ريزاشىلىعىن جەتكىزدى كەش يەسى.
قاراعاندى وبلىسى
