«وقۋ-اعارتۋ مينيسترلىگى مەن عىلىم جانە جوعارى ءبىلىم مينيسترلىگى «مەنىڭ باۋىرىم» ەرىكتىلەر جوباسىن ىسكە اسىرۋ تۋرالى ەكىجاقتى كەلىسىمگە قول قويدى. بىرلەسكەن قۇجات بالالاردىڭ قۇقىقتارىن قورعاۋعا جانە بالالارعا قاتىستى جوبالاردى ءتيىمدى باسقارۋعا, مەكتەپ وقۋشىلارىنىڭ قولايلى ءارى قاۋىپسىز ورتادا ءبىلىم الۋىنا قولايلى جاعداي جاساۋعا باعىتتالعان. وقۋ-اعارتۋ ءمينيسترى عاني بەيسەمباەۆ بالالاردىڭ قاۋىپسىزدىگىن قامتاماسىز ەتۋ مەملەكەتتىڭ ماڭىزدى مىندەتى بولىپ قالا بەرەتىنىن اتاپ ءوتتى. بۇل باعىتتا ۆەدومستۆو بىرقاتار شارالار قابىلداۋدا. ونىڭ ىشىندە الەۋمەتتىك جوبالاردى جۇزەگە اسىرۋ باعىتى دا بار.
«حالقىمىزدىڭ «اسار» دەگەن يگى ءداستۇرى بار. ياعني, بىرلەسىپ, ەرىكتى تۇردە جۇمىلا كومەكتەسۋدى بىلدىرەدى. ۆولونتەرلىك - وسى ۇلتتىق جانە جالپىادامزاتتىق قۇندىلىقتاردىڭ تىكەلەي كورىنىسى. ەرىكتىلەر ءوز ەلىنىڭ ناعىز پاتريوتى مەن ازاماتى رەتىندە بالالاردى جاقسىلىققا, ادىلدىككە, جاسامپازدىققا جەتەلەپ, شىعارماشىلىق شابىت بەرەدى دەپ سەنەمىز. «مەنىڭ باۋىرىم» ەرىكتىلەر قوزعالىسى بالالارىمىزدىڭ قۇقىقتارىن قورعاۋ باعىتىنداعى ىنتىماقتاستىعىمىزدى نىعايتا تۇسەرى ءسوزسىز», دەدى وقۋ-اعارتۋ ءمينيسترى عاني بەيسەمباەۆ.
بۇل جوبانىڭ قاتارىنا پەداگوگيكا, قۇقىقتانۋ, پسيحولوگيا, الەۋمەتتىك پەداگوگيكا جانە اقپاراتتىق تەحنولوگيالار ماماندىقتارى بويىنشا 3-5 كۋرستاردا وقيتىن جوو ستۋدەنتتەرى تارتىلماق. ەلوردانىڭ 171 مەكتەبىنىڭ وقۋشىلارىنا قولداۋ كورسەتەتىن 12 جوعارى وقۋ ورنىنىڭ 1300 ستۋدەنتىنەن تۇراتىن كوماندا قۇرۋ جوسپارلانىپ وتىر.
«قۇرمەتتى ستۋدەنتتەر, قازىرگى ءسات - ومىرلەرىڭىزدىڭ التىن كەزەڭى. وزدەرىڭىزدىڭ رەسۋرستارىڭىزدى جان-جاقتى دامۋعا: وقۋ, عىلىم, الەۋمەتتىك جانە قوعامدىق ومىرگە باعىتتايتىن ۋاقىت. اقش-تا «Community service», ياعني «قوعامدىق قىزمەت» دەگەن ءپان بار. ەلىمىزدەگى جوعارى وقۋ ورىندارىندا دا ول ەنگىزىلۋدە. 6 ۋنيۆەرسيتتە ءبىز ءبىرىنشى كەزەكتە پيلوتتىق جوبانى ىسكە قوستىق. بۇل وقۋ ورىندارىندا 100% اكادەميالىق كورسەتكىشتەرمەن ولشەنەتىن GPA-ءدى ءبىز كەلەسىدەي بولدىك: 50% – اكادەميالىق كورسەتكىش, 25%-عىلىمي-زەرتتەۋ قىزمەتى جانە 25%-قوعامدىق-الەۋمەتتىك جۇمىس. ياعني, ءار ستۋدەنتتىڭ الەۋمەتتىك قىزمەتى: ۆولونتەرلىك, سپورت, الەۋمەتتىك, مادەني جوبالارى دا ەسەپتەلەدى. جالپى كورسەتكىشتىڭ 25% - نا قوسىلادى. سوندىقتان «مەنىڭ باۋىرىم»جوباسىن ىسكە قوسۋ - بۇكىل قوعامعا پايداسى تيەتىن يگى باستامانىڭ جالعاسى دەپ ساناۋعا بولادى. ءبىزدىڭ بالالارىمىزدىڭ ءال-اۋقاتىنىڭ جاقسى بولۋى - مەملەكەتتىڭ يگىلىگى», ەكەنىن ايتتى عىلىم جانە جوعارى ءبىلىم ءمينيسترى ساياسات نۇربەك.
«مەنىڭ باۋىرىم» جوباسىنىڭ ەرىكتىلەرى الدىمەن ارنايى ترەنينگتەردەن ءوتىپ, مەكتەپتەردە بالالارمەن جانە جاسوسپىرىمدەرمەن جۇمىس ىستەۋ جونىندە ءتالىم الادى. ولاردىڭ ءارى قارايعى جۇمىسى پاتريوتتىق جانە ەكولوگيالىق تاربيە بەرۋ, جاۋاپكەرشىلىكتى ارتتىرۋ, مەكتەپىشىلىك قارىم-قاتىناستاردى نىعايتۋ, ەموتسيونالدىق ينتەللەكتىنى, قۇقىقتىق, وقىرماندىق, قارجىلىق جانە IT ساۋاتتىلىقتى دامىتۋ جونىندەگى ماڭىزدى باعىتتاردى قامتيدى.
ۆولونتەرلىك توپتىڭ مۇشەلەرى جوعارى وقۋ ورىندارى ستۋدەنتتەرىنەن جاساقتالسا, استانا قالاسى ءبىلىم باسقارماسى ولاردىڭ مەكتەپتەردەگى جۇمىسىن ۇيىمداستىرۋعا قولداۋ كورسەتەدى.
